文／劉菊英，桃園龍潭客家人，客語文薪傳師、社大講師、國小客語先生（四縣腔）

學校脣个空地，有一大片白雪雪个蔥蘭。該兜花像白玉恁清雅，細細長長个葉仔跈等風搖來搖去，盡像在該摎𠊎擛手，乜分𠊎想起做細人个時節。

𠊎還細時，大部份人生活都當苦，無錢好買玩具。就因為恁樣，𠊎兜个想像力顛倒特別好。無論係路脣个葉仔、細石頭、大人做籃做䉂伸著个竹篾仔、燥忒个樹截仔，謝忒个花，都係𠊎兜份家啦个玩具，這當中最特別个就係蔥蘭。

蔥蘭係盡好種个植物，儘採種都會生，種幾頭就會變成一大片。佢个樣仔像韭菜，花莖乜像韭菜花莖，莖中央係空心个。𠊎兜這群細人仔，就摎花莖頭節个汁撚忒，再將尾節彎轉來插轉頭節去，變做一隻圓圈仔，𠊎兜喊佢做「樹奶仔」。

放學了，一群細人仔湊等共下去摘蔥蘭莖。摘有一堆了後，𠊎兜就煞猛將莖頭節个汁撚忒，再將尾節彎轉來插入頭節。逐儕都當認真、當專心，想愛做出最靚、最好个圓圈仔，毋輸雕刻家在該雕刻藝術品。每儕人先做好十條，再堆做一細堆，準備開始大戰一場。

遊戲个規則盡簡單，乜盡公平。開始大家先縈拳，贏个人半跪半伏在地泥項，用嘴偎兼該堆「樹奶仔」，出力牯將該堆「樹奶仔」歕散，歕散幾多條就係佢贏个。這遊戲考驗肺活量同準確度，還較係考驗細人仔个耐力。輸个人毋會灰心，有成時看著同伴歕到面頰卵膕膕，該生趣个樣仔，大家還笑到軟怠怠。𠊎兜緊笑緊拈地泥下伸个圓圈仔，續下來又緊催：「再過一輪！」𠊎愛贏轉來。

快樂个笑聲，像風吹過風鈴，對青色个草兜肚輪出來，輪入臨暗仔个田間。風裡肚夾等禾穀香，還有蔥蘭淡淡个香味。𠊎兜打赤腳，感受著草下背泥个濕潤，歸隻身心都投入這場簡單个遊戲。該係𠊎童年記憶裡肚，最無煩無惱、最自然个一段時光。

到這下，逐擺若再過看著蔥蘭，總會忍毋核停下腳步。跍下來看該雪白个花，就像又行轉童年該段無玩具个日仔。該時，單靠想像就做得種出滿園个快樂；淨用一雙細手，就做得編出靚靚个夢想。該央時个快樂恁簡單，淨愛幾條花莖，就做得換來淰淰个歡聲笑語，裝淰𠊎兜歸隻純真个童年。

華語

學校旁的空地，有一大片雪白的蔥蘭。那些花像白玉那麼清雅，細細長長的葉子隨著風搖來搖去，好像在向我招手，也讓我想起童年時的生活。

當我還很小時，大部分人家生活都很清苦，沒有錢可以買玩具。就因為這樣，我們這些孩子的想像力反而特別豐富。無論是路邊的樹葉、小石頭、大人編織籃子剩下的竹片、乾枯的樹枝，或是凋謝的花瓣，都可以變成我們扮家家酒的玩具，其中最特別的就是蔥蘭。

蔥蘭是容易種植的植物，隨便種下就會成長，種幾棵就能長成一大片。它的樣子像韭菜，花梗也像韭菜花梗，梗中間是空心的。我們這群孩子，就將花梗前端的汁液捏出，再將尾端轉回插入前端，變成圓圈圈，我們叫它做「橡皮筋」。

放學後，一群孩子會互邀到空地，一起摘蔥蘭梗。摘了一堆後，我們就認真將梗前端的汁液捏出，再將尾端回轉插入前端。每個人都非常認真、非常專心，想要做出最美、最好的，不輸藝術家在雕刻藝術品。每個人先做好十條，再堆做一小堆，準備開始大戰一場。

遊戲規則簡單而公平：大家開始猜拳，贏的人先上，他會半跪半趴在地上，將嘴湊近那一堆「橡皮筋」，使勁地鼓起腮幫子，用力地吹散，吹散了幾條，那幾條就歸他所有。這遊戲考驗著每個人的肺活量與準確度，更考驗著孩子們的毅力。輸的人不氣餒，甚至會因為看到同伴那賣力到雙頰鼓起的樣子，大家還笑到全身發軟。我們邊笑邊撿起地上殘餘的圓環，接著催促著：「再來一輪！」我要贏回來。

快樂的笑聲，像風吹過風鈴，在綠色的草叢中滾出來，滾入傍晚的田間。風裡夾雜著稻穀香，還有蔥蘭淡淡芳香。我們光著腳丫，感受草下的泥土濕潤，全身心投入這場簡單的遊戲。那是我童年記憶裡，最無憂無慮、最自然的一段時光。

到現在，每當再看到蔥蘭，總會忍不住停下腳步。蹲下來看那雪白的花，好像又回到童年那段沒有玩具的日子。那時候，單靠想像，就可以種出滿園的快樂；僅用一雙小手，就可以編出漂亮的夢想。那時的快樂很簡單，只要幾條花梗，就可以換來滿滿的歡聲笑語，裝滿我們整個純真的童年。