【寫客文】東勢樟腦文化同火車頭倉庫

文／林淳華，戴台中市豐原區，學老人，感謝邱文偉先生修改本文（大埔腔）

東勢有一個老地名安做匠寮，在清朝係匠師戴个寮，這位係收集做軍船个枋，對大甲河流去河口，過再用船運到臺南做軍船。先民緊在土牛界碑外倒樟樹，乜緊焗腦。古書記載，東勢角戶數增加係因為焗腦个腦丁徙到這位，日本時代進前，東勢角係盡重要樟腦集散地。若係，東勢少撇樟腦這段歷史，東勢个歷史就無完整。

民國四十八年開始使用个東勢火車頭，係世界大戰後臺灣第一個細妹建築師修澤蘭設計，火車頭有當多東勢人赴五點四十二分第一枋火車到臺中讀書个回憶，火車頭在921地動無轉撇，還借分東新幼兒實驗學校做組合屋教室上課，火車頭在舖東豐自行車道該當時，變做東勢客家文化園區，毋過，既經無原本火車頭个樣。舊年，東勢舊火車頭木造倉庫乜拆撇咧。

贌舊火車頭邊脣木造倉庫，陳列腦寮、焗腦文物十外年个寶島燻樟實業社，吳能達同吳素萍兩子爺，為著保留樟腦歷史个使命感在該撐緊，現下堵著合約到期，愛徙到別位。毋過，厥等希望使得保留這兜文物，特別係90歲个腦長吳能達根據厥印象，做出个腦寮，既經同倉庫黏共下，變做共隻建築樣，厥等希望繼續留在這倉庫裡肚。

盡尾一代个腦長厥一生起落當大，吳家三代係腦長，第一代吳景春做過東勢保正，第二代吳祿生當好額，識同埔里弓蕉賣到上海，上海人連弓蕉皮乜食落去，佢用賣弓蕉賺个錢，過買福州杉載轉臺灣賣，佢在八仙山焗檜木油同樟腦，係當時日本飛行機食个油，當時吳屋有算命仙，有電影院，後來佢坐太平輪，堵著船難，厥倈吳能達對好額人个少爺，變做工人，後來去做腦丁、做腦長，係東勢个國寶級人物。

客家諺語：「敬老得福」，毋單淨對恁多歲个腦長推廣樟腦文化愛尊敬佢，對有六十七年歷史个火車頭个倉庫乜愛保留，整好舊个愛像舊个，除撇眼前个利益，𫣆等希望未來五十年，東勢還有人記得樟腦文化，還有人知這位識有一個火車頭。

華語

東勢有一處老地名為匠寮，在清朝是匠師居住的工寮，這裡是收集製作軍船的木材，收集的木材隨大甲溪漂到下游，再利用船運運到臺南製作軍船，先民利用在土牛界碑之外砍木，也製作樟腦，古書記載，東勢角此地的戶數因製腦者移入突然增加，日治時代以前，東勢角已經是重要樟腦集散地。如果東勢少了樟腦這段歷史，東勢歷史就不足以完整。

民國四十八年啟用的東勢火車站，是由臺灣戰後第一女建築師修澤蘭所設計，這裡有許多東勢人趕五點四十二分第一班火車到臺中讀書的回憶，車站在921地震沒倒，還借東新幼兒實驗學校作為簡易教室，車站在打造東豐自行車道時，改為東勢客家文化園區，但已失去原來車站面貌了，東勢火車站木構倉庫去年也被拆除兩座。

已經承租舊火車站木構倉庫擺放腦寮、腦炊文物十多年的寶島燻樟實業社，吳能達和吳素萍都是靠保留這段樟腦歷史的使命感在硬撐，如今卻面臨合約已到，必須遷移。不過，他們希望能夠保留文物，尤其是90歲腦長吳能達憑其記憶製作腦寮，都已經和倉庫合為一體，希望繼續保留在倉庫內。

末代腦長身世也相當傳奇，吳家三代都是腦長，第一代吳景春是東勢保正，第二代吳祿生富甲一方，當時曾經將埔里香蕉賣到上海，上海人連香蕉皮都吃，再把大陸收到的錢，買福州杉木載回台灣賣，吳祿生在八仙山提煉檜木油及樟腦，是二戰時飛機燃料油，當時吳家有算命仙，有電影院，後來吳祿生乘坐太平輪罹難，吳能達從富家少爺淪為小工，後來當腦丁、腦長，算是東勢的國寶級人物。

客語俗諺：「敬老得福」不只是對高齡腦長推廣樟腦文化要尊敬，對有六十七年歷史的火車站的倉庫也要保留，修舊如舊，除去眼前利益，我們希望未來五十年，東勢還有人記得樟腦文化，還有人知道這裡曾有一個火車站。