文／吳佩瑩，屏東客家人，客委會與屏東客家中心說故事老師（四縣腔）

好朋友相湊𠊎共下去「蹶」六十石山。𠊎話著這係一個考驗腳力个蹶山遊尞，無想著，嗄變做考驗𠊎等該台新電動車仔「蹶」山个本事。𠊎等輒常在網路聽著電動車蹶山無力，還有溫度忒高火燒車个傳言，故所𠊎就愐：無就順續來試看啊這台車仔个馬力，看係毋係正經像網路講个恁仔。這座山有六百到八百公尺恁高，在山肚彎彎斡斡駛等上去，一路項雖然青驚摝天，毋過當刺激！還過這台電動車掝掝（fagˋ）跳，實在湛斗、蓋有力，輕輕鬆鬆就打破網路个謠言！

這擺行程當中最幸運个，就係有個蓋專業个導遊大哥共下行。大哥眼界闊、智識飽、路況熟，跈等佢異有安全感；假使無佢帶路，𠊎等驚怕淨敢在山腳下看風景定定。佢帶等𠊎等一路轉彎轉斡飆到山頂高，面前豁然開朗，像來到仙人歇个所在，分𠊎等嘖嘖滾緊喊：「還孤盲哪！仰會恁靚呢！」

六十石山在花蓮縣富里鄉竹田村，歸隻莊頭就畀花東縱谷圍等，右手片看過去，有一條像睡龍个中央山脈。山腳中央有耕田人在該熰火爐堆，遠遠看去該出火煙摎金黃色个山景互相幫襯，畫面實在靚到分人無想愛歸吔。老一輩人講个「後山」，這下就種吔滿山滿谷个金針花，就像客家人翻山過嶺、堅耐刻苦个精神，環境越艱難，佢越會開花。

路項𠊎等去一家民宿借便所，譫哆个時節，正知頭家娘个先生係新竹關西个客家人，這間店仔所在个地名安到「雲閩號」，係記錄厥家娘係學老人，佢兜歸屋下人對雲林搬徙到這搭仔个歷史。聽著佢等因爭時代變遷嗄無傳承著客家話，感覺蓋遺憾。

講到大家蓋歡喜个時節，𠊎乜向大哥請教山名个由來。大哥講：「日本時代，這垤土地盡肥，一甲地做得收『六十石』穀仔；另外一個講法係，斬忒樟樹過後，山排顯出六十垤大烏石。」無論係代表收成好个「六十石」，抑係磐石个「六十石」，都見證吔這片土地開山打林个艱苦歲月。

這擺試駛車仔、遶山看光景摎淰淰人情味个六十石山遊記，毋單淨打破網路對電動車死刻刻个講法，更加在這山項，見識吔人文摎土地交織个深刻記憶。

六十石山。吳佩瑩提供

華語

好友相約一起去「爬」六十石山。我原本以為這是一場考驗腳力的徒步登山之旅，沒想到，竟然變成了考驗我們那台新電動車「爬」山的本事。我們常常在網路上聽說電動車爬山無力、甚至會過熱導致火燒車的傳言，因此便想著，不如順道來試試看這台車的馬力，看看是不是真的像網路上說的那樣。這座山有六百到八百公尺那麼高，在山裡彎彎曲曲地開上去，一路上雖然驚心動魄，不過相當刺激！而且這台電動車活潑亂跳的，非常了不起、有力，輕輕鬆鬆就打破了網路上的謠言！

這次行程當中最幸運的，是有位非常專業的導遊大哥同行。大哥眼界開廣、知識豐富、路況熟絡，跟著他非常有安全感；如果沒有他帶路，我們恐怕只敢在山腳下看看風景而已。他帶著我們一路轉彎盤旋飆到山頂，面前豁然開朗，彷彿來到仙人居住的勝境，讓我們讚嘆連連、不住地喊道：「真是不可思議啊！怎麼會這麼美呢！」

六十石山位於花蓮縣富里鄉竹田村，整個村莊被花東縱谷環抱著，向右手邊望去，有一條宛如睡龍般的中央山脈。山腳中央有農夫在田裡燒稻草，遠遠看著那冉冉升起的炊煙與金黃色的山景相互映襯，畫面實在美得讓人捨不得回家。老一輩人口中的「後山」，如今種滿了滿山滿谷的金針花，就像客家人翻山越嶺、堅忍刻苦的精神，越是艱難的環境，它越是挺拔開花。

途中我們去了一家民宿借廁所，在閒聊之中，才知道老闆娘的先生是新竹關西的客家人，而他們店家所在的地名「雲閩號」，則是記錄著他的婆婆是閩南人，他們全家人從雲林搬遷移居到這裡的歷史。聽到他們因為時代變遷而沒能把客家話傳承下來，感到相當遺憾。

大家聊得非常開心之餘，我也向大哥請教這座山名字的由來。大哥說：「日治時期，這片土地非常肥沃，一甲地可以收成『六十石（ㄉㄢˋ）』的稻穀；另外一種說法則是，砍伐完樟樹之後，山坡上顯露出了六十塊巨大的黑石頭。」不論是代表豐收的「六十石」，還是巨石的「六十石」，都見證了這片土地披荊斬棘、開墾荒山的艱苦歲月。

這趟集試車、遊山賞景與人間溫情於一體的六十石山遊記，不僅打破了網路上對電動車刻板印象的說法，更是在這片山谷間，見證了人文與土地交織的深刻記憶。