文／黃麗芬，苗栗客人，現下戴臺北市，現職係客語薪傳師、客語教學支援先生（四縣腔）

前一駁仔，黃仁勳該句「You need to learn Taiwanese.」引起大家个關心同討論。該央時，𠊎想著另外一隻問題：假使這個帶領全球人工智慧浪潮个人，看著今晡日个客家，會想著麼个？

佢看著个，可能毋係桐花祭、花布、擂茶同老街，該兜都係客家个文化符號，嗄無一定係決定客家未來个關鍵。企在AI時代个視角來看一隻較重要个問題，應該係：客家，準備好行入未來个世界了吂？

長期以來，𫣆講客家，長透談保存、傳承同復振。毋過，當人工智慧漸漸仔變成知識生產、資訊傳播同日常生活个重要工具時，𫣆更加愛思考个係：客語做得分AI理解無？客家文化行得入未來个數位世界無？

今晡日个細人仔透過手機仔得著資訊、透過網路學習知識、乜透過AI尋答案，係講AI聽毋識客語，看毋著客家文化，該客語在未來世界肚个能見度同影響，定著受著限制。若係一種語言無法度行入數位世界，佢無定著會跈等毋見忒，嗄可能漸漸仔退出下一隻世代个生活場域。

值得安慰个係，客家無缺席。

近年來，當多教育工作者、研究人員同科技團隊投入客語數位化工作，比論講「客語AI共創平臺」，透過客華雙向翻譯、語音辨識、語音合成、AI對話學習同語料共創這兜功能，客語當在該一步步行入人工智慧个世界。

這兜看起來單淨係技術開發，實際上係在為語言爭取未來。當大型語言模型做得理解客語，細人仔做得同客語AI自然互動，世大人个故事做得分數位保存還過傳承分下一代，科技保存个就毋單淨係資料，顛倒係一隻族群个文化記憶。

對黃仁勳个AI思維來看，佢可能毋會問客家保存了幾多文物，顛倒會問：客家累積了幾多个數位資料？培養了幾多跨領域个人才？建立了幾多做得分下一代繼續使用客語个創新應用？因為在AI時代，保存雖然重要，畀使用過較重要。唯有繼續分人使用个語言，正做得在未來生存下去。

有人愁慮科技會分傳統文化更加邊脣化。毋過𠊎相信，正經有價值个科技，毋係取代文化，係延續文化；毋係分世界變到單一，而係分無共語言同文化都做得分人看著。

係講黃仁勳看著今晡日个客家，𠊎希望佢看著个，毋係一隻等等畀保護个文化，係一隻肯同科技合作、運用AI開創未來个族群。

無定著有一日，當客語做得自在个在數位世界肚生存，𫣆乜做得帶等自信對下一代講：「You need to learn Hakka.」。毋係因為客語會毋見忒了，係因為佢值得畀傳承；毋係因為懷念過去，係因為佢共樣有行向未來个權利。

AI當在該改變世界，𫣆客家，乜愛在AI个未來號著一隻位仔。

今晡日个科技，天光日个客家。

華語

前一陣子，黃仁勳那句「You need to learn Taiwanese.」引起大家的關心和討論，那個時候，我想到另一個問題：如果這位引領全球人工智慧浪潮的人，看見今天的客家，會想到甚麼？

他看見的，可能不是桐花祭、花布、擂茶與老街，那些都是客家的文化符號，卻未必是決定客家未來的關鍵。站在AI時代的視角來看一個更重要的問題，應該是：客家，準備好進入未來的世界了嗎？

長期以來，我們談客家，常談保存、傳承與復振。然而，當人工智慧逐漸成為知識生產、資訊傳播與日常生活的重要工具時，我們更要思考的是：客語能否被AI理解？客家文化走得進未來的數位世界嗎？

今天的孩子透過手機獲取資訊、透過網路學習知識、也透過AI尋找答案，如果AI聽不懂客語，看不見客家文化，那麼客語在未來世界中的能見度與影響，勢必受到限制。若一種語言無法進入數位世界，它未必立刻消失，卻可能逐漸退出下一個世代的生活場域。
值得欣慰的是，客家並沒有缺席。

近年來，許多教育工作者、研究人員與科技團隊投入客語數位化工作，比方說「客語AI共創平臺」，透過客華雙向翻譯、語音辨識、語音合成、AI對話學習與語料共創等功能，客語正一步步走進人工智慧的世界。

這些看似只是技術開發，實際上是在為語言爭取未來。當大型語言模型能理解客語、孩子能與客語AI自然互動、長輩的故事能被數位保存並傳承給下一代，科技保存的便不只是資料，而是一個族群的文化記憶。

從黃仁勳的AI思維來看，他或許不會問客家保存了多少文物，而會問：客家累積了多少的數位資料？培養了多少的跨域人才？建立了多少能讓下一代持續使用客語的創新應用？因為在AI時代，保存固然重要，被使用更重要。唯有持續被使用的語言，才能在未來生存下去。

有人擔心科技會讓傳統文化更加邊緣化。但我相信，真正有價值的科技，不是取代文化，而是延續文化；不是讓世界變得單一，是讓不同語言與文化都能被看見。

如果黃仁勳看見今天的客家，我希望他看見的，不是一個等待被保護的文化，而是一個願意和科技合作、運用AI開創未來的族群。

或許有一天，當客語能自在地在數位世界裡生存，我們也能帶著自信對下一代說：「You need to learn Hakka.」。不是因為客語快消失了，是因為它值得被傳承；不是因為懷念過去，是因為它同樣擁有走向未來的權利。

AI正在改變世界，我們客家，也要在AI的未來占到一個位子。

今天的科技，未來的客家。