文／李文煥，苗栗縣客人，國中特教教師，客語薪傳師（文學類、語言類），現下戴苗栗（四縣腔）

更深夜靜，𠊎總係中意一儕人恬恬臥頭望等天頂。尤其係到了八月半，月到中秋分外明，月光柔柔仔照在屋簷，遠遠个山嶺浸在月光裡肚，端詳等該輪月光，心肚就會慢慢浮起一種講毋出个蒼茫。古人講：「今人不見古時月，今月曾經照古人。」該輪月光自古照到今，千年過忒，佢還係恁光。會老个係人，會變个係世間，無變个係天頂个月光。

想起華語老歌《古月照今城》，月光同山河無變，毋過月光照等个城池同人事，早就換了一代又一代。𫣆俚講个「今晡日」，其實單淨係歷史長河裡肚一道微光。

𠊎个家鄉苗栗，在頭擺个老地圖裡肚，有一隻還較有山林味个名仔，安到「貓狸」。這係一座分歲月輕輕仔揇等个山城。兩百零年前，漢人來到這片道卡斯人世代生活个土地，順等河壩一路搭寮建庄。清朝个文人乜識摎這片个山水光景寫下來，留下傳世个苗栗八景——對「三臺疊翠」到「雙峰凌霄」，對「吞霄漁艇」到「銀錠綺霞」。

歲月一路行，到今，有个景色還係恬恬仔在該位，有个早就隨等時代變化毋見忒。景物會變，看風景个方式會變，毋過自然个山風同天頂个月光，總係靜靜仔掌等這片土地，一年過一年。

這分𠊎輒輒思愐，歷史同這下之間，到底有麼个牽連？𫣆俚這下早就聽毋著兩百年前古人个聲哨，乜毋知該央時八月半暗晡，在禾埕尞涼个人，係用仰般个語調談論天頂个月光。

毋過，只要𫣆俚開嘴講客話，該兜代代相傳个聲音，就會慢慢摎𫣆俚、這片土地同祖先䌈共下。語言毋單淨係溝通个工具，佢更加係族群留分後代个生活記憶。祖先看過个山水、食過个味緒、講過个話，全都囥在這兜字詞同聲音裡肚。若係失忒了語言，祖先留下來个山水記憶同土地情感，乜就隨等斷忒了。

古月照今城，古語話今景。中秋个月光還係光華華仔照等今晡日个苗栗。城做得改，路做得開，人做得來來去去；唯有一輪月光自古照到今，還有一句句个客話對頭擺講到這下，吂曾斷過。

聽毋著古人个聲音無要緊，要緊个係𫣆俚這代客家子弟，愛記得自家个根。擔硬㧡起這份責任，肯去摎這古老又堅韌个母語講出來、傳下去。用客話去形容今晡日个山水、講這下个生活，語言个生命，正做得在這一聲一韻裡肚，細水長流，生生不息。

華語

月深人靜，我總是喜歡一個人默默仰頭望著天空。尤其是到了八月半，月到中秋分外明，月光柔和地照在屋簷上，遠方的山嶺浸潤在月光之中，細細端詳著那一輪明月，心中就會漸漸浮現出一種說不出的蒼茫感。古人說：「今人不見古時月，今月曾經照古人。」那一輪明月自古照到如今，千年過去了，它依然如此明亮。會衰老的是人，會改變的是世間，不變的是天空中的月光。

想起華語老歌《古月照今城》，月光與山河未曾改變，然而月光照耀著的城池與人事，早就換了一代又一代。我們所說的「今天」，其實不過是歷史長河裡的一道微光。

我的家鄉苗栗，在昔日的老地圖裡，有一個更有山林氣息的名字，叫做「貓狸」。這是一座被歲月輕柔擁抱的山城。兩百多年前，漢人來到這片道卡斯族世代生活的土地，順著河流一路搭寮建庄。清朝的文人也曾將這片山水光景記錄下來，留下傳世的「苗栗八景」——從「三臺疊翠」到「雙峰凌霄」，從「吞霄漁艇」到「銀錠綺霞」。

歲月不斷前行，到了今天，有些景色依然默默矗立在那裡，有些早就隨著時代變遷而不復存在。景物會變，欣賞風景的方式會變，然而自然的山風與天空中的月光，總是靜靜地看顧著這片土地，年復一年。

這讓我常常思考，歷史與當下之間，到底有著怎樣的牽連？我們如今早就聽不到兩百年前古人的聲音，也不知道當時中秋夜裡，在晒穀場納涼聊天的人們，是用怎樣的語調談論著天空中的月光。

然而，只要我們開口說客家話，那些世代相傳的聲音，就會漸漸將我們、這片土地與祖先緊緊繫在一起。語言不單單是溝通的工具，它更是族群留給後代的生活記憶。祖先看過的山水、嘗過的味道、說過的話語，全都藏在這些字詞與聲音之中。要是失去了語言，祖先留下來的山水記憶與土地情感，也會隨之斷了連結。

古月照今城，古語講今景。中秋的月光依舊明亮皎潔地照耀著今天的苗栗。城市可以改變，道路可以開闢，人們可以來來去去；唯獨那一輪明月自古照到如今，還有一句句客家話從過去說到現在，未曾中斷。

聽不到古人的聲音不要緊，重要的是我們這一代客家子弟，要記得自己的根，硬氣地扛起這份責任，願意把這古老而堅韌的母語說出來、傳下去。用客家話來形容今天的山水、訴說當下的生活，語言的生命，才能在這一聲一韻之中，細水長流，生生不息。