文／邱秀坊，客語支援先生摎客語薪傳師，係屏東客家人，這下歇板橋，感謝邱鴻春先生指導客語寫作（南四縣腔）

看到孫女雅嫚著一身雪白个衫褲，圍等紅色虎肚褡，頭那戴虎帽，腳著个虎鞋，坐在鋪等紅布个桌頂高，目珠眼盯盯仔看等桌頂項，擺淰當多个道具，有象徵未來富貴个「金元寶」，適合學者、教育家个「書本」，企業家當會扚算个「算盤」，抑係從事醫護人員个「聽診器」，摎從事演藝工作个「麥牯」等。看佢一下仔伸手摸摸書，一下仔又去摸算盤，一下仔又……。

𠊎等全家人緊張到毋敢大聲講話，目盯盯仔看嫚嫚會抓麼个？佢第一擺抓著印仔，印仔意思係會做大官，第二擺係麥牯，將來會做歌星摎音樂家，第三擺係算盤，長大後可能係會計、商業人員，對金融商業方面有興趣。雖然這單淨係一種趣味个習俗，華語講个「抓週」乜係「做對歲」，慶祝小嫚滿一歲，再來係「踏紅粄」，一腳踏富貴、一腳踏榮華，大人祝福嫚嫚平安康健長大，快快樂樂个成長，接等倈仔，心臼摎小嫚擎高高，揇越高成就越高，祝福孫女未來步步高升。

在蘆洲李屋古蹟，李友邦將軍紀念館參加這個盛會，為小嫚做對歲報到後，主辦單位在外翰文武門翕全家福相片。「敲智慧鑼」，聽這名詞就知係敲了會加智慧，由細人仔个阿爸揇等共下敲，唸等看板上个順口唸增添趣味，儀式感十足。用相機記錄歸隻過程，分家長摎細人仔留下一隻美好又無共樣个回憶。頭擺人講，細人仔愛畜到對歲正算係企穩，這庰等長輩對後輩最純真个期望。

想起還細个時節，在屏東縣竹田鄉美崙客家村長大个𠊎等，毋識有做對歲个記憶，𠊎嗄對「收涎」有深刻个回憶。該下隔壁鄰舍會揇等細孲仔，用紅絲線摎中央有孔个圓餅仔串起來，掛在細孲仔頸根，再用餅仔輕輕仔膏細孲仔个嘴，同時會講四句，希望細孲仔毋會再過流口涎水。長大後正知該下「做四月日」就係收涎，細孲仔滿四個月，做得帶出門見親戚朋友，感受民俗个可貴，承接源遠流長个歷史同文化。

這一年過到蓋遽，從頭擺正會睡目、噭眵，到這下會喊阿爸、阿姆，還會扶等壁行路，雖然帶細人仔異辛苦，但看等佢平安長大，所有个辛苦都變成甜个。

華語

看到孫女雅嫚穿著一身雪白的衣服，圍著紅色虎肚兜，頭戴虎帽，腳穿著虎鞋，坐在鋪著紅布的桌子上面，眼睛目不轉睛看著桌子上方，擺滿很多的道具，有象徵未來富貴的「金元寶」，適合學者、教育家的「書本」，企業家會精打細算的「算盤」，或者從事醫護人員的「聽診器」，同從事演藝工作的「麥克風」等。看她一下子伸手摸摸書，一下子又去摸算盤，一下子又……。

我們全家人緊張到不敢大聲說話，張大眼睛看嫚嫚會抓什麼？她第一次抓到印章，印章比喻會做大官，第二次是麥克風，將來會做歌星或音樂家，第三次是算盤，長大後可能是會計、商業人員，金融商業方面有興趣。雖然這只是一種趣味的習俗，華語「抓週」也是「做周歲」，慶祝小嫚滿一歲，再來是「踩紅龜粄」，一腳踩富貴、一腳踩榮華，大人祝福嫚嫚平安健康長大，快快樂樂的成長，接著兒子，媳婦把小嫚舉高高，抱越高成就越高，祝福孫女未來步步高升。

在蘆洲李宅古蹟，李友邦將軍紀念館參加這個盛會，為小嫚抓週報到後，主辦單位在外翰文武門照全家福相片。「敲智慧鑼」顧名思義就是敲了會長智慧，由小孩子的爸爸抱著一起敲，念著看板上的順口溜增添趣味，儀式感十足。用相機記錄全部的過程，給家長和孩子留下一個美好又不一樣的回憶。以前的人說，小孩子要養到週歲才算是站穩，包藏的是長輩對晚輩最純真的盼望。

想起小時候，在屏東縣竹田鄉美崙客家村長大的我們，不曾有抓週的記憶，我只對「收涎」有深刻的回憶。那時候鄰居會抱著小孩子，用紅絲線與中央有孔的圓餅串起來，掛在小孩子脖子上，再用餅乾輕輕塗抹小孩子的嘴，同時會說吉祥話，希望小孩子不會再流口水。長大後才知道「做四月日」就是收涎，小孩子滿四個月，可以帶出門見親戚朋友，體驗民俗的可貴，承載深厚的歷史及文化底蘊。

這一年過得真快，從以前只會睡覺、哭泣，到現在會叫爸爸、媽媽，還會扶著牆壁走路，雖然帶小孩子很辛苦，但看著他平安長大，一切的辛苦都變成甜的。