文／吳佩瑩，屏東客家人，客委會與屏東客家中心說故事老師（四縣腔）

詩人講：「清明時節雨紛紛」，毋過在四月个屏東，日頭熱到像愛噴火樣吔。𠊎同好朋友、先生三人相湊去佳佐，係為著愛尋淨在文史資料肚有記載个「佳佐敬字亭」。

做一個客家文化工作者，敬字亭毋單淨係燒字紙个磚爐，佢過較係客家人「晴耕雨讀」精神个符號。在頭擺識字率無高个年代，文字分客家人看做係聖蹟。寫有文字个紙書，絕對做毋得烏白擲，定著愛收好來，拿去敬字亭恭恭敬敬个化忒，象徵「化羽升天」，這係對文字最高个敬意。

毋過，尋訪个過程千難萬難。𠊎等在佳和宮附近捩捩轉，仰般就係尋無佢个身影！𠊎拿等手機仔圖片問路脣種弓蕉个大哥，佢還笑笑仔講：「問黃仁勳啊！𠊎在這戴恁久，毋識看過這亭仔。」聽著這話，𠊎等个心肝肚有一息仔失望，愐著敬字亭恐驚係無在吔！落尾，𠊎等在涼亭問著在該打嘴鼓个老人家。

其中一個老阿伯笑弛弛仔講：「頭擺𠊎係香公，庄頭个大細事情問𠊎就著吔啦！」佢續等講：「惜字亭早就徙位吔，徙到公墓（塚埔仔）該搭位，現下變做私人地畀圍起來吔。」講忒，佢就騎起奧多拜帶𠊎等來到恬靜个公墓邊脣。

老阿伯手指一比，有一個八卦形敬字亭摎一尊石敢當，都畀圍在鐵網裡背。看等孤栖个佢，心肝肚有一種苦篤篤个感覺；佢無像佳冬蕭屋个敬字亭恁樣高大派頭，乜無分政府保護。佢就像一個分人打入冷宮个宮女，恬恬仔企在塚埔同荒草裡背，淨有自嘆寂寞个命。

𠊎爬上去看，燒字爐壁項原本鑲有銅鏡仔竟然毋見忒吔！老阿伯感慨講：「佢本旦个位所分人買去起工業區，本地鄉紳毋盼得拆忒，正請怪手徙來公墓保存。當時因爭壁項有必開，就用紅毛泥膏過，該鏡仔乜分人拿走吔！」

企在塚埔脣，愐這隻亭仔，毋就係像客家文化个影仔呢？係講文化淨係放在無人用入生活个「保護區」，結果就會定定仔分人添放忒吔。為著方便別人來尋，吾先生翕相去向谷歌申請，同時摎佢標示做歷史遺跡，一日就通過吔！下擺，有人尋來就毋會像𠊎等恁辛苦吔。

華語

詩人說：「清明時節雨紛紛」，不過在四月的屏東，太陽炙熱得像要噴火似的。我和好朋友、先生三人相約前往佳佐，是為了尋找文史資料中僅有少許記載的「佳佐敬字亭」。

作為一名客家文化工作者，敬字亭不僅是焚燒字紙的磚爐，它更是客家人「晴耕雨讀」精神的圖騰。在以前識字率不高的年代，文字被客家人看作是聖蹟。寫有文字的紙書，絕對不可以亂丟，一定要收集好，拿到敬字亭恭恭敬敬地焚化，象徵「化羽昇天」，這是對文字最高的敬意。

不過，尋訪過程很艱辛。我們在佳和宮附近團團轉，就是找不到它的身影！我拿著手機圖片詢問路邊種香蕉的大哥，他還笑嘻嘻地說：「問黃仁勳啊！我在這住這麼久，從沒看過這座亭子。」聽到這話，我們心裡有一點點失望，想著敬字亭恐怕是不在了吧！最後，我們在涼亭問到在聊天的老人家。

其中一位阿伯笑嘻嘻地說：「以前我是這裡的廟公，庄子裡的大小事情問我就對了啦！」他接著說：「惜字亭早就搬遷了，遷到公墓那一帶，現在變成私人土地被圍起來了。」說完，他就騎起摩托車帶領我們來到安靜的公墓邊。

阿伯手指一指，有一座八卦形的敬字亭與一尊石敢當，都被圍在鐵網裡面。看著孤零零的它，心裡有一種苦澀的感覺；它不像佳冬蕭屋的敬字亭那樣宏偉，也沒有得到政府保護。它就像一名被打入冷宮的宮女，靜靜地站在公墓與荒草之中，只有自嘆寂寞的命。

我爬上去查看，燒字爐牆壁上原本鑲嵌的銅鏡竟然不見了！阿伯感慨地說：「當時庄頭要發展，它所在的土地被買去蓋工業區，本地鄉紳捨不得把它拆掉，就請挖土機遷到公墓旁保存。因為牆壁有裂開，就用水泥糊過，那塊鏡子也被人拿走了。」

站在公墓旁，思考著這座亭子，不就像是客家文化的影子嗎？如果文化只是被放在無人運用到生活裡的「保護區」，最終就會慢慢地被遺忘。為了方便別人前來尋訪，我先生拍了幾張照片向谷歌申請，同時將它標示為歷史遺跡，一天就通過了！下次有人尋來，就不會像我們這麼辛苦了。