文／邱鴻春，客語文薪傳師，桃園楊梅伯公岡客家人，新楊平社區大學客語文寫作研習班講師（海陸腔）

一年一度夏令營

這擺人數四十名

輕鬆搞尞學客語

成果展現客滿坪

伯公岡微劇場夏令營，七月十五在富岡國小開課咧。伯公岡地方創生基地－富富．小山岡，在南桃園客青交流協會理事長張博舜細阿哥帶領下，今年已經連續辦第三年个小朋友客語夏令營，這擺人數還增加到四十儕，𠊎盡榮幸全有參與著，摎往年共樣，有分家長摎小朋友肯定阿腦，還講明年還愛來，所有个先生、隊輔、志工都當歡喜也當有成就感。

今年个總召集計劃人係細阿哥仔傅尚仁，五日个課程規畫非常湛斗，有連結在地富岡國小、新楊平社區大學、員本社區活動中心，還過和平濕地。一般課程內容有客家唸謠、微戲劇；DIY有創意結石泥、客家粄食、做樹葉帽仔、結石䃗、植物葉仔拓染摎做塘涵（註1）；體驗課程有陂塘䃗牛踏層跺黃泥、罾魚仔、禾筍窟搞水拈福壽螺、拜伯公跌聖筊等等，尤其係在和平濕地个牛踏層漯黃泥摎禾筍窟搞水，逐個細人仔搞到翻車觔斗、歸身潦潦又泥棍棍，儕儕牙裂裂笑咪咪仔，簡單个沖沖洗洗後，衫褲換好又萋婥萋婥咧。相賽都講，吂識做得恁自在、做得光明正大搞泥搞水，無想著這一晝邊，係最湛斗个大自然課程，明年還愛來。

雖然講課程當豐富，細人歡喜靂天，毋過大人嗄係苦煎煎，主要係微戲劇个部分，本來話著戲劇羅先生係統一排戲，𠊎个課程就較少，最多就跈等佢，校正細人个發音，無想著佢係採用五小隊分流教學个方式，配合各隊唸謠教動作，其他四小隊就由𠊎摎金珠先生來教俳句唸謠，還過各隊輔教隊呼，該載大家个機動性當高，有當完美个配合，加上小朋友全當精靈，先生講个、教个，黏時就學會咧，甚至有幾位屋下係講學老个小朋友，居然客家唸謠還唸到當標準，這正經係沉浸式教學个效果。

最尾日个成果展，在桃園市旗艦社區－員本社區活動中心舉辦，有邀請家長參加，乜有盡多地方民意代表來鼓勵，小朋友在微劇場个展現，內容包含唸謠融入劇場、DIY作品自家舞台行秀展示，逐儕全大方發揮表演，台下台上家長小朋友，嘶胲另命个歡呼聲鬧熱煎煎，實在就毋輸演唱會，下棚後通盤講，明年還愛參加，聽著實在當感心，心肝肚想，掌牛五日有價值。

（註1）早期立在池塘邊的放水口。是用紅磚砌的四方長條狀涵管，由底部到上面有開3~5個口，平常是塞住的，可以依高低水位來放水灌溉。

華語

一年一度夏令營

這次人數四十名

輕鬆遊玩學客語

成果展現客滿坪

伯公岡微劇場夏令營，7/15在富岡國小開課了。伯公岡地方創生基地－富富．小山岡，在南桃園客青交流協會理事長張博舜年輕人帶領下，今年已經連續辦第三年的小朋友客語夏令營，這次人數還增加到四十位，我很榮幸全有參與到，和往年一樣，有給家長和小朋友肯定讚美，還說明年還要來，所有的老師、隊輔、志工都很開心也很有成就感。

今年的總召集計劃人是年輕人傅尚仁，五天的課程規畫非常棒，有連結在地富岡國小、新楊平社區大學、員本社區活動中心，還有和平濕地。一般課程內容有客家唸謠、微戲劇；DIY有創意黏土、客家粄食、做樹葉帽子、疊石牆、植物葉子拓染和做塘涵；體驗課程有池塘邊坡牛踏層踩黃泥巴、四方網網魚、茭白筍田玩水撿福壽螺、拜土地公跌聖杯等等，尤其是在和平濕地的牛踏層踩陷黃泥巴和茭白筍田玩水，每個小朋友玩到碰碰摔、全身濕濕還一身泥，都還是笑容滿面，簡單的沖洗後，衣服換好又是乾淨亮麗了。大家搶著說，從來不曾那麼自在、可以光明正大玩泥巴玩水，沒想到這一上午，是最棒的大自然課程，明年還要來。

雖然說課程很豐富，小朋友歡天喜地，但卻是苦了大人們，主要是微戲劇的部分，本來以為戲劇羅先生是統一排戲，我的課程就比較少了，頂多就跟著他，正音小朋友的發音，沒想到他是採用五小隊分流教學的方式，配合各隊唸謠教動作，其他四小隊就由我和金珠老師來教俳句唸謠，還有各隊輔教隊呼，還好大家的機動性很高，有很完美的配合，加上小朋友都很靈光，老師講的、教的，馬上就學會了，甚至有幾位家裡是講閩南語的小朋友，居然客家唸謠還唸到很標準，這真的是沉浸式教學的效果。

最後一天成果展，在桃園市的旗艦社區──員本社區活動中心舉辦，有邀請家長參加，也有很多地方民意代表來鼓勵，小朋友在微劇場的展現，內容包含唸謠融入劇場、DIY作品自己舞台走秀，每位都大方發揮表演，台下台上家長小朋友，嘶聲力竭的歡呼聲此起彼落，實在就不輸給演唱會，下台後大家說，明年還要參加，聽到實在很感動，心裡想，看五天的小牛有值得。