文／曾馨慧，新屋客家人，客語薪傳師、高中／國中客語支援教師，這下戴桃園市（海陸腔）

先生、先生等一下，𠊎係竹美个阿婆，這盎糟嫲愛請先生食。一行出學校大門，後背就傳來這聲，斡頭一看，一個阿婆拿等一盎糟嫲，腳步當急，面項帶等囥毋核个誠意。又講：「這糟嫲係𠊎自家做个，感謝先生摎𠊎孫女教到恁好。孫女總係歡喜靂天講，客語先生對佢當好。」聽著阿婆个聲音，緊來緊細又目汁含等，遽遽牽佢到路脣，阿婆氣急急講：「𠊎這孫女出世就兩枝手發育無好，像國小細人長度。別儕人一遍就做好个動作佢愛做十遍，別儕人寫一行字，佢正做得寫幾隻字定。上課佢總係頭犁犁捋該雙手，像菜種在硬確確个泥肚，強強愛監佢爆出芽來！」

阿婆摎糟嫲交到𠊎手項，一下仔𠊎心肝感受著，這代表个意義，毋單淨係佢个重，還較係一份責任。像人講个：禮輕情意重過山。這正經係日頭光大、爺哀恩大、阿婆个愛還較大。

這隻學生𠊎印象當深。記得第一堂上課，該兜學生一落教室，就親暱暱大聲喊：先生恁早，佢嗄企到最尾，頭犁犁行到壁角，喊佢坐頭前來，喊了又再喊，佢正畏畏羞羞行過來，也無講半句話。一直到第四隻禮拜再問佢，總算開嘴講，佢係苗栗人，阿婆最惜佢也會摎佢講客，逐擺會摸等佢開刀結疕个傷口講：竹美愛煞猛讀書哦，毋使驚，阿婆會支持你。目前佢通過初級認證咧，目標係十月份个中高級考試。

這糟嫲分𠊎想起𠊎過身个阿婆，記得細時看佢行入灶下，知講又愛做糟嫲咧。佢先摎糯米洗淨、炊熟、放分佢冷、加紅趜過後，慢慢放入醃缸肚，正摎嘴封好等紅趜發。這段日仔，做毋得急、做毋得亂，愛掌好溫度、環境，掌好一份等待个心，等到糯米轉紅開蓋，黏時鼻著空氣裡肚醹醹个酒釀羴，還有一息仔桂花香。哇！這就係阿婆个客家好味緒。糟嫲做得做糟嫲雞、糟嫲鴨、糟嫲肉，一口又一口，食到舌嫲都會吞落肚哦！

糟嫲毋單淨係食物，更加係一種生活个態度。頭擺人生活艱苦，毋敢打爽一粒米、一滴酒，糟嫲乜做得變出盡多樣菜來，這就係客家人勤儉个表現。食過个味緒會記一生人，行過个路會留腳跡。這阿婆感激个目神，分人感受著，戇阿婆惜孫仔个心。

一盎糟嫲焗出三種味緒：有阿婆灶下个歲月香、有學生打拚个堅持味、還有家長感恩个溫暖情。人講：一枝草一點露，肯打拚肯煞猛，一定會焗出屬於自家个香味。

華語

老師、老師請等一下，我是竹美的奶奶，這罐酒趜紅糟要請老師吃。一走出校門口，就從背後後傳來的聲音，轉頭一看，一位奶奶拿著一罐酒釀，行色匆匆的，臉上展露十分的誠意。接著說：「這酒釀是我自己做的，非常感謝老師對孫女的教導，現在是開朗又樂於學習，孫女總是興高採烈說，客語老師對我很好。」聽出阿婆的聲音，越來越小且帶些許哽咽，趕快牽她到路邊，阿婆上氣不接下氣的說：「我這個孫女一出生兩隻手就發育不健全，只有國小小朋友的長度。一般正常孩子一遍就能完成的動作，他卻要練習十遍。別人寫完一行字，他卻只能寫出幾個字。上課時總是頭低低搓那雙手，就像種子在硬梆梆的泥土裡，硬要它長出新芽來！」

奶奶把酒釀交到我手上，突然間讓我感受到，這代表的意義，不僅是它的重量，也是一份責任感。就像常人說的：禮輕意重。真的是太陽光大、父母恩大、阿婆的愛更大。

這位學生給我印象相當深刻。記得開學的第一天，學生們一進教室就親暱大聲說：老師早，他卻站在最後面，頭低低的走到教室角落，叫她坐到前面來，一次次喊之後，才靦腆往前，但是不肯開口說話。直到第四週後再問她，總算開口說，她是苗栗人，阿婆最疼愛她也常會和她說客家話，常摸著她開刀結巴的傷口說：竹美愛認真讀書哦，不用怕，奶奶會支持你。目前已通過初級認證，目標是十月份的中高級考試。

紅糟，讓我想起已過世的奶奶，小時候看到她走進廚房，知道又要做她最拿手的酒釀紅趜了。她先將糯米洗乾淨、蒸熟、攤涼、加入紅趜後，慢慢放入醃缸裡，再將缸口封好後等紅趜發酵。這段日仔，不能急、不能亂，要顧好溫度、環境，顧好一份等待的心，等到米粒轉紅時打開缸口，隨即在空氣中散發出濃濃的酒糟味，還有一點點的桂花香。哇！這就是奶奶的客家好味道。等入菜做紅糟雞、紅糟鴨、紅糟肉。一口接著一口，好吃到舌頭都會吞下肚了！

酒趜紅糟不單是食物，更是生活的態度。早期人們生活辛苦，不會浪費一粒米、一滴酒，紅糟也能變出多樣菜色，這就是客家人勤儉的表現。吃過的味道會永遠記住，走過的路會留下足跡。這位奶奶感激的眼神，讓人感受到，傻奶奶疼愛孫子的心情。

一缸酒趜紅糟釀出三種味道：有奶奶廚房的歲月香、有學生打拚的堅持味、還有家長感恩的溫暖情。常言道：一枝草一點露，只要肯認真用心，一定會釀出屬於自己的香味。