文／張鳳英，家管，龍潭人（四縣腔）

𠊎還細漢時，屋下个環境異好，有開一間規模無算細个磚廠。該下廠內有二十個長工摎工人，做磚个過程差不多完全靠人力。磚泥係工人用肩㧡、用手挖，當辛苦，還愛落到幾下十公尺深个陂塘肚挖，挖前先摎陂塘个水抽燥，一擔一擔㧡起來。泥軟軟黏黏又盡重，㧡起來汗流脈落歸領衫潦潦，毋過工人總係恬恬仔，逐日照常完成自家个工作。

起先个磚廠，位置在今這下龍潭區龍華路到東龍路、北二高現址个橋下。偎龍華路該頭，係磚窯廠个廠址；偎東龍路該頭，係挖泥个陂塘。廠內有做磚機器、轉輸器、切割器，還有辦公室；廠外就有晒場、工寮、倉庫、牛欄摎停車場。場脣還設有一隻練泥場，係圓形个細陂塘（池仔），分水牛練泥用。逐日開工前，頭家摎工人都會燒香拜神，祈求開工順利平安；長工就先牽水牛出去行行啊！分佢屙屎尿，還愛牽佢食草食飽，準備一日个辛苦。

工作開始，愛先摎軟黏个泥放入轉輸器攪勻，再過送上做磚機。機器一轉，泥就分機器切做整齊个長形磚仔，一擺兩垤，工人愛細心細意接等，排好放在手𢱤車仔（里阿卡）頂高，𢱤去晒場。磚仔排列到人个腰仔恁高「人字形」个距離，先分風吹摎日頭晒幾日仔。若堵著落雨天，工人就會摎磚仔遮好保護好，等天時好轉，正繼續晒燥。

磚仔全部燥了後，就送入高高大大圓圓个窯肚，排列到整整齊齊，分逐垤磚仔都做得平均焙著火个空間，成品正會燒到紅又無缺點个成品。窯肚个磚仔排淰淰了後，就摎出入口封好，過再行一擺祭拜，祈求燒窯順順利利。燒窯愛日夜無停，大約半隻月，工人輪班顧火，頭家也會共下陪等監工。石炭一批一批送入窯肚，看等窯肚內火燒到紅紅紅，寒天會感覺盡燒暖，熱天就汗流脈落歸身溼溚溚，就算打赤膊還係愛忍耐。值班个阿叔、阿伯會帶番薯、芋仔摎滷到入味个豬肉放在窯脣特別个烤食區，分工人自由拿來焙來食，補充氣力。

燒窯成功个日仔總算到了。磚仔全部冷忒了後，頭家決定開窯出磚。該兜紅紅个磚仔出爐，所有个人員都共下慶祝，舉行完工酬神祭拜，乜感謝大家這段時間以來个辛苦付出。看等一排一排整齊、紅亮个磚仔，𠊎做得感受著逐垤磚所留下个汗水摎心力。這兜紅磚毋單淨係屋下个財產，還係該隻年代勤勞摎團結个象徵，也分𠊎深深體會著，做磚係一門當辛苦、也當值得沙鼻个手藝。

今下，龍華路摎東龍路个橋下早就變樣忒哩，毋過𠊎還係輒輒想起該片晒場、該座大窯，還有大家無閒直掣 、嗄充滿溫暖个該兜人。

華語

小時候，我家境不差，家裡經營著一間規模不小的磚廠。那時廠裡有二十名長工與工人，製磚的過程幾乎完全依靠人力。磚泥由工人肩挑手挖，非常辛苦——有時甚至要下到挖深數十公尺的池塘內，抽乾池水，一擔一擔地挑上來。泥土軟粘又重，挑起來汗水濕透衣背，但工人們總是默默完成每天的工作。

當初的磚廠位於如今龍華路至東龍路北二高現址橋下。靠近龍華路這一端，是磚窯廠的廠址；靠近東龍路這一端，則是挖土的池塘。廠內有製磚機器、轉輸器、切割器，以及辦公室；廠外則有晒場、工寮、倉庫、牛欄和停車場。場邊還設有一個練土場，是圓形的池子，供水牛練土使用。每天開工前，老闆與工人都會燒香拜拜，祈求開工順利平安；長工則先牽水牛散步，讓它解決大小便並餵飽，準備好一天的勞動。

工作開始後，先將軟粘的泥土放進轉輸器攪拌均勻，再送上製磚機。機器運轉，泥土被切割成整齊的長方形磚塊，每次兩塊，由工人小心接送，排放在手推車上送到晒場。磚塊排列成人腰高的人字形，先經風乾與日曬數日。遇雨天，工人會覆蓋保護，待天晴再繼續曬乾。

磚塊全乾後，送進高大圓形的窯內，整齊排列，使每塊磚均勻受火，燒成紅亮無瑕的成品。窯內排滿磚後，密封出入口，再行祭拜，祈求燒窯順利。窯需日夜不斷燃燒約半個月，工人輪班值勤，老闆也會陪伴監工。煤炭一批批送進窯口，看著窯內熊熊火焰，冬天令人溫暖，夏天則汗流浹背，即使衣衫單薄，也得忍耐熬過去。值勤的叔叔、伯父們會將地瓜、芋頭和入味的肉品放在窯邊特製的烤食區，工人可自由取食，補充體力。

終於，燒窯成功的日子到來。磚塊完全冷卻後，老闆決定開窯出磚。紅通通的磚塊出爐，所有人員一同慶祝，舉行酬神祭拜，感謝大家辛苦一段時日的付出。看著一排排整齊、紅亮的磚塊，我彷彿能感受到每一塊磚承載的汗水與努力。這些紅磚不僅是家裡的財產，更是那個年代勤奮與團結的象徵，也讓我深刻理解到，製磚是一門既辛苦又值得驕傲的手藝。

如今，龍華路與東龍路的橋下早已變了樣，但我仍時常回想起那片晒場、那座大窯，以及一群忙碌卻充滿溫暖的人們。