文／吳佩瑩，屏東客家人，客委會與屏東客家中心說故事老師（四縣腔）

有一擺，因爭參加講故事研習个機會，拿著一本繪本，書名安到《恁久好無？安娜！》。本旦認為這係一本蓋普通个故事，無想著看忒這本書過後，嗄分𠊎認識「巴色差會」這個宗教組織，同時乜了解佢等對客家語言有仰般分毋開个關係，佢等係客家文化有大貢獻个恩人。

巴色差會（Basel Mission），1815年成立在瑞士北部个巴色城，1847年派下兩位傳教士來到中國廣東个客家地區。佢等行入山林壁壢角个聚落，帶等異鄉人登真个精神，深入民間學習客語，嗄在該無意間，成就了客語文化摎語文个偉大工程。在該個「方言」無麼个得人重視个時代，這兜傳教士深刻感受著語言係行入一個族群靈魂个主要路徑。故所，佢等毋單淨係去聽、去講客話，甚至當辛苦仔去做語言紀錄个工作。

佢等用羅馬拼音系統，一字一音摎口耳相傳个客家話，轉做做得寫、做得讀个「客語白話字」。這種个做法分聖經有了客語个版本，還過盡重要个，係佢等摎客家文化保存仔最原始个、最烏个音韻同語法。故所，𠊎做得恁樣講：若係無巴色差會這兜傳教士編寫个《客英大辭典》，大家今晡日可能盡難認識著百年前客家人真實个用語仔，撿採係無佢等留下來个語料紀錄。客家文化流傳到這下，乜可能早就像日頭晒露水樣仔，一𥍉目就消忒仔。

另外，佢等對客語个重視還推廣著教育領域，佢兜開辦學校、推動女子受教育个平等權利，分客家文化个生命力在知識个淋水下變到過較堅耐。續等，在𠊎讀著《恁久好無？安娜！》過再一擺个時節，就親像跌入時光个暗窿裡肚感受著牧師摎牧師娘佢等个熱誠。感謝佢等个煞猛，正分𠊎兜个客家文化毋會過淨伸著片段个山歌同口語，顛倒係變做蓋有條理、蓋有系統个記載吔。

這本因為參加培訓課程正得著个繪本，分𠊎這個客家後輩對母語个推廣同文化保留產生了一個過較堅定个使命感。𠊎愐著這份行過近兩百年異鄉人送个禮物，就係在該講分𠊎兜聽：識有一群天使係仰仔用心守護客家文化，𠊎等就應該嶄蠻珍惜摎佢繼續傳承下去吔。

華語

有一次，因為參加說故事研習的機會，拿到了一本繪本，書名叫做《恁久好無？安娜！》。本來以為這是一本很普通的故事，沒想到看完這本書之後，竟然讓我認識了「巴色差會」這個宗教組織，同時也了解他們對客家語言有著密不可分的關係，他們是對客家文化有著極大貢獻的恩人。

巴色差會（Basel Mission）在1815年成立於北瑞士的巴色城，1847年派遣兩位傳教士來到中國廣東的客家地區。他們走入偏僻山林的聚落，帶著異鄉人認真踏實的精神，深入民間學習客語，卻在無意間，成就了客家文化及語文的偉大工程。在那個「方言」不太受人重視的時代，這些傳教士深刻感受到語言是走入一個族群靈魂的主要路徑。因此，他們不僅僅是去聽、去講客話，甚至還不辭辛勞地投入語言紀錄的工作。

他們應用羅馬拼音系統，一字一音把口耳相傳的客家話，轉換成可以寫、可以讀的「客語白話字」，這樣的作法讓聖經有了客語版本。更重要的，是他們為客家文化保存了最原始、最道地的音韻與語法。因此可以這樣說：如果沒有巴色差會這些傳教士編寫的《客英大辭典》，大家今天可能很難認識到百年前客家人真實的用語；如果沒有他們留下來的語料紀錄，客家文化流傳到現在也可能早就跟太陽曬乾露水一樣，一眨眼就消失了。

另外，他們對客語的重視還推廣到了教育領域。他們開辦學校、推動女子受教育的平等權利，讓客家文化的生命力在知識的澆灌下變得更加堅強。然而，當我再次讀到《恁久好無？安娜！》的時候，我彷彿穿越時空並且感受到牧師與牧師娘他們的熱忱。感謝他們的勤奮努力，才讓我們的客家文化不會只剩下片段的山歌和口語，反而是變成具有條理、有系統的記載了。

這本因參加培訓課而獲贈的繪本，讓我這個客家後輩對母語的推廣與文化保留產生了更堅定的使命感。我想著這份走過將近兩百年前異鄉人贈予的禮物似乎在告訴我們：曾經有一群天使用心守護著客家文化，我們應該十分珍惜地把它繼續傳承下去啊！