大埔腔｜魔法的秘密 (十二)

O.S

馬戲團肚个老虎小愛竟然對舞臺面頂走撇了！細鎮肚个人(愁勞博激)，馬戲團團長還較心焦，在這個時節，強尼先生向團長伸出友誼个手，希望使得𢯭佢順利尋轉小愛，厥等使得做到無？分恩等續緊聽落去！

警察

(大聲公)各位鎮民請注意 、各位鎮民請注意，馬戲團 个老虎走撇，請大家在屋家 毋好青驚勞碌、記得關窗門

小朋友A

啊!老虎在該片。

O.S

無一下那，幾下臺巡查車停在十字路口中央个大路脣，將老虎小愛圍囥來。看着一陣惡擎擎个人類，着驚个小愛同身體伏低低、低聲同人吼。

警察

大家毋使驚！吾等會趕緊同這隻老虎麻醉。

強尼先生

巡查先生先等下！

O.S

話正講啊撇，強尼先生斯搶巡查手項射出个麻醉手銃，用奇術，將銃子變做靚靚个紙花掖在天頂。

小朋友A

強尼先生你發癲了係無？

小朋友B

哇！強尼先生正經係吾等鎮肚盡俊傑个奇術師！竟然使得變出恁精彩个奇術！

O.S

毋單淨強尼先生煞猛分老虎小愛離開困難環境，團長个妹，手項拿核平常時小愛盡好食个東西，嘴輕輕唱出佢從細盡愛聽个搖籃曲，試試慢慢行偎佢。

團長女兒

小愛，𠊎知你盡乖了，恩等轉屋家好無？

路人甲

哇！若等看老虎耶！還酷哦！𠊎愛翕相上傳網路定著會上熱門！

O.S

大家手項个翕相機晟目个光，嚇着小愛舂出巡查車同歸陣个人个包圍，像風共樣在街路頭緊飆。小愛走啊走.走入火車頭，甚至順緊樓梯走入月臺鐵支路，頭一擺看着老虎个坐車个人同賣票个人嚇着歸身緊顫。

路人乙

救命啊！鐵支路項有老虎！

馬戲團團長

小愛乖，𠊎知你盡聽話了，恩等乖乖轉屋家好無？

團長女兒

強尼先生，你看！阿爸行在鐵支路項个樣，親像空中飛人！

強尼先生

這下煞鼓壞撇咧!。(死皺蛤蟆皮咧)，小愛可能從今以後，毋會過再相信任何人類了。

馬戲團團長

佢無傷到人！無分任何人著傷

O.S

因致麻醉藥小愛當死睡，分拖拉庫載去動物保育中心，團長掊開擠淰淰个人，跈在後背，緊想同小愛講好話。

警察

團長先生，假使這隻老虎傷到人該斯不得了咧，吾等還愛問清楚，若這兜野生動物到底對哪來个?

強尼先生

巡查先生，這下天色既經當暗了，使得先分馬戲團團長同團員，先在吾屋家待一夜，等天光，你正對厥等問話沒？

警察

這…好哪，𠊎看厥細妹乜著驚，嚇到咧，大家斯先歇一夜哪。

強尼先生

忒好咧！勞瀝你！團長你先莫噭，恩等遽遽貫精神，共下愐清問題，想看看有法度來補這個差錯沒。

馬戲團團長

你講个著，𠊎無忒多時間傷心。

O.S

斯恁泥，一大棚人，轉到無觀眾、無神氣个馬戲團布篷。遠遠看過去布篷斯像一粒凹凹个彩色大球，孤栖企在大草坪項。

強尼先生

先莫講這咧，團長，𠊎當好奇，你識聽過，在這世間向，有存在真个魔法無？

馬戲團團長

當然聽過啊，吾奶同𠊎講，單淨相信个人正使得看着。毋過，這下準講有魔法，乜無法度救小愛同馬戲團个運命…。

強尼先生

無毋著！單淨相信个人正看得到！

O.S

強尼先生當暢，這還係佢頭一擺聽着有人相信魔法个存在，若係厥兩儕在還細个時節斯堵着對方，相信厥等定著使得變做對方个好朋友！經過這簡單个問答，強尼先生相信，自家使得打開心胸，𢯭團長救厥个動物朋友脫離危險環境。到底強尼先生愛仰脣𢯭漯落危機个馬戲團？小愛个運命又會仰脣呢？所有關心動物个大小朋友，分恩等續緊準時收聽，過同親愛个動物朋友祈禱！