文／劉貴櫻，客語教師、客語薪傳師，苗栗造橋客家人，這下戴新北市（四縣腔）

在日常生活裡肚，輒常無堵好就會落入同別儕比个泥竇肚。看著別儕口才好、看著別儕得著頭名、看著別儕行在頭前，心肝肚將就會起風浪，甚至開始懷疑自家个能力。過去个自家就係恁樣。逐擺看著別儕拿著獎牌，總係會有兜仔失魂。直直到有一日，阿爸同𠊎講：「耕田人毋使同隔壁田比大細，淨愛看自家个禾仔有比昨晡日較飽穗無？」這句話正講明：人生正正个對手，毋係別儕，就係「自家」。

同自家比賽，係代表一種「行向心肝肚」个智慧。每一儕出世个環境、天分都無相同，係輒常同人比，贏了容易驕傲，輸了容易失志。淨有同自家比，正會同精神放在「檢點（註1）自家」頂高。昨晡日𠊎可能連一句客話都講毋好，今晡日𠊎進步到會講一段故事；昨晡日𠊎堵著困難會想愛走，今晡日𠊎做得安靜落來面對。這種係一點一滴个進步，雖然無獎牌个鼓勵，但係當實在安心个成長。

同自家比賽，需要一種「同自己講和」个溫柔。在追求進步个過程肚，難免會跌倒還會有軟弱个時節。這就像客家傳統个藍衫，愛經過千針萬線个攣同補，正做得著著舒適長久。做得用包容个心，來看自家个不足，毋會淨一擺个失敗就放棄。每擺跌倒都係認清楚自家同重新起步个好機會。

有句諺語講：「毋驚路長，只驚志短」同自家比賽，一步一腳跡，一枝草一點露，絕對毋好放棄，係追求一種「看著自家發光」个滿足感。𫣆俚都做得同鏡子肚个自家講：「加油！今晡日愛比昨晡日較進步一息仔！」就係生命肚个第一名。行路毋使同人比遽慢，踏穩自家个腳步當重要。期望在自家个時空肚，認真打拚、快樂成長。同自家比賽，毋係去同世界爭長論短，係同自家講：「看啊！𠊎又進步了！」贏過昨晡日个自家，這就係盡好聽个生命交響曲。

（註1）檢點（giamˋ diamˋ）：引申指道德、行為上的自我約束。

華語

在日常生活中，時常不經意就會落入與別人對比的泥淖裡。看著別人口才好、看著別人得第一名、看著別人走在前面，心裡頭就會起風浪，甚至開始懷疑自己的能力。過去的我也就是這樣。每次看著別人拿著獎牌，心裡總會有些落寞。直到有一天，爸爸對我說：「種田的人不用跟隔壁的田比大小，只要看自己的稻子有沒有比昨天更飽滿？」這句話才明白：人生真正的對手不是別人，就是「自己」。

跟自己比賽，代表一種「走向內心」的智慧。每一個人出生的環境、天分都不相同，如果與人相比，贏了容易驕傲，輸了容易沮喪。唯有跟自己比，才會把精神體力放在「檢視自己」上面。昨天我可能連一句客語都講不好，今天我就進步到會講一段故事；昨天我遇到困難會想要逃跑，今天我能夠安靜下來面對處理。這種一點一滴的進步，雖然沒有獎牌的鼓勵，卻是最實在安心的成長。

跟自己比賽，需要一種「與自己和解」的溫柔。在追求進步的過程中，難免會跌倒還會有軟弱的時候。這就像客家傳統的藍衫，要千針萬線的縫和補，才能穿得舒適和長久。能夠用包容的心，來看待自己的不足，不會因為失敗而放棄。每一次的跌倒都是認清自己和重新起步的好機會。

有句諺語說：「不怕路長，只怕志短。」跟自己比賽，一步一腳印，一枝草一點露，絕對不可以放棄，是追求一種「看到自己發光」的滿足感。我們都能夠跟鏡子裡的自己說：「加油！今天要比昨天更進步一點點！」就是生命之中的第一名。走路不用跟人比快慢，踏穩自己的步伐最重要。都能在自己的時空裡，認真耕耘、快樂成長。跟自己比賽，不是去和世界爭長論短，然後告訴自己一聲:「看啊！看啊！我今天又比昨天精進了！」贏過昨天的自己，這就是最美妙最好聽的生命交響曲。