文／黃美貞，臺北市光復國小老師，苗栗客家人，這下戴台北市（四縣腔）

旅行个方式當多，有人䟓工（註1）去尋美食，有人中意看風景，有人喜歡遶古蹟。毋過，對𠊎來講，旅行除忒帶等手機仔，還有一樣定著愛帶个東西─一隻毽仔。行到一個新个所在，𠊎總會在靚靚个風景面前踢幾下仔，分雞毛球飛起飛落，乜分這段旅行留下記號。

讀小學个時節，下課个鐘仔聲一響，同學就相湊拿等雞毛球去操場比賽。大家你一下、𠊎一下，看麼人踢較多。該央時个𠊎，踢無幾下就跌到地泥下，看等同學一踢就幾下十下，心肝肚當毋甘願，乜希望有一日，做得像佢兜共樣，分雞毛球久久毋落地。

轉到屋下，隔壁阿雪姊看𠊎當想學个樣仔，就笑笑仔講：「來，𠊎陪你踢。」頭下碼，佢總係讓𠊎二十下，分𠊎慢慢仔有信心；等到𠊎越踢越穩，佢正摎𠊎對零開始算，公平來比賽。雖然𠊎還係輸較多，毋過，一下一下个起落、一擺一擺个失敗，煞分𠊎學會耐心摎堅持。

有時𠊎踢到腳𤸁，想愛放棄，阿雪姊淨係摎雞毛球擲過來，笑笑仔講：「再過一擺！」阿雪姊從來毋會誚㸐（註2）𠊎，淨係企在脣項，看等𠊎一腳一腳練。等𠊎踢著較多下个時節，佢个笑容，比𠊎還較歡喜。

無想著，過忒幾十年，踢雞毛球還係𠊎輒常做个運動。五十歲過，𠊎開始將旅行摎踢雞毛球放共下。行到一個景點，𠊎總會拿出雞毛球，左腳踢、右腳勾。有一擺去海脣看大風車，海風吹到咻咻滾，大風車在遠方慢慢仔捩。𠊎企在海脣拿出雞毛球，正踢一下，雞毛球就分風吹等走，風忒大，雞毛球踢毋著幾下，毋過大風車、海風摎𠊎追雞毛球个身影，堵好共下留在影片肚，嗄係該擺旅行盡笑科个畫面。

旅行毋係愛摎人比高低，係想用自家熟事个方式，留下回憶。打幫科技進步，用畫面做成短影片，看起來像紀錄風景，其實係一路行過來个心情故事。多年以後再過打開來看，毽仔飛過个無論係山、抑係海，還有𠊎一站又一站行過个人生風景。

（註1）䟓工：音dangˊ gungˊ ：專程、特地。

（註2）誚㸐：音seuˊ nadˋ：嘲諷、挖苦以言語諷刺、嘲笑人。

帶著毽子去旅行

旅行的方式很多，有人專程去尋找美食，有人喜歡欣賞風景，有人喜歡走訪古蹟。不過，對我來說，旅行除了帶著手機，還有一樣一定要帶的東西——一只毽子。每到一個新的地方，我總會在美麗的風景前踢上幾下，讓毽子飛起飛落，也為這段旅行留下屬於自己的記號。

讀小學的時候，下課鐘聲一響，同學們就相約拿著毽子到操場比賽。大家你一下、我一下，看誰踢得比較多。那時候的我，踢沒幾下毽子就落地了，看著同學一踢就是幾十下，心裡很不服氣，也希望有一天，能夠像他們一樣，讓毽子久久不落地。

回到家，隔壁的阿雪姊看我很想學的樣子，就笑著說：「來，我陪你踢。」剛開始，她總是讓我二十下，讓我慢慢建立信心；等到我越踢越穩，她才和我從零開始計算，公平地比賽。雖然我還是輸的時候比較多，但是一次次的起落、一次次的失敗，反而讓我學會了耐心與堅持。

有時候我踢到腳痠，想要放棄，阿雪姊只是把毽子丟過來，笑著說：「再一次！」阿雪姊從來不會責罵我，只是站在旁邊，看著我一腳一腳地練習。等我能夠踢得更多下時，她臉上的笑容，甚至比我還要開心。

沒想到，過了幾十年，踢毽子依然是我經常做的運動。五十歲以後，我開始把旅行和踢毽子結合在一起。每到一個景點，我總會拿出毽子，左腳踢、右腳勾。有一次到海邊看大風車，海風強勁地吹著，大風車在遠方緩緩轉動。我站在海邊拿出毽子，才剛踢一下，毽子就被風吹著跑。風實在太大，根本踢不了幾下，不過，大風車、海風和我追著毽子跑的身影，剛好一起留在影片裡，反而成了那趟旅行最好笑的畫面。

旅行不是為了和別人比較，而是想用自己熟悉的方式，留下回憶。幸好科技進步了，可以把這些畫面做成一段段短影片。看起來像是在記錄風景，其實收藏的，是一路走來的心情故事。多年以後再打開來看，毽子飛過的，無論是山，還是海，其中還有我一站又一站走過的人生風景。