詔安腔｜魔法的秘密 (十三)

O.S

前提概要：幾時強尼先生和馬戲團團長，兩儕攏係自細即相信有魔法，這點，得強尼先生下決心，愛鬥相共這個新朋友，得佢个動物伴會用得人好好對待，毋過等到天光了後，團長即愛去巡查局報到，這個暗夜，佢人兩儕鬥底攏在講麼个？得人得人擱拁聽落去！

團長女兒

阿怙、阿叔暗安，阿叔今日勞力你拁𠊎人鬥相共。

強尼先生

細漢妹子暗安！

強尼先生

團長，𠊎想討請問你後臺，像獅子、又像老虎个跳跳係仰子一回事？敢講你毋知走私野生動物係犯法个？

馬戲團長

事情毋係你想个恁！遐係𠊎少年時，猶吂做團長个事…。

團長爸爸

咿哦！後生擱麻煩你拁這兜傢伙頭載去後一個鄉鎮，阿怙等下隨跈來。

馬戲團長

阿怙無問題！

馬戲團長

欸？路上仰子有一隻著傷个小鹿？

O.S

少年時，團長正係單純拁阿怙个馬戲團駛大貨車个後生子人，毋過無論行到哪位，在路攏會䀴著有著傷个動物。

馬戲團長

唉，苦憐个小鹿，供活大家並毋係一件真困難个事，哪個馬戲團毋係有歸大陣伴咧？𠊎拁你渡轉屋下供。

O.S

即恁，團長著面撿、著面供動物，拁貨車當做大家个屋下。團長這兜事，強尼先生聽到頭那足疾！

強尼先生

𠊎知啊，其實你本性並毋會䆀，毋過，你正知用自家个方法去愛動物，嗄毋知，愛有時嘛會隨來傷害，你好心拁著傷个動物撿轉來，嗄無時間䀴望，得佢救轉來个動物，鬥底過著仰子个生活！像你供个貓頭鳥食到傷大箍，所以兩支腳骨斷去毋會飛，正飼弓蕉个猴，營養歸下毋罅，這兜攏係傷害啊！

馬戲團長

這…

強尼先生

恁跳跳又係仰子一回事咧？

馬戲團長

跳跳係𠊎接收別個破產馬戲團个動物，在前一個馬戲團，跳跳得人提來做搖錢樹，逐暗夜，愛拖疾疾个後腳上臺表演。為著佢个康健打算，𠊎無擱安排佢表演。毋過跳跳特別个外表，恬恬會餳觀眾偷偷走去後臺，對佢擊銀角仔講係討下願，久了後嘛為馬戲團隨來一小筆收入…。

O.S

團長越講越心虛，佢無感覺自家有做毋著，毋過斡頭䀴，即像強尼先生講个共款，佢做个逐個決定，得逐隻動物个膴身和心攏著傷。

強尼先生

正係馬戲團老虎逃走早即係歸國个大新聞，若係得人發現，團長恁多年來，供个動物攏無得著好个照顧，團內猶有一隻獅虎，大家會仰子想咧？

馬戲團長

𠊎、𠊎毋知自家仰子會行到這步，毋知講正係想討得馬戲團順利經營，仰子會堵著恁多个難題。

強尼先生

唉，時間暗啊，人猶係先歇睏，韶日正擱討論啦！

O.S

天甫光，團長即愛去巡查局報到，為佢做个歸下事情負責任，正係，敢有擱較好个方法抑係人，會用鬥相共團長安搭遐兜無辜个動物咧？想討知遐兜動物朋友落來會仰子，定著愛擱準時收聽哦！人後次擺空中再見！