【寫客文】人間四月天

文／林淳華，戴台中市豐原區，學老人（大埔腔）

今年四月，苗栗縣卓蘭高中生个美術作品斯放在學校邊脣个詹冰文學故事館展覽，這擺展覽主題係「吾心肝肚逐日開出一蕊花」，在花裡肚尋著自家，連接其他人同社區，乜係社會情緒个學習。

𠊎頭一擺參觀詹冰文學故事館，日本式个屋整理當素絲，在等導覽進前，𠊎斯坐在走廊地泥項，涼風陣陣吹，𠊎愐著𠊎細漢時戴過日本宿舍，在長長走廊讀詹冰个詩，發現這位詩人當像一般人，儘採尋著稿紙、日曆紙、宣傳紙斯使得寫詩、寫文章。

𠊎乜對高中个美術教育試著有興趣，正去看展覽。堵好，堵著卓蘭高中傅校長帶緊人客來看展覽，佢講，傳統教育係培養知識同技能，現下教育係分學生有能力同勇氣去成為自家，自家乜愛溫柔同世界連結。愛仰脣成為自家？卓蘭高中美術先生羅郁惠講，佢因為讀過《人子》幽谷篇、幾米个《我的心中每天開出一朵花》，尋著結論係：自家係自家生出來个，愛學會接受無完美个自家，成為自家乜有時間性，這係佢舉辦這擺展覽个原因。

在做布花盎个過程，羅先生希望毋曉裁縫，過緊問佢个學生，自家愛上網路尋釘衫褲个影片，自家用手機解決問題。對作品翕相、變做電子檔相片，佢乜希望學生互相學習。佢愛學生送花分學校先生，較有年紀个細妹先生講：「既經當久無人送花咧。」學生送花分卓蘭个公家單位同店面展覽个時節，分學生同社區有連結。

這美術課程裡肚，乜係社會情緒學習，因為IQ使得訓練較厲害，ＥＱ乜使得用社會情緒學習來提高，比論講，寫日記反省自家，逐日規律生活來管理自家个生活，關心別儕个心情使得達著社會察覺，人同人溝通來學習社交技巧，盡尾，自家決定个事，愛自家負責。

除撇正經个花，客語還有「髻鬃花」、「笠嫲花」，髻鬃花係上隻世紀客家阿婆个形象，淰淰回憶，大埔客語諺語：「天頂跌落來笠嫲花」，係講當自由、恁快樂。這擺展覽，既經有六百外人參觀，參觀者歲數從六歲到八十六歲斯有，在這細莊頭舉辦美術展覽，有恁多人來參加，實在無簡單，乜呼應這擺美展个海報主題：「空个花盎」，使得創造無限个可能！

華語

今年四月，苗栗縣卓蘭高中生的美術作品就在學校旁的詹冰文學故事館展覽，此展覽主題是「我的心中每天開出一朵花」，在花朵中找到自我，連結他人和社區，也達到社會情緒的學習。

我第一次參觀詹冰文學故事館，日式房屋整理井然有序，在等待導覽前，我就坐在走廊地板，吹著徐徐春風，勾起我小時候住過日式宿舍的回憶。長廊展讀詹冰的詩作，發覺這位藥學詩人非常貼近常民生活，隨手拿起稿紙、日曆紙、宣傳單就可以做詩、寫文章。

其實我是對高中生的美術教育感到有興趣才去看展覽，剛好也遇到卓蘭高中傅校長帶客人來看展覽，她提到，傳統教育是知識和技能養成，現代教育是讓學生有能力、有勇氣成為自己，自己也要溫柔的和世界連結。那要如何成為自己？美術老師羅郁惠說，她因為閱讀《人子》幽谷篇、幾米的《我的心中每天開出一朵花》得到結論是：自己是長出來的；要學會接受不完美的自己；成為自己具有時效性，這也是她舉辦本次展覽的原因。

在製作布花瓶過程中，羅老師希望不會縫紉、猛問她的學生，自己上網找縫紉影片，善用手機來解決問題。在作品轉換成電子檔照片中，她也希望學生彼此互相學習，她要求學生將花朵送給學校老師，資深女老師讚嘆：「已經很久沒人送花了！」學生送花給卓蘭機構和店家展覽時，讓學生和社區有所連結。

透過這一系列的美術課程，也是一種社會情緒學習，因為ＩＱ可以訓練，ＥＱ也可靠社會情緒學習來提升，例如寫日記反省自我、規律生活達到自我管理、關心他人情緒達到社會察覺、溝通來學習人際技巧，最後，自己做的決定，自己要負責。

除了真實的花朵之外，客語還有「髻鬃花」、「笠嫲花」，髻鬃花是上一世紀客家阿婆的形象，充滿回憶，而大埔客語俗諺：「天頂跌落來笠嫲花」，則代表無比的自由快樂。這次展覽，有六百多人來參觀，參觀者從六歲到八十六歲，在小鎮辦美展有如此多人參加，確實不簡單，也呼應這次美展的海報：「空的花瓶」，可以創造無限的可能！