猴痘預防射注文登記4月初10今晡日開放　哪位做得注射？！

鄉親假使自家檢查這6隻月之內有高風險个性行為，做得在今晡日4月初10下晝2點，到猴痘預防射接種意願登記个網路平台，進行（PrEP）預防射第2階段注文，目前全台灣有50間合作醫院，做盡做得提供3萬儕注射猴痘个名額。

目前有提供注猴痘个50間醫院，除金門摎連江縣這兜離島縣市無好注之外，昨晡日衛生福利部宣布新增加澎湖縣三軍總醫院澎湖分院也做得提供注猴痘預防射。

所以這滿台灣本島還有澎湖，每一隻縣市全部有一間醫院以上做得去注射，尤其係台北市做得提供差毋多6400儕个名額，台中市有4160儕个名額，高雄市有4060儕个名額、新北市有3160儕个名額。

衛生福利部提醒大家，注猴痘个第2階段意願登記平台，會從今晡日下晝2點起勢到5月12開放登記，毋過開放个時間淨有逐禮拜一到拜五，朝晨9點到下晝5點為止，每一儕鄉親淨做得登記1擺，假使登記好送出去之後，就做毋得修改還係過登記，請鄉親愛特別注意。

另外，假使鄉親登記成功之後，1日到2禮拜之內，就會收著注文个網路信仔，請鄉親一定愛依照注文登記个時間準時去醫院，還愛記得帶健保卡還有掛號个錢，去注文个醫院注猴痘預防射。

猴痘疫苗接種意願登記平台一覽表。翻攝自衛福部官網

高雄市區通勤月票399箍个方案 4月27上線開放購買

高雄市交通局今晡日宣布，高雄市區原本新台票1250箍个通勤月票，這滿為著配合行政院「促進公共運輸使用方案」，高雄市交通局特別摎這張通勤月票降低價數，變成399箍，這滿這張399箍个

通勤月票會在4月27在MeNGo APP上架，到時原本就有MeNGo會員个鄉親，毋使換卡片，就做得直接購買加值。

另外，新个會員做得從4月18起勢，在MeNGo APP註冊還有綁定電話這兜程序。

交通局講，這滿通勤月票399箍，逐日淨13箍，目前包含捷運、公車、輕軌、渡船、YouBike前30分鐘毋使錢這兜高雄大眾公共運輸工具，一隻月之內全部毋限制次數，另外，之後也會摎里程計費公路客運還有快線包含入去。

台鐵局也按算，最遽會在7月完成票證系統修改作業之後，鄉親做得拿MeNGo APP个通勤月票坐高雄區間台鐵火車，另外，台鐵局也會同時間推出臺南高雄屏東全區通勤月票999箍个方案，就係希望做得減少南部鄉親交通个負擔。

高雄市區通勤月票399元方案 4月27日上線、4月18日先開放申請會員及綁卡。翻攝自MeN Go官網

 

這篇文章 猴痘疫苗今起開放預約　全台50間醫院提供3萬名額 最早出現於 客新聞 HakkaNews。