文／謝孟均，學生，苗栗頭屋客家人（四縣腔）

「天公啊落水噢阿妹啊～」這條《天公落水》可能對大自家來講聽到會懶咧，毋過，該央時對紅色鼻公个醫生个嘴唱出來，𠊎黏時就目汁濫泔。

可能你想講醫生就醫生講麽个紅鼻公呢？因為，佢兜毋係一般同人看病个先生，係有受著專業訓練个「阿丑琢」先生，有細倈仔也有細妹仔。佢等輒常在臺灣个兒童病房出現，手拿等樂器抑係人公仔，跈等音樂出現，就像日頭共樣將細人仔對艱苦个病痛之中牽出來，佢等無高明个醫術，淨有分人快樂个奇術。

紅鼻公个醫生係受著專業訓練个「阿丑琢」演員，堅持「快樂係心靈藥帖」个理念，戴等紅鼻公、拿等傢啦伙行入醫院。打幫隨來歲隨鬥个表演還有音樂，同病人對冷泧泧仔个病痛肚帶向充滿色彩个世界。這群表演者毋單淨安慰細人仔个心，也同家屬還有醫護做膽。在台灣，佢兜煞猛个推動友善醫療，甚至像無共國家、族群个旋律，也做得透過佢等个歌聲溫暖病房。用奇術樣个娛樂，證明了在抗癌同面對病痛个路項，除忒精準个醫術，還較需要這份溫柔做伴同希望。

該做麼个醫院肚項有阿丑琢呢？這愛從頭擺米國有一個先生安做「派奇先生」講起，佢認為病人毋單淨需要藥仔治療病痛，還需要心靈个藥方-快樂，兩種藥方合共下正係治療盡好方式。故所，佢正戴等紅冬冬仔个「鼻公」去撮手花弄人笑，希望降低病人心肚个艱苦。

前一駁仔，𠊎還在醫院治療白血病个時節，逐禮拜四，聽著啦歌哩曲个聲就係紅鼻公个先生來咧，毋管在該無閒抑係正睡醒，𠊎都會行出去廊仔下迎接佢等來到，有時係阿丑琢阿姊有時係阿哥，看著佢等𠊎就會笑弛弛仔，將治療个辛苦放忒，享受同佢等共下唱歌跳舞，有一擺𠊎放一首客家歌《天公落水》分佢等聽拜託佢等下二擺來巡房个時節表演這首歌曲，本旦想講有息為難人，毋過佢等下二擺正經表演這首客家歌分大家看，該種感動係用講个當難完全表達出來个，因爭在大醫院聽無客話當平常，毋過尋有客家个味緒正係人生。

雖然講紅色鼻公个醫生係阿丑琢無辦法醫好逐個受著病痛个病人，毋過佢等竟然做得分病人有彩色个日仔，未來等𠊎病醫好出社會後，有閒時節𠊎乜想愛做一個會唱客家歌會講客家話个阿丑琢醫生！毋單止分大家認識客家也愛將客家个溫暖傳出去！

華語

「天公啊落水噢阿妹啊～」這首《天公落水》對大家來說或許耳熟能詳，但那時從紅鼻子醫生的口中唱出，瞬間讓我淚流滿面。

或許你會疑惑，醫生就醫生，為什麼要說「紅鼻子」呢？因為他們不是一般為人看病的醫生，而是受過專業訓的「小丑醫生」，有男生也有女生。他們常出現在台灣的兒童病房，手拿樂器或玩偶，隨著音樂現身，就像陽光一樣，將孩子與長輩從陰暗的病痛中帶出來。他們沒有高明的醫術，卻有讓人快樂的魔術。

紅鼻子醫生是受過專業訓練的小丑演員，秉持「快樂是心靈藥帖」的理念，戴上紅鼻子、拿著道具走入醫院，藉由即興表演與音樂，將患者從冷冰冰的治療中帶向充滿色彩的世界。這群表演者不僅安慰孩子，也為家屬與醫護帶來勇氣。在台灣，他們致力推動友善醫療，甚至將不同國家、族群的旋律帶進病房。他們用魔術般的娛樂，證明了在抗癌與對抗疾病的路上，除了精湛的醫術，更需要這份溫柔的陪伴與希望。

為什麼醫院裡會有小丑呢？這要從美國的「派奇醫生」說起，他認為病人不只需要藥物，更需要心靈的藥方「快樂」。這兩種藥方合在一起，才是最好的治療方式。因此，他戴上紅鼻子逗人發笑，希望能降低病人心中的苦楚。

回想起前陣子，我還在醫院治療白血病時，每週四只要聽到音樂聲，就知道紅鼻子醫生來了。無論在忙還是剛睡醒，我都會走到走廊迎接。有時是小丑姊姊，有時是哥哥，看到他們我就笑逐顏開，忘了治療的辛苦。有一次，我放了《天公落水》給他們聽，拜託他們下次巡房時表演，本以為會為難人家，沒想到他們真的為了大家表演了這首客家歌。那種感動難以言喻──在大醫院聽不到客家話是日常，但能尋得客家「味道」，才是人生。

雖然紅鼻子醫生無法醫治好每一個受病痛折磨的人，卻能為患者帶來彩色的日子。未來等我康復回歸社會，我也想成為一位會唱客家歌、說客語的小丑醫生！不僅要讓大家認識客家，更要將客家的溫暖傳播出去。