文／黃美貞，臺北市光復國小老師，苗栗客家人，這下戴台北市（四縣腔）

熱天一到，日頭烈到像愛摎大地熇燥共樣。這種天時，假使做得食著一盤冰冰涼涼个竻瓜，毋單淨嘴肚清爽，連心肝乜會涼加幾下分。

屋下个菜園種了幾下頭竻瓜，逐朝晨，阿姆就擐等菜籃去瓜棚下巡，看著藤仔項吊等一條一條浸青（註1），又滿身細竻个竻瓜，就笑咪咪講：「暗晡夜又有好食咧！」阿姆講，種菜愛有耐心，日日淋水、挲草、巡園，正有好收成，等到開花，花謝忒開始打子，一日過一日慢慢大，到收成个時節，日日都有竻瓜好摘，日日都有豐收个歡喜。

料理竻瓜个方式當多，醃生（註2）係盡簡單个，頭擺个人生活較省儉，竻瓜用水洗淨，切做一截一截拋鹽，等佢略略仔出水，就做得兜上桌。食起來鹹鹹、脆脆、涼涼，越食越熱嘴。若係收成較多，阿姆就做醃瓜，摎鹽、糖、醋放共下滷，滷幾日仔，無論食粥、傍飯抑係傍麵，都當合味。這種老時味，食著个毋單淨係好滋味，還有細人仔時節个幸福回憶。

這駁仔，𠊎又學著一種新食法。看等網路影片，一步一步學做竻瓜冷盤。先摎竻瓜磡磡啊，再切做一口个大細，放一息仔鹽撚勻，等佢出水，續下來放切碎个蒜頭、辣椒仔、糖、烏醋、香油，最尾再掞兜白麻仔。放入冰箱冰一下，拿出來該下，一陣酸酸甜甜个香味直直鑽入鼻公，還吂食著，口涎水就溚溚跌。

第一擺做，𠊎心肝肚還有一息仔緊張，毋知好食抑毋好食。阿姆挾一塊放嘴肚，笑等講：「毋會輸外背賣个！」聽著這句話，𠊎心肝肚比食著還較甜。原來，科技毋單淨分人查資料、看影片，還做得分𠊎學著新手藝，摎屋下人分享自家親手做个好味緒。

又有一擺，人客送來一罐日本米醬，就用日本人个食法，摎竻瓜切做長條，直接搵米醬食。米醬个鹹香摎竻瓜个清甜，兩樣當合味。雖然食法簡單，滋味嗄十分豐富。原來，一條竻瓜，毋單淨食得出客家个老時味，乜做得嘗著日本式个風味。

一條竻瓜雖然看起來平常，毋過對古早个滷鹹淡、到這下个醃生、蘸米醬，逐樣食法都代表一種生活智慧。係換一個角度思考，平凡个竻瓜，傍平凡个米醬，乜做得變出分人想毋著个好味緒。

註釋

（註1）浸青：音jim qiang；形容非常青綠的樣子。

（註2）醃生：音iamˊ sangˊ；用鹽略醃，使食材出水、入味。

小黃瓜的百變滋味

夏天一到，太陽猛烈得像要把大地烤焦一樣。這種天氣，如果能吃到一盤冰冰涼涼的小黃瓜，不只嘴裡清爽，連心裡也會涼快幾分。

家裡的菜園種了幾株小黃瓜  ，每天早晨，媽媽就提著菜籃到瓜棚下巡視。看見藤上吊著一條一條翠綠、又滿身細刺的小黃瓜，就笑咪咪地說：「今晚又有好東西吃了！」媽媽說，種菜要有耐心，每天澆水、除草、巡園，才會有好收成。等到開花，花謝了開始結果，一天過一天慢慢長大，到了收成的時候，每天都有小黃瓜 可以摘，每天都有豐收的喜悅。

料理小黃瓜的方式很多，「鹽生」是最簡單的。以前的人生活比較節儉， 小黃瓜用水洗乾淨，切成一段一段，加鹽醃一下，等它稍微出水，就可以端上桌。吃起來鹹鹹、脆脆、涼涼的，越吃越涮嘴。如果收成比較多，媽媽就做醃瓜，把鹽、糖、醋放在一起，醃上幾天，無論配粥、配飯還是配麵，都很對味。這種古早味，吃到的不只是好滋味，還有小時候的幸福回憶。

最近，我又學到了一種新的吃法。看著網路影片，一步一步學做小黃瓜冷盤。先把小黃瓜拍裂，再切成一口大小，放一點鹽抓勻，等它出水，接著放入蒜末、辣椒、糖、烏醋、香油，最後再撒些白芝麻。放進冰箱冰一下，拿出來的時候，一陣酸酸甜甜的香味直往鼻子裡鑽，還沒吃到，口水就直流。

第一次做，我心裡還有一點緊張，不知道好不好吃。媽媽夾了一塊放進嘴裡，笑著說：「不會輸外面賣的！」聽到這句話，我心裡比吃到嘴裡還要甜。原來，科技不只讓人查資料、看影片，還能讓我學到新的手藝，和家人分享自己親手做的好滋味。

又有一次，客人送來一罐日本米醬，就用日本人的吃法，把 小黃瓜切成長條，直接蘸米醬吃。米醬的鹹香和小黃瓜的清甜，兩種味道很相襯。雖然吃法簡單，滋味卻十分豐富。原來，一條小黃瓜，不只能吃出客家的古早味，也能品嘗到日式的風味。

一條 小黃瓜雖然看起來平常，但是從古早的醃菜，到現在的涼拌、蘸米醬，每一種吃法都代表一種生活智慧。如果換一個角度思考，平凡的小黃瓜，配上平凡的米醬，也能變化出讓人意想不到的好滋味。