文／陳畇棋，美濃客家人，國小先生，這下歇高雄市美濃區（南四縣腔）

人生像旅行，行啊行仔，會在路項看著靚花綠草、高天天个青山搭並一陣濛沙煙，休息轉擺，從邊欣賞、從邊享受生命个美，腳步一頓恬下來，嗄毋盼得離開了。毋過，𫝘靚个花會謝、會㪐忒，行啊行仔，路項有時節也會有礫礫矻矻，無就撞差路，心情驚驚險險，無結無煞！

恬靜愐想一下，人無千日好，花無百日紅，平洋低湖，本成就係蓋自然个，若係起執性計較、抑係緊問天公爺仰會恁仔？該就像緊𫟧𫟧圓𫟧毋出人生个出口。

師院畢業該年，因為少子化个衝擊，教師甄選堵著「考試寒流」，之前陸陸續續就有學長、學姊分享先生甄選有異難考！兩、三千人報名，單淨錄取兩、三十儕，還過三叮嚀四吩咐，係無日帶夜煞猛讀書、專心準備試教技巧，該定著就係「觀音娘跌落井—罅佛」！

現實無辦法改變，只有照等讀書計畫，煞猛打拚，一步步行穩來。實習核黏時報名考試，該下𠊎擎等一个戇膽，恅著：「『心專石穿』、『一分耕耘，一分收成』，花了一年个時間實習、讀書、試教練習、口試準備這兜，應該會開花打子。」

無想著，結果一出來，𠊎差一息對凳仔項橫下來！麼个啊？連備取都無！該打擊在心肚久久毋會散忒，續下來恁多日，食飯啉湯無味無緒，連朋友湊𠊎出去遶尞乜無麼个興，總講就係心情歸日仔烏陰烏陰，慍悴難耐。

無幾久，吾實習先生毋盼得𠊎歸日仔閼閼拶拶，就同𠊎講：「𢱤人無風毋會動」，逐項事情發生總有厥因由，𠊎等應該愛好好對事情裡背尋出問題，思考、反想同調整，正有機會再一擺跋䟘起來。實習先生又接等講：「蛇有蛇路，𧊅有𧊅路，人啊總會尋出自家个一條路。」係啊！假使「做先生」這條路行毋得，換過另一條路來行乜做得。先生鼓勵个話，就像天旱會必壢个田坵，落了一陣及時雨，解決了土地愛荒核个問題，也分𠊎了解著人生路項个可能性。

人生路項有順序也有惹杈，重要个係，心態正確，堵著失敗莫失志，腳步企穩來，相信一步一腳跡，定著會看著人生最靚个風景。

華語

人生像旅行，走著走著，會在路上看到紅花綠葉、高聳且襯托山嵐的青山，休息一會，一邊欣賞美景，一邊享受人生的美好，駐足良久，竟捨不地離開了。不過，再美的花還是會凋謝，走著走著，路上有時也會凹凸不平，甚或迷路的時候，心情可謂驚險萬分，不知該如何是好！

平心靜氣想想，人無千日好，花無百日紅，平原窪地，都是很自然的，若是固執計較，或是頻頻問老天爺會和如此？那就像是一直轉圈圈轉不出人生的出口。

師院畢業那年，因為受到少子化的衝擊，教師甄選正值「考試寒流」，在這之前學長姊就陸續分享考試有多難考！兩、三千人報名，只錄取二、三十人，還有叮嚀再三，若非沒日沒夜認真讀書、專心準備試教技巧，那就一定是「觀音佛祖跌落井—有得拚了」！

現實無法改變，只有按部就班，認真讀書，站穩腳步。實習後立刻報名考試，那時的我憑著愚膽，想著：「『心專石穿』、『一分耕耘、一分收穫』，花了一年的時間實習、讀書、試教練習、準備口試這些，應該會開花結果。」

沒想到，結果一出來，我差點從椅子上跌下來！什麼？連備取都沒有！這打擊在心裡久久不肯散去，接下來幾天，飲食食之無味，連朋友邀我出去玩也興趣缺缺，總之心情鎮日烏雲密布，鬱卒難耐。

沒多久，我的實習老師捨不得我終日心情不好，就跟我說：「因為有風，人才因此被吹動」，每件事情的發生必有原因，我們應該要好好從事情裡面找出問題，思考、反省和調整，才有機會再次站起來。實習老師接著又說：「蛇、青蛙都有各自的路，人也終會找出自己的一條路。」是啊！如果「當老師」行不通，再換過另一條路也可以。老師鼓勵的話，如同乾旱要龜裂的土地，來了一場及時雨，解決了土地將荒廢的問題，也讓我了解到人生的可能性。

人生的路有平順也有荊棘，重要的是，心態正確，失敗不失志，站穩腳步，一步一腳印，一定會看到人生最美的風景。