文／廖佳仁（海陸豐野客），桃園市新楊平社區大學地方知識學發展中心研究員兼主任（海陸腔）

噭包噭包㧡弓蕉，㧡到楊梅肚屎枵；田塍[1]草仔煞猛咬，咬到自家大核包[2]。

這係頭擺細人時節，長透會拿來取笑該兜當愛噭个細人仔，喊佢兜：噭包牯、噭包嫲。做細人時，這條歌仔差毋多逐日都愛聽好多擺，因為該下个細人多，爺哀哪有該閒神去插佢兜。細人就算噭到會死，乜無大人會去揈佢。故所，其他个細人仔就還較挑挑去搣耍佢、頂碓佢，摎佢撩著越噭越大聲，噭毋會煞。無像這下，嬰兒仔降少，隻隻都係爺哀个心頭肉，惜到會死，毋盼得放手。

哪有細人毋會噭？從嬰兒仔一出娘胎開始，佢就一定愛會噭；假使講嬰兒仔降出來毋會噭，該接生个醫生還愛遽遽摎佢个屎胐斗撇幾下，係無，該嬰兒仔毋噭出聲，毋會敨氣，該就麻煩了。噭，對細人來講，該係天生个，毋使學就曉个。肚屎枵，愛食乳，用噭个；尿布溼忒、滑屎了，毋舒爽，用噭个；發病、作燒，毋鬆爽，共樣用噭个。噭，毋使學，該係天生个，摎敨氣共樣。

你識看過有該種噭噭下仔會停下來，偷偷匿匿偷看有人注意佢噭个細孲仔無？𠊎相信你定著有該種經驗。該斯係該隻細人當在該試看佢噭个效果仰般？係講旁脣無半儕，全無人去揈佢，佢就毋會過噭下去了，因為佢个噭全無用。係講旁脣還有人，佢就會繼續噭，噭還較大聲，因為佢心肚想个係，可能佢噭个毋罅，正會無人插佢。

故所，所有个細人從細斯知做得用噭來控制其他人。有兜細人會挑挑盡命牯噭，動啊著就放勢牯大噭，噭到會斷氣樣，摎大人嚇到會死，就高不將遽遽答應佢个要求，分佢達著目的。還有兜爺哀，昶惜細人仔，惜到毋盼得分細人噭，嗄顛倒分細人控制。

原旦，細人來到人世間，就愛從細就開始定定分佢學習𫣆兜大人教佢个規矩，人常講「細孲仔從細就愛屈愛拗，等佢大了正會有規矩。」毋好下二擺，你正知「有阿公毋做，愛做人个孫仔，該斯艱苦了！」這就係講從細就愛摎細人教好，分佢學會做人做事个規矩，等佢大了以後，正毋會無規無矩，將爺哀大人準奴才來使。

噭，從來就毋係壞事，乜無著抑係毋著个問題。適量个噭，做得分𫣆俚表達心肚个情感，分還毋會講話、毋曉表情達意个嬰兒仔通知爺哀，佢需要爺哀摎佢𢯭手解決問題。不過，等若細人慢慢仔大，就愛教會佢，噭毋係解決問題个方法，愛用講个，愛定定學會自家解決問題个方法。一步一步放手分細人學會獨立面對問題、解決問題，乜係𫣆俚大人愛學會个。

註釋
[1] 田塍，田埂，田邊的小徑。
[2] 核包，海陸音habˋbauˋ。核卵包，指陰囊；大核包，指疝氣。

華語

哭包哭包背香蕉，背到楊梅肚子餓；田埂草兒努力咬，咬到自己大核包。

這是以前還是小孩時候，經常會拿來取笑那些很愛哭的小孩，叫他們：愛哭包。還是小孩時，這首歌差不多每天都要聽個好幾回，因為那時候的小孩多，父母哪有那個閒功夫去理會他們。小孩就算哭得要死，也不會有大人去理他。因此，其他的小孩就更是故意去戲弄他、捉弄他，將他弄得越哭越大聲，哭不停。不像現在，孩子生得少，個個都是他父母的心肝寶貝，疼得要死，捨不得放開。

哪有小孩不會哭的？從嬰兒呱呱落地開始，他就一定要會哭；倘若嬰兒生下來不會哭，那接生的醫師還要趕快將他的屁股拍幾下，不然，那個嬰兒不哭出聲，就無法呼吸，那就麻煩了。哭，對小孩來說，是天生的，不用學就會的。肚子餓了，要吃奶，用哭的；尿布濕掉、拉屎了，不舒爽，用哭的；生病、發燒，不舒服，一樣用哭的。哭，不用學，那是天生的，跟呼吸一樣。

你曾見過有那種哭一哭會停下來，偷偷摸摸偷看是否有人注意他哭的小孩嗎？我相信你一定有這種經驗。那就是那個小孩正在那測試看看他哭的效果如何？若是發現旁邊沒半個人，都沒人去理會他，他就不會繼續哭下去了，因為他的哭都沒用。若是旁邊還有人，他就會繼續哭，哭得更大聲，因為他心裡想的是，可能是他哭得不夠，才會沒人去理會他。

因此，所有的小孩從小就知道可以用哭來控制其他人。有些小孩會故意拼命地哭，動不動就放肆大哭，哭得像會斷氣一樣，把大人嚇得要死，就不得不趕快答應他的要求，讓他達到目的。還有些父母，太疼小孩，疼到捨不得讓小孩哭，反而讓小孩給控制住。

原本，小孩來到這世上，就是要從小就開始慢慢讓他學習我們大人教給他的規矩，人常言道「小孩從小就要彎要折，等他長大了才會有規矩。」莫等以後，你才知道「可當老爺卻不做，偏要去做人家乖孫子，那就痛苦了！」這就是說從小就要將小孩教好，讓他學會做人做事的規矩，等他長大以後，才不會沒規沒矩，將父母大人當奴才來使喚。

哭，從來就不是壞事，也沒有對或錯的問題。適度的哭，可以讓我們抒發心裡的情感，讓還不會說話、不曉得如何表情達意的嬰兒能通知父母，他需要父母幫他解決問題。不過，等你的小孩漸漸長大，就要教會他，哭不是解決問題的方法，要用說的，要一步一步地學會自己解決問題的方法。一步一步地放手讓小孩學會獨立面對問題、解決問題，也是我們大人要學會的。