文／黃麗芬，苗栗客人，現下戴臺北市，現職係客語薪傳師、客語教學支援先生（四縣腔）

一個臺灣旅客歇瑞士五星級飯店，退房時留下一碗泡麵同一張紙條，來分享臺灣个美食。飯店員工第一擺食著臺灣个泡麵，歡喜翕相分享，網友笑講這係「泡麵外交」。一碗泡麵，嗄分遠在異鄉个人，對臺灣留下燒暖个印象。

看忒這篇新聞，𠊎心肝肚想，若係一碗泡麵做得分人記得臺灣，該𫣆又做得分享麼个，分人認識客家？有時節，分享个毋係東西，顛倒係一份人情味。真正留分人記得个，乜毋係泡麵本身，係分享个心意。詳細想看啊，無定𫣆一直同方向想顛倒了。客家，毋單淨係等別儕認識，係需要創造過較多分人堵著个機會。

異多人認為，認識客家愛到客莊旅行、參加大型活動。其實，客家一直都在生活肚。市場肚一句親暱暱仔个客話，飯桌項个一碗粄條，搵等桔醬个雞盤，伯公廟前譫哆个世大人，巷仔口晒等覆菜、菜脯个人家，都係客家盡正實个面貌。佢毋係挑事安排个文化展示，顛倒係日見日个生活風景。

脣項个客家，比𫣆想像个還較多。就因為忒熟事了，顛倒會無注意著厥个存在。文化會恁感動人，毋係因為紹介到精彩，係因為親身感受。第一擺食擂茶个人，無定記得个係擂缽肚散發出來个香氣；第一擺聽著「食飽吂」个人，無定感受著个係一句相借問个人情味。一種文化做得行入生活，就毋單淨係知識，顛倒變做一段記憶。

做客語教學恁多年，𠊎越來越相信，推廣客家，無定著愛做驚天動地个大事。成下仔，在課堂分享一句客話，帶朋友行入客莊食一餐飯，紹介一道料理後背个故事，甚至寫一篇文章，分享一段生活經驗，都有可能變成別儕堵著客家个開始。

文化个延續，毋單淨係靠保存，過較需要「分享」。分享，毋係䟓工宣傳，顛倒係誠心同自家珍惜个生活紹介分過較多人。別儕會因為一句客話、一碗擂茶、一段故事，肯來認識客家，文化就在人同人个交流當中恬恬仔流動。

一碗泡麵，分遠方个人看著臺灣；一句客話、一碗擂茶、一段故事，乜做得分人堵著客家。客家，毋係在高高个舞臺項，乜毋單淨在節慶活動裡肚，顛倒係一直在𫣆个日常生活當中。等到緊來緊多人肯分享自家脣項个客家，就會有越來越多人肯行兼客家、理解客家，進一步中意客家。

分享，毋使出國乜做得著，你，想愛分享客家个麼个呢？

華語

一位臺灣旅客入住瑞士五星級飯店，退房時留下一碗泡麵和一張紙條，來分享臺灣的美食。飯店員工第一次品嘗臺灣的泡麵，開心拍照分享，網友笑稱這是「泡麵外交」。一碗泡麵，卻讓遠在異鄉的人，對臺灣留下溫暖的印象。

看完這則新聞，我心裡想，如果一碗泡麵能讓人記住臺灣，那麼我們又可以分享甚麼，讓人認識客家？有時候，分享的不是東西，反而是一份人情味。真正留給人記得的，也不是泡麵本身，是分享的心意。仔細想想，也許我們一直把方向想反了。客家，不只是等待別人認識，是需要創造更多被遇見的機會。

許多人認為，認識客家要到客莊旅遊、參加大型活動。其實，客家一直都在生活裡。市場裡一句親切的客話，餐桌上的一碗粄條，沾著桔醬的白斬雞，伯公廟前閒話家常的長輩，巷口晒著福菜、菜脯的人家，都是客家最真實的模樣。它不是刻意安排的文化展示，而是日復一日的生活風景。

身邊的客家，比我們想像的還更多。就因為太熟悉了，反而會忽略它的存在。文化之所以動人，不是因為介紹得精彩，是因為親身感受。第一次喝擂茶的人，也許記住的是擂缽裡散發出來的香氣；第一次聽見「食飽吂（吃飽了嗎）」的人，也許感受到的是一句問候的人情味。當一種文化能夠走進生活，就不只是知識，而成為一段記憶。

從事客語教學多年，我越來越相信，推廣客家，不一定要做驚天動地的大事。有時候，在課堂分享一句客話，帶朋友走進客莊吃一頓飯，介紹一道料理背後的故事，甚至寫一篇文章，分享一段生活經驗，都有可能成為別人遇見客家的開始。

文化的延續，不只是靠保存，更需要「分享」。分享，不是刻意宣傳，而是真誠把自己珍惜的生活介紹給更多人。別人會因為一句客話、一碗擂茶、一段故事，願意來認識客家，文化便在人與人的交流中悄悄流動。

一碗泡麵，讓遠方的人看見臺灣；一句客家話、一碗擂茶、一段故事，也能讓人遇見客家。客家，不在高高的舞臺上，也不只在節慶活動裡，而是一直在我們的日常生活中。當越來越多人願意分享自己身邊的客家，就會有越來越多人願意走近客家、理解客家，進而喜歡客家。

分享，不用出國也做得到，你，想要分享客家的什麼呢？