文／張春燕，桃園市龍潭人，有客語教支人員資格，這下戴大溪，邱鴻春先生指導客語寫作 （四縣腔）

春天來哩！舊年種个山桔仔，開出細細仔个花苞，一時間湧起一陣講毋出个歡喜，乜想起該段山桔仔个往事。

吾手機仔有一隻群組，有一駁仔就會有人在群組傳一句：恁久無見面，尋隻時間共下食飯哩。𠊎兜就會約時間共下打鬥四，譫誃歸晝邊。

該日阿珍仔，在車肚擐隻菜籃下來，裡肚有幾下包青黃色細細仔个果子，該係佢自家菜園種个山桔仔，帶來做等路，還興蹀蹀仔教大家，轉去愛仰般打果汁，還講做料理乜有盡好个味緒。𠊎心肝肚想阿珍仔恁會嗙雞胲，看該兜青里里仔个果子，一滴仔都毋打眼，還阿腦到會企起來。

食飽後，六儕人又去吾姪仔開个咖啡廳，阿珍仔乜送一包山桔仔分姪仔，姪仔順手將山桔仔，融入咖啡肚調做「西西里咖啡」請大家啉，該央時𠊎啉第一口該下，就黏時分該特別个味緒，有層次个香氣深深餳著。毋係一般檸檬做得調出來个，係一種特別又再特別个風味，會分人目珠擘到大大隻，心肝肚浮現一隻想法，原來，𫣆人做毋得，單淨用外表去判斷東西个價值，若無親身體驗，無法度了解佢个全貌。

到尾，𠊎將這新發現，分享分另外一個朋友，無想著佢目䁯䁯看等𠊎，嘴翹翹仔講：「吾姆種盡多山桔仔，舊年就問你愛無，係你自家搖頭無愛啊！」一時間𠊎嗄戇忒去，企等呆呆無話好應，心肝肚懊惱！原來，𠊎早就同這份美好，相閃身錯過，完全係因為自家眼淺，認為這細細仔个果子，毋值得花時間多看佢一下！

包尾在網路查資料，正知山桔仔，係台灣个原生種，營養價值係普通檸檬个三十倍。台灣人毋識貨，無受著重視，外銷日本後大受歡迎，正紅轉台灣來，重新分台灣人接納。𠊎愐想，自家係毋係，長透看毋著這兜平凡个存在，正經个好，早就在自家脣項，恬恬仔等待𫣆俚用心去發現。

這擺个教訓，分𠊎有深深个感受，𫣆人長透因為主觀、成見，少忒盡多接觸新事物个機會，毋多知仔，嗄用外表來論斷東西个好壞。這下看著後院當開个山桔仔花，心肝肚有淰淰个感謝，感謝佢未來帶來个果子，毋單淨係做得摎清香入菜，更加係一份珍貴个人生覺醒——毋好因為成見，遮忒𫣆个目珠。

華語

春天來了！去年種的山桔，開出小小花苞，心頭湧起一陣莫名的歡喜，也想起那段山桔子的往事。

我的手機有一個群組，間隔一陣子就會有人在群組傳訊息：好久沒見面了，找個時間一起聚餐吧！接著大夥兒就會約時間一起吃飯、閒聊一個下午。

那天阿珍在車上拎著一個菜籃下來，裡面有幾包青黃色小小的果子，那是她自家菜園種的山桔子，阿珍帶來做禮物，還興致勃勃教大家，回去要怎樣做果汁，還說山桔做料理也會有很好的味道。我心想阿珍還真會吹牛，那些看起來酸不溜丟，一點都不起眼的小果子，還稱讚到會站起來似的。

吃過飯，六個人又去我姪兒開的咖啡廳，阿珍也送一包山桔子給姪兒，姪兒馬上把山桔子，加入咖啡調製成「西西里咖啡」請大家喝，我喝下第一口時，霎時被那種味道特殊，又有層次的香氣深深吸引。它不是一般市面上的檸檬，可以調出來的，它是一種特別又再特別的風味，會讓人睜大眼睛感到意外的。我心裡浮現一個想法，原來我們不能，單憑外表去判斷東西的價值，如果沒有深入體驗，無法洞察它的全貌。

後來，我把這新發現，分享給另外一個朋友，沒想到她瞪著我，翹起嘴巴說：「我媽種很多山桔樹，去年就問你要不要，是你搖頭不要啊！」霎時我愣住了，呆站著無言以對。心裡好生懊惱！原來，我早就跟這份美好，錯身而過，完全是因為自己短視，認為這小小的果子，不值得花時間多看它一眼！

最後我在網路查資料，才知道山桔樹，是台灣原生種，營養價值是普通檸檬的三十倍。台灣人不識貨，不受重視，外銷日本後卻大受歡迎，才紅回台灣，重新被台灣人接納。我心想，自己是否，時常看不到這些平凡的存在，真正的好，早就在自己身邊，靜靜地等待我們用心去發現。

這次的教訓，讓我深深體會，人們經常因主觀、偏見，失去很多接觸新事物的機會，在不自覺中，落入以貌取「物」的陷阱。現在看著後院盛開的山桔花，心裡盡是感謝，感謝它未來帶來的果子，不單是可以清香入菜，更是一份珍貴的人生覺醒——不要因為偏見，遮住我們的眼睛。