文／巫素萍，國小先生（海陸腔）

「頭擺个事情〜頭擺〜你還記得無？……」你識聽過阿淘哥〈頭擺个事情〉這條歌仔無？該輕快个節奏摎旋律，毋單淨非常好聽，共樣个句仔，還聽得出頭前用四縣腔，後背用海陸腔唱出來無共樣个味瑞。

𠊎係一隻戴在竹東，從細斯講海陸腔个客家子弟，阿爸、阿姆日時頭出門食頭路，𠊎斯跈等毋曉講華語个阿公、阿婆講客話。爺哀轉到屋下，乜教𫣆俚三姊妹講客話，逐日毋係講長講短，就係呢呢哪哪，𠊎試著講客話斯像食糜恁該。

有一擺跈阿姆轉外家尞，第一擺聽到戴在銅鑼个姑丈講四縣，有一種像人聽得識又無幾識个感覺，聲調仰會顛倒生？有兜音又無幾共樣？𫣆俚講大家好（tai+ gaˋhoˊ），佢講大家好（tai gaˊhoˋ）；𫣆俚講食飯（shidˋ pon+），佢講食飯（siid fan），正經「拗毋轉」，舌嫲斯會打結。

讀小學个時節，逐禮拜日，𠊎摎老妹、老弟三儕輪等去中央市場，摎阿姆𢯭手賣菜，市場摎公園兩隔壁，市場肚用海陸腔買賣，公園肚用四縣腔唱山歌，兩種腔頭，聲調倒反，你高𠊎就低，你升𠊎就降，實在還鬧熱哪。毋過，該量時，𠊎个耳空會自動選台，打開海陸腔，關忒四縣腔，因為聽毋慣四縣腔，想毋解仰會有恁多山歌好唱？

一直到𠊎在小學教書，開始教客語，看到客語課本同時摎海陸腔、四縣腔標音出來，𠊎試著當生趣，決定挑戰四縣腔中高級認證，報名後拿到教材，黏皮打開書、聽音檔，𠊎个頭那肚像有兩套樂譜在該挷大索，比論講讀到「餳人」這隻詞彙，海陸腔講「餳人」（sia ngin），四縣腔講「餳人」（xiangˇ nginˇ），寫在紙項平平係這兩隻字，講出來實在斯有爭差。

在當多擺「你高𠊎低」、「𠊎升你降」个對抗之中，𠊎練習打開心胸，閒著斯看客家電視台、聽講客廣播電台，一直到𠊎做得順序「轉得過」四縣腔。經過這兜練習，𠊎發覺自家看著更加天闊地闊个世界。

原來，語言毋單淨係溝通个工具，還像一條流動个清泉，滿哪仔流等去。海陸腔係𠊎个根，四縣腔係𠊎个翼，斯愛摎心門打開來，無麼个係「拗毋轉」个，客家話个世界，正經係最「餳人」个寶藏。

華語

「以前的事情〜以前〜你還記得嗎？……」你曾經聽過阿淘哥〈頭擺个事情〉這條歌嗎？那輕快的節奏和旋律，不只非常動聽，同樣的句子，還聽得出前面用四縣腔，後面用海陸腔唱出不一樣的味道。

我是一個住在竹東，從小就講海陸腔的客家子弟，爸爸、媽媽白天出門工作，我就跟著不會講華語的爺爺、奶奶講客家話。父母回到家，也教我們三姊妹講客家話，每天不是說長說短，就是低聲說話，我覺得講客家話就像吃粥一樣簡單。

有一次回娘家玩，頭一回聽到住在銅鑼的姑丈講四縣，有一種好像聽得懂又不大懂的感覺，聲調怎麼會顛倒？有些音又不太一樣？我們講大家好（tai+ gaˋhoˊ），他講大家好（tai gaˊhoˋ）；我們講吃飯（shidˋ pon+），他講吃飯（siid fan），真的「轉不過來」，舌頭都會打結。

讀小學的時候，每到禮拜天，我和妹妹、弟弟三人輪流去中央市場，幫媽媽賣菜，市場與公園比鄰，市場內用海陸腔買賣，公園裡用四縣腔唱山歌，兩種腔調，聲調相反，你高我就低，你升我就降，實在很熱鬧哇。不過，那時，我的耳朵會自動選台，打開海陸腔，關掉四縣腔，因為聽不慣四縣腔，想不通怎麼會有這麼多山歌可唱？

一直到我在小學教書，開始教客語，看到客語課本同時把海陸腔、四縣腔標音出來，我感到很有趣，決定挑戰四縣腔中高級認證，報名後拿到教材，馬上打開書、聽音檔，我的頭腦裡像有兩套樂譜在那裡拔河，比如讀到「吸引人」這個詞彙，海陸腔講「餳人」（sia ngin），四縣腔講「餳人」（xiangˇ nginˇ），寫在紙上同樣是這兩個字，講出來實在有所不同。

在很多次「你高我低」、「我升你降」的對抗之中，我練習打開心胸，有空就看客家電視台、聽講客廣播電台，一直到我能夠順利「轉得過」四縣腔。經過這些練習，我發覺自己看到更加天寬地闊的世界。

原來，語言不只是溝通的工具，還像一條流動的清泉，到處流著去。海陸腔是我的根，四縣腔是我的翼，只要把心門打開來，沒什麼「轉不過來」的，客家話的世界，真的是最「吸引人」的寶藏。