文／張筠，客話支援先生同客話薪傳師，六堆客人，這下歇在台中（南四縣腔）

客委會舉辦个海內外客家後生交流營行到第二年，這擺共樣召集各地客家後生，針對六堆地區，看𠊎等客人个頭擺同現代。為著在這七日分大家好好啊了解六堆，故所客委會同所有六堆最重要个景點都扭出來，朝晨八點半就出門、暗晡八點半正下課，對食衣住行育樂各方面來學習客人个智慧。

食个部分，除核食著在地个番豆豆腐、高麗菜封、焗酒，還有創新个五彩粄條；衣个部分，甚至對六堆「綠金」菁仔个生長同買賣來認識，過來自家拈地泥項个菁仔仁來體驗染布；住个部分，親身去到佳冬蕭屋、張屋伙房，經過文學家曾貴海先生个老屋，欣賞客人个特色建築，學習裡背設計个意義、頭擺發生過个歷史事件；行个部分，𠊎等在鍾理和紀念館外背个文學步道、平妹橋，行過頭擺人行過个路，對石頭項个文字，看客人寫个文學作品；育个部分，暗晡頭在飯店共下來讀曾貴海、鍾理和同鍾鐵民先生个文章，討論對文章裡背看著个多元族群、客人文化、時代變化，思考傳承个意義；樂个部分，大家共下聽邱淑蟬先生唱歌，共下學習打傳統八音、唱林生祥先生个歌仔。

𠊎等陪伴員在暗晡頭教學員熟事六堆，在日時頭同學員共下去二峰圳、五溝水、黃蝶翠谷、母樹林，乜共下看在地生態个可可同雉牯，共下做盤花、拜伯公。短短七日，毋單淨用目珠看、用耳公聽、用鼻公鼻、用嘴食、用手做、用腳去行，最重要个係用心去感受，去思考仰仔用行動來實踐𠊎等對客家个認同同傳承。

因為𠊎係市區大个，以前紹介自家都愛先講爺哀係哪隻客莊个客人，這擺同各地客家後生交流正體會著，毋管歇在哪，𠊎等都流等客人个血，用𠊎等客人个語言，講𠊎等客人个故事，共下創造𠊎等客人个未來。

雖然最尾營主任請假，臨時及急愛𠊎做結業式典禮个主持人，毋過因為有大家做伴，第一擺用客話主持顛倒蓋順序，𠊎直接用自家對這七日个心得來主持，帶等大家共下回憶這段旅行，共下分享𠊎等按算同學習著个精神、文化，用麼个方式繼續講分還過多人聽。

華語

客委會舉辦的海內外客家後生交流營走到第二年，這次同樣召集各地客家年輕人，針對六堆地區，看我們客家人的以前和現代。為了在這七天就讓大家好好地了解六堆，所以客委會把所有六堆最重要的景點都抓出來，早上八點半就出門、晚上八點半才下課，從食衣住行育樂各方面來學習客家人的智慧。

食的部份，除了吃到在地的花生豆腐、高麗菜封、釀酒，還有創新的五彩粄條；衣的部分，甚至對六堆「綠金」檳榔的生長和買賣來認識，再來自己撿地上的檳榔子來體驗染布；住的部分，實際去到佳冬蕭家古厝、張家伙房，經過文學家曾貴海老師的故居，欣賞客人的特色建築，學習其中設計的意義、以前發生過的歷史事件；行的部分，我們在鍾理和紀念館外面的文學步道、平妹橋，走過以前人走過的路，從石頭上的文字，看客家人寫的文學作品；育的部分，晚上在飯店一起讀曾貴海、鍾理和和鍾鐵民老師的文章，討論從文章裡看到的多元族群、客人文化、時代變化，思考傳承的意義；樂的部分，大家一起聽邱淑蟬老師唱歌，一起學習打傳統八音、唱林生祥老師的歌。

我們陪伴員在夜晚教導學員認識六堆，在白天和學員一起去二峰圳、五溝水、黃蝶翠谷、母樹林，也一起看在地生態的可可和水雉，一起做盤花、拜土地公。短短七天，不只用眼睛看、用耳朵聽、用鼻子聞、用嘴巴吃、用手做、用腳去走，最重要的是用心去感受，去思考如何用行動來實踐我們對客家的認同和傳承。

因為我是市區長大的，以前自我介紹都要先說父母是哪個客庄的客家人，這次和各地的客家年輕人交流才體會到，不管住在哪裡，我們都留著客家人的血液，用我們客家人的語言，說我們客家人的故事，一起創造我們客家人的未來。

雖然最後營主任請假，很臨時地要我擔任結業式典禮的主持人，不過因為有大家的陪伴，第一次用客語主持反而很順利，我直接用自己對這七天的心得來主持，帶著大家一起回憶這段旅程，一起分享我們打算把學習到的精神、文化，用什麼方式繼續講給更多人聽。