文／邱鴻春，客語文薪傳師，桃園楊梅 伯公岡客家人，新楊平社區大學客語文 寫作研習班講師（海陸腔）

講人戇霸大番薯
這種觀念愛來除
頭腦交換身分變
聰明進化湛用途

「你這大番薯得斯！」頭擺世大人當會恁樣講細人，甚至有兜大人還會分人恁講。意思就係講，你恁樣講、做，係毋著个、係無適當个，你應該愛知正著。毋過這還算係盡斯文个講法，還有帶一息仔開玩笑个感覺，這就係𫣆俚客話个藝術。

有人會問，做麼个刊刊（註1）愛用番薯來形容？仰毋用芋仔抑係其他農作物？其實道理盡簡單，頭擺客家人來到台灣，普遍係生活艱苦个耕種人，當時政府吂有做水庫、開大圳，滿哪仔就係旱田，尤其係桃園台地開當多陂塘，正會有「千塘之鄉」个名仔。食水完全愛靠天公落水，想愛蒔禾有收成無恁該，所以大部分人會種較耐旱个番薯，先做得食飽較要緊，有大番薯好收成，當自然就係耕田人个期待。

但係大番薯就單淨係大番薯定定，就算大豐收自家食毋忒，乜賣毋著好價數──好看無價值，慢慢仔就用大番薯來講人戇。包尾有水庫、大圳咧，耕田人蒔田正有保障，正變成米穀王國。

這下人生活豐湧，食飯食飽無問題，番薯嗄變成高級點心，還有研究講，營養成分比飯還較高，價數乜比米較高咧。前幾日在富岡國小辦活動，無意中看著一盆當靚个递藤植物，行兼看真兜仔，竟然係蕃薯藤！無想著番薯用另外一隻身分出現－園藝作物。由此可見，毋好儘採看輕所有个植物、生物，更加毋好看輕人，應驗一句老話：天生我材必有用。不但係有用，還係非常好用。

「這𠊎毋曉、𠊎毋知，毋好喊𠊎。」係當多人會應世大人、先生、長官个一句話，毋敢挑戰新个事務、學習新个本等，實在係一種盡無擔當、盡無才調个行為，害提點你个人，乾燥（註2）毋知仰般正好！其實用另外一隻角度來看，這係對你个一種肯定，做得試看啊，學著就係自家个。

尤其係當在該打拚个後生人，這種觀念一定愛有，在職場正會得人惜，自然就會有較多較好个發展機會。毋好總知會講，別儕較好命，做得做主管、做頭家！該係你無看著人儕，戇戇仔做大番薯个經過。還有一句話，台頂三分鐘，台下十年功，乜係共樣个道理，大家共勉。

註釋

（註1）刊刊kanˋkanˋ，偏偏或一定的意思。

（註2）乾燥gonˋzauˋ，原意是缺水乾燥之意，引申為乾著急不知所措。

華語

講人呆呆大番薯
這種觀念要來除
頭腦交換身分變
聰明進化棒用途

「你這個大番薯！」以前長輩很會這樣說小孩，甚至有些大人還會被這樣唸。意思就是說，你這樣說、做，是不對的、是不適當的，你應該要知道才對。不過這還算是很文雅的講法，還有帶一點開玩笑的感覺，這就是我們客語的藝術。

有人會問，為什麼偏偏要用番薯來形容？怎麼不用芋頭或是其他農作物？其實道理很簡單，以前客家人來到台灣，普遍是生活艱苦的農夫，當時政府還沒有做水庫、開大圳，到處都是旱田，尤其是桃園台地開鑿很多池塘，才會有「千塘之鄉」之名。用水完全要靠老天爺下雨，想要插秧有收穫不是那麼簡單的，所以大部分人會種較耐旱的番薯，先可以吃飽較重要，有大番薯好收成，很自然就是農夫的期待。

但是大番薯就僅僅是大番薯而已，就算大豐收自己吃不完，也賣不到好價錢──好看沒價值，慢慢的就用大番薯來講人笨。後來有水庫、大圳了，農夫耕田才有保障，才變成稻米王國。

現代人生活富裕，吃飯吃飽沒問題，番薯卻變成高級點心，還有研究說，營養成分比飯還要高，價格也比米還高了。前幾天在富岡國小辦活動，無意中看到一盆很漂亮的藤蔓植物，靠近看清楚點，居然是番薯藤！沒想到番薯用另外一個身分出現－園藝作物。由此可見，不要隨便看輕所有的植物、生物，更不要看輕人，應驗一句老話：天生我材必有用。不但是有用，還是非常好用。

「這我不會、我不知道，不要叫我做。」是很多人會回應長輩、老師、長官的一句話，不敢挑戰新的事務、學習新的本事，實在是一種很沒擔當、很沒用的行為，害提拔你的人，突然不知道怎麼辦才好！其實用另外一個角度來看，這是對你的一種肯定，不妨試看看，學到就是自己的。

尤其是正在打拚的年輕人，這種觀念一定要有，在職場上才會受歡迎，自然就會有較多較好的發展機會。不要總是抱怨說，別人比較好命，可以當主管、當老闆，那是你沒看到，人家傻傻做大番薯的經過。還有一句話，台上三分鐘，台下十年功，也是同樣的道理，大家共勉之。