文／邱鴻春，客語文薪傳師，桃園楊梅伯公岡客家人，新楊平社區大學客語文寫作研習班講師（海陸腔）

小小身般得人惜
不管馬膠抑石壁
細縫求生開靚花
大大志氣滿坪跡

前幾日个朝晨，阿姆問講：朝晨有趕緊愛去哪位無？𠊎隨應佢講：「無。」佢接等就講，該等下仔去醫院，還好24點鐘个心電圖機器後，續鉤落去若細舅屋下尞，今年到今還吂有去，年初二姊妹會又直接去餐廳食晝，食飽就轉咧。

來到細舅屋下，這係一間老伙房屋，頭前四個阿舅，全出去買屋戴咧，就細舅一桍人本本戴在老屋，細舅姆前幾年無在咧，三個表老弟全吂有討，日時頭出門做頭路，平常時就細舅一儕在屋下，就算表老弟放尞，乜各各囥在間肚項，細舅還係盡孤栖，這就係現下人普遍个問題！

𠊎兜三儕在廳下打法仔一下，就共下去看，細舅今年在崗頂樹園新開墾个菜園，看著一大片个黃泥園，脣頭還有大嫲堆拈出來个石牯，加上種恁多菜，實在盡無簡單。黏時連想著𫣆俚个來台祖先，當時麼个就無，就單淨有兩隻手定定，愛滿哪仔開山打林，煞猛來種食，正有辦法日仔過得下去，該種个艱苦，一定係細舅這个一千倍一萬倍毋止！

行轉來天時坪，忽然間看著，天時坪必縫有泥沙个位所，生出一墩一墩个細號日頭花，完全毋驚大日頭，更加無分佢晒燥忒，顛倒日頭越烈佢開到越靚，當像𫣆俚客家人个硬頸精神，完全毋會分環境來打橫忒。人講：「花香蝶仔自然來」，正經無半點耗漦，就恁樣當自然分𠊎看著佢咧。

認真想想仔，當多人會嫌這嫌該，做一行怨一行，總話著外國个月光較圓較光、別人个頭路較好、別人个餔娘較靚又溫柔、別人个老公緣投又老實等等。看看細號日頭花，佢曉得運用紅毛泥必縫，來釘根並大膽探頭暴芽，經過一站仔時間打拚了後，自然會有人看著來幫助，無定著還會出現心儀對象。像微風阿哥看著佢个堅耐勇敢，就加送兜沙土來做嬰兒仔个眠床，暗晡頭較涼咧，露水阿姊就過家來陪佢尞，還送來最要緊个露水，毋多知仔就有細細靚花滿坪跡。

恁樣个互助合作，就係社會大轉盤運轉个自然現象，分儕儕有事做，事事有人做，逐儕認真做好自家个本分，國家社會就一片和挼咧。

註：本文的「細號日頭花」指毛馬齒莧，又稱松葉牡丹

小小太陽花

小小身軀很可愛
不管柏油或石壁
細縫求生開花美
大大志氣隨處見

前幾天的早上，媽媽問說：早上有趕著要去哪裡嗎？我馬上回答說沒有。她接著就說，那等一下去醫院，還好24小時的心電圖機器後，順便繞進去你小舅家聊天，今年到現在還沒有去，年初二兄弟姊妹中午聚餐，又直接去餐廳，吃飽就回家了。

來到小舅家，這是一間老伙房屋，前面四個舅舅，都在外面買房子住了，就小舅這一家子還是住在老家，小舅媽前幾年不在了，三個表弟都還沒結婚，白天出門上班，平常就小舅一人在家裡，就算表弟放假休息，也各自在房間裡，小舅還是很孤單，這就是現在人普遍的問題！

我們三人在客廳聊了一下，就一起去看，小舅今年在小山丘樹林新開墾的菜園，看到一大片的黃土園，旁邊還有一大堆挑出來的石頭，加上種很多菜，實在很不簡單。馬上聯想到我們的來台祖先，當時什麼都沒有，就只有一雙手而已，要到處開山闢土，認真耕種，日子才有辦法過得下去，那種的艱辛，一定是小舅這樣的一百倍一千倍不止！

走回來廣場，忽然間看到，廣場水泥地裂縫的位置，長出一堆一堆的毛馬齒莧，完全不怕大太陽，更沒有被曬乾了，反而太陽越烈開的花越美，很像我們客家人的硬頸精神，完全不會讓環境給打倒。人家講：花香蝶自來，真的沒有一點誇張，就這樣很自然給我看到它的存在。

仔細想一想，很多人會嫌東嫌西，做一行怨一行，總以為外國的月亮較圓較亮、別人的工作較好、別人的老婆漂亮又溫柔、別人的老公英俊又忠厚等等。看看毛馬齒莧，它懂得運用水泥裂縫，長根並大膽探頭發芽，經過一段時間打拚之後，自然會有人看到來幫助，說不定還會出現心儀對象。像微風哥哥看到它的堅毅勇敢，就多送一些砂土來做嬰兒床，晚上比較涼了，露水姊姊就過來陪它聊天，還送來最重要的露水，不知不覺美麗的小花就到處都是了。

這樣的互助合作，就是社會大轉盤運轉的自然現象，讓人人有事做，事事有人做，每人認真做好自己的本分，國家社會就一片祥和了。