【寫客文】伯公看電影：共下坐尞打法仔

文／張博舜，地方文化暨社區創生工作者，桃園楊梅伯公岡四湖客家人（海陸腔）

伯公，係客家人个土地神，生活大細事，全部會去尋佢參詳，頭擺農業時代，從蒔田到割禾，這下食頭路抑係做生理，土地伯公斯係𠊎兜最親个守護神，還記得你平常時摎伯公講麼个無？這擺伯公岡个老伯公，堵好有機會出莊參加桃竹苗聯合神明交流活動，來到桃園統領電影院，共下來看電影。

伯公岡，係富岡个舊名，意思斯係講這片有當多个伯公庇佑在地个居民，伯公大部分都在田頭田尾、水頭水尾摎莊頭路口，逐日看等耕田人出門做田事，乜看等細人仔在莊肚搞尞，對世大人來講，日時頭做事經過會摎伯公打招呼，過年過節會打粄，準備三牲來敬奉，這種人摎土地、信仰之間个關係，毋係單淨在廟肚，係在逐日个生活裡肚，這幾年透過無共樣个方式行出去，透過教育、傳承還有對話，富岡國小劉宥成先生，摎「富富·小山岡」創生團隊共下合作，希望保存伯公岡車頭後背个百年老伯公，摎在地客家伯公信仰保存、相續下去，乜做得分後生人有機會參與在地客家信仰。

一般在伯公下，會做客家大戲、打八仙、起福還福，這兜係祈求風調雨順、身體平安康健，這下時代後生人緊來緊多齣頭，摎信仰文化有機會繼續傳承下去，伯公岡百年老伯公摎《三清》電影共下合作，湊「桃竹苗」幾下間伯公廟，包含新竹湖口下北勢福德祠、苗栗白沙屯風頭厝福德祠、蘆竹海福宮金雞嫲，到桃園統領威秀影城裡肚看電影，順續去坐尞打法仔。

這擺正式當特別，平常時係大家去伯公下尋伯公，這擺顛倒係伯公「出莊」，對伯公岡來到城市肚个電影院，摎桃竹苗各地神明共下交流，對傳統信仰來講係當新个體驗，這係當生趣个事情，其實乜係在該思考，傳統文化愛仰般行入這下个生活，神明摎宮廟文化，在祭祀之外，係毋係還做得有其他方式做得摎現代人對話。

透過交流合作，分大自家看見傳統地方信仰、宮廟文化，還有人摎神明之間當深个情感連結，客家伯公文化乜用還較多元个方式分人看著，所以，伯公毋單淨係「上家下屋」个鄰舍，還做得打幫伯公傳承客家語言摎文化，尋轉自家文化當好个開始。

華語

伯公，是客家人的土地神，生活大小事，全都會去找他商量，從以前農業時代插秧、割稻，現在工作或是在做生意，土地公就是我們最親近的守護神，還記得你平時向土地公講什麼嗎？這次富岡的老土地公，剛好有機會出庄參加桃竹苗聯合神明交流活動，來到桃園統領電影院，一起看電影。

伯公岡，是富岡的舊名，意思是說這裡有很多土地公廟在這裡庇佑在地的居民，土地公大部分都在田頭田尾、水頭水尾、村庄路口，每天看著農夫出門做田裡的工作，也看著小孩在村裡玩耍，對長輩而言，白天工作經過會跟土地公打招呼，過年過節會做粄，準備三牲來敬奉，這種人與土地、信仰之間的關係，不是只有在廟裡，是在每天生活裡，這幾年透過不同的方式走出去，透過教育、傳承和對話，富岡國小劉宥成老師，和「富富·小山岡」創生團隊攜手合作，希望保存土地公岡車站後面的百年老公廟，將在地客家土地公信仰保存、延續下去，也可以讓年輕人有機會參與在地客家信仰。

通常在土地公廟，會演客家大戲、打八仙、祈福還願，這些是祈求風調雨順、身體平安健康，現在時代年輕人越來越多變化，將信仰文化有機會繼續傳承，富岡百年老先生和《三清》電影合作，找「桃竹苗」多間土地公廟，包含新竹湖口下北勢福德祠、苗栗白沙屯風頭厝福德祠、蘆竹海福宮金雞母，去桃園統領威秀影城裡面欣賞電影，去做客聊天。

這次真的很特別，平時是大家去土地公廟找土地公，這次反而是土地公「出庄」，從富岡來到都市電影院，與桃竹苗各地神明交流，對傳統信仰來說是很新的體驗，這是很有趣的事情，其實也是在思考，傳統文化要如何走進現在的生活，神明和廟宇文化，在祭祀之外，是否還能有其他方式可以和現代人對話。

透過交流合作，讓大家看見傳統地方信仰、廟宇文化，還有人與神明之間深刻的情感連結，客家土地公文化也用更多元的方式讓人看見，所以，土地公不只是「左鄰右舍」的鄰居，還可以藉著伯公傳承客家語言和文化，找回自己文化非常好的開始。