文／張秀娥

桃園市中壢區人，這下本本戴中壢，社區關懷據點／國中小客語支援教師 （四縣腔）

寒天時節，早早日頭絲既經恬恬仔箭入間房，清風對門縫仔吹入來，像恁樣溫暖个天時，𠊎歸隻腦膈肚開始按算，仰般來好好珍惜、規劃，這一日个美好時光。

想去想轉，無就來湊幾個從細在這莊頭大，這下一儕人戴个老人家，來去就近个中央大學行行尞尞。𠊎一講起這想法，儕儕暢到耐毋得，毋使半點鐘，大家就約好坐淰一台車，論歲數五儕人鬥起來，驚怕有400歲恁多，平常時大家大體都跍在屋下肚，今晡日難得有好共下出門，對大家來講，試著乜異生趣盡有意思，車肚个談笑聲，一下嗄變到鬧熱煎煎，原旦恬靜清冷个朝晨，忽然間變到燒暖起來哩！

隨等車輪仔捩呀捩，無幾久來到這靚靚闊闊个校園，雖然大家个行動都無盡方便，有擎等四腳、三脚杖仔，仰係單腳个，𠊎自家膝頭乜落等膝頭落仔，恁樣慢慢仔行，一個慢過一個，行行坐坐，互相提醒、關心。想想還行得贏、看得著、感受得著，對𠊎兜來講，就係一種簡單又實在个幸福。松林間个膨尾鼠在樹頂、樹下躍來躍去，像愛摎遊客討食，又像在表演佢當會个撮把戲，全毋驚人，𠊎兜毋多知仔就對佢拍手、阿腦，佢兜成時還會目盯盯捉等𠊎兜緊看緊看，像係在該喊「愛加油哦！」

毋多知仔，行到大草坪，可能佇毋著幾下日來溼潤个天時，今晡日恁有福氣，堵著出大日頭个日仔，儕儕渡等大人細子，在這軟軟溫柔个草坪項，暫時放下緊張个生活步調，搭布篷來打嘴鼓、食零嗒，還有細人仔在該搞囥人尋、走相逐、放紙鷂仔等等，日頭照在背囊項，歸身晒到鬆鬆爽爽，𠊎兜坐在草坪凳仔項，看等這鬧熱和挼个畫面，乜分大家回想起頭擺，做人爺哀到今下做阿太、阿婆个人生階段，客家婦人家个艱耐認命，在後生時節一步一步行過來，裡肚个艱辛，心肝頭總有淰淰个感動，目汁強強會跌下來。

臨暗仔日頭漸漸落山，冷風又咻咻滾緊吹，鬧熱總有煞棚个時節，𠊎等打起精神，互相鼓勵、互相祝福，繼續勇敢行出去，為未來个歲月人生打拚加油，期待下二擺个行尞。

華語

冬天，一大早陽光已經靜靜地射入房間，門縫吹進清涼舒爽的空氣，在這樣溫暖的天氣裡，腦海中開始盤算，要如何好好珍惜、規劃這一天的美好時光。

想來想去，不如就找幾位從小住這村莊長大，現在一個人住的獨居老人，去附近的中央大學走走逛逛。我一提起這個想法，每個人都高興得不得了，不到半小時，大家就約好坐滿一台車，算算歲數，五個人加起來恐怕有400歲之多，平時大家大多窩在家裡，今天難得能一起出門，對大家來說都覺得很有趣、很有意思，車裡的談笑聲一下子變得熱鬧滾滾，原本安靜清冷的早晨，瞬間變得溫暖起來了！

隨著車輪轉動，沒多久就來到這美麗寬闊的校園，雖然大家的行動都不太方便，有的拿著四腳、三腳拐杖，或是單腳手杖，我自己膝蓋也戴著護膝。我們就這樣慢慢的走，一個比一個慢，走走停停，互相提醒與關心。想說還能走得動、看得見、感受得到，對我們來說，就是一種簡單又實在的幸福。松林間的松鼠在樹上、樹下跳來跳去，像要跟遊客討東西吃，又像在表演拿手的特技，完全不怕人，我們不自覺地對牠拍拍手、稱讚，牠們有時還會目不轉睛地盯著我們看，像是對著我們喊「要加油哦！」

不知不覺走到大草坪，或許是受不了前幾天的陰濕天氣，今天很有福氣遇上大太陽，大家都帶著全家大小，在這柔軟溫柔的草坪上，暫時放下緊張的生活步調，搭起帳篷聊天、吃零食，還有小孩子在那裡玩捉迷藏、追逐、放風箏等等，陽光照在背上，全身曬的很舒爽，我們坐在草坪椅子上，看著這熱鬧親和的畫面，也讓大家回想起從前，從為人父母到現在當了曾祖母、祖母的人生階段，客家婦女的堅韌認命，從年輕時一步步走過來，其中的艱辛，心裡面總有滿滿的感動，淚水幾乎要掉下來。

傍晚太陽漸漸下山，冷風又呼呼的吹，熱鬧總有散場的時候，我們打起精神，互相鼓勵、互相祝福，繼續勇敢踏出腳步，為未來的歲月人生打拚加油，期待下一次的出遊。