文／吳佩瑩，屏東客家人，客委會與屏東客家中心說故事老師（四縣腔）

𠊎用一禮拜个時間，分心恬靜下來看忒客家電視台製作个戲劇《魯冰花》。從頭一集起勢看到最尾，目汁水就像開等个水道水樣仔，溚溚跌關毋核。身項揇等一包面紙緊抽緊捽，兩下半仔垃圾桶就分𠊎擲淰仔。

緊看心肝肚緊愐：「這三子爺仰會恁衰過呢？」這齣戲劇係改編自文學家鍾肇政先生在1961年發表个作品。深刻描寫當時貧富差別、死板毋知變通个教育制度，還有天才兒童夭折个無奈運命，分人看著嶄蠻心酸，乜十分感動著準備愛去學校做客語先生个𠊎。

戲劇肚最分人毋盼得个，係窮苦人家分現實壓逼个無奈，同古阿明摎阿姊茶妹在困境中表現出个知人我摎堅耐。阿明從厥目珠看出去个世界，永遠係紅羅花色、有感情又有生命力；好得在厥生命當中堵著看得識佢有才華个郭先生。雖然在功利摎偏見个現實環境，天真拚毋贏階級同無麼資源个命運，毋過佢等該份開朗个心摎打毋橫个志氣，斷真分人敬佩。

愐著新學期就愛開學吔，戲劇裡背有一集教授同郭雲天先生个對話，緊在吾心肝裡背愐等：「教育工作者同醫療工作者係共樣个，做毋得擇病人，乜做毋得選學生仔。淨有毋想珍惜生命个病人摎毋想學習个學生仔，𠊎兜絕對做毋得有棄嫌病人、放棄學生仔个想法。」這兜話正經係提醒著𠊎，愛做客語先生應該堅持个責任摎使命。

在課堂裡肚，𠊎等面對个係一個個家庭背景、個性各樣个學生仔。做先生个，做毋得有偏心同偏見，愛自家先做正來，分細人仔做模範，正有辦法教好學生仔仰般「做好一個人」。教育從來就毋單淨係追求表面个分數同名次，顛倒愛像郭先生恁仔，用心發現逐儕學生仔个特質，還較愛用燒暖个心去照顧該兜會分人冷落个細人仔。

新學期就愛開始吔，𠊎期望自家帶等像魯冰花（阿姆花）樣仔个溫柔摎包容行入教室，用無分別心、永遠毋放棄个熱誠，分學生仔逐擺上課都帶等歡喜同期待，暢樂來認識𠊎兜自家靚靚个母語同文化。

華語

我花了一個星期的時間，靜下心來看完客家電視台製作的戲劇《魯冰花》。從第一集開始看到最後，眼淚就像打開的水龍頭一樣，滴滴答答流個不停、關都關不住。懷裡抱著一包面紙邊抽邊擦，沒一下子垃圾桶就被我丟滿了。

一邊看心裡一邊想著：「這父子三人怎麼會這麼命苦呢？」這部戲劇是改編自文學家鍾肇政先生在1961年發表的作品，深刻描繪了當時貧富懸殊、死板不知變通的教育制度，以及天才兒童早逝的無奈命運，讓人看了非常心酸，也深深感動了正準備去學校擔任客語老師的我。

劇中最令人心疼與不捨的，是窮苦人家被現實生活壓迫的無奈，以及古阿明與姊姊茶妹在困境中展現出的懂事與堅韌。阿明從他眼裡看出去的世界，永遠是色彩斑斕、充滿感情又有生命力的；所幸在他生命中遇到了看得懂他才華的郭老師。雖然在充滿功利與偏見的現實環境下，天真終究敵不過階級與物資匱乏的命運，不過他們那份開朗的心性與打不倒的志氣，著實令人敬佩。

想到新學期就要開學了，戲劇裡有一集教授與郭雲天老師的對話，不斷在我的腦海中想著：「教育工作者和醫療工作者是一樣的，不能挑病人，也不能選學生。只有不想珍惜生命的病人和不想學習的學生，我們絕對不能產生嫌棄病人、放棄學生的念頭。」這些話確實提醒了我，身為客語老師所應該堅持的責任與使命。

在課堂裡，我們面對的是一個個家庭背景、個性各不相同的學生。身為老師，不能有偏心與偏見，要以身作則做好榜樣，才有辦法引導學生學會如何「做好一個人」。教育從來就不只是追求表面的分數與名次，反而應該像郭老師那樣，用心發掘每個學生的特質，更要用溫暖的心去照顧那些容易被忽視、被冷落的孩子。

新學期就要開始了，我期許自己帶著像魯冰花（母親花）般的溫柔與包容走進教室，用毫無分別心、永不放棄的熱忱，讓學生每次上課都帶著歡喜與期待，開開心心地來認識我們自己美麗的母語與文化。