海陸腔｜魔法的秘密 (十二)

O.S

無想著馬戲團裡背个老虎小愛，對舞台頂偷走咧！鎮上个人心肝無落無著，馬戲團團長還較會急死，這時節，強尼先生向團長伸出友情个手，希望做得幫忙佢順利尋轉小愛，佢兜做得著無？ 俚繼續來聽下去！

警察

(放送頭)各位鎮民請注意、各位鎮民請注意，馬戲團个老虎偷走出去咧，請大家在屋下毋好慌張、門摎窗門愛關核。

小朋友A

啊！老虎就在該位！

O.S

過一下仔，幾下輛警察車停在中央大路个十字路口旁脣，一圈一圈摎老虎小愛圍起來。看著歸群無好意个人類，小愛受著驚嚇斯放低身體、低聲對人群盡嘶。

警察

大家毋好驚！𠊎兜會盡量遽遽摎這條老虎麻醉。

強尼先生

警察先生先等一下！

O.S

一講啊忒，強尼先生當煞手搶著警察手項打麻醉个銃仔，用奇術，摎銃子變做花喇嗶剝个紙花跌落下來。

小朋友A

強尼先生你發癲咧係無？

小朋友B

哇！強尼先生正實係俚鎮上最湛斗个奇術師！無胚著會變出恁精彩个奇術！

O.S

毋單淨強尼先生，煞猛分老虎小愛脫離困難个環境，團長个妹仔，手項拿等平常小愛最好食个東西，嘴項輕輕唱等佢從細最好聽个搖籃曲，想愛慢慢偎兼佢。

團長女兒

小愛，𠊎知你一等乖，俚來去轉好無？

路人甲

哇！你兜看有老虎耶！還湛喔！𠊎愛翕像傳到網路頂高，定著會當受歡迎！

O.S

大家手項个翕相機發出當強个白光，嚇著小愛飆過一層一層包圍个警察車摎人群，像風共樣在街路頭狂飆。小愛走啊走走落火車頭，甚至還順等樓梯走落去月臺、火車路，頭一擺看著老虎个人客摎賣票員嚇到歸身激激顫。

路人乙

救命啊！火車路有老虎！

馬戲團長

小愛乖乖，𠊎知你最聽人講，俚乖乖來去轉好無？

團長女兒

強尼先生，你看！𠊎爸行在火車路頂高个樣仔，當像空中飛人！

強尼先生

這下壞忒咧，小愛今過怕毋會再過相信任何个人類咧。

馬戲團長

佢無傷害人！無害著麼人著傷！

O.S

小愛因為麻醉藥嗄睡到當落覺，分人扛上拖拉庫載去動物保育中心，團長𢱤

開尖尖揫个人群，在後背跈等，緊觸觸想愛替小愛講話。

警察

團長先生，係講這條老虎傷著人還得直，𠊎兜還愛問清楚，你這兜野生動物到底對哪位來个

強尼先生

警察先生，這下已經斷烏咧，做得先分馬戲團團長摎團員佢兜，先在𠊎屋下過夜一暗晡，等天光，您正來盤查佢兜好無？

警察

恁樣…好啦，𠊎看厥妹仔也著驚著，大家就先歇睏一暗晡好啦。

強尼先生

還好喔！感謝您！團長你先吂愛噭咧，俚愛趕緊打起精神來，共下分析問題，想想看有麼个辦法補救這隻錯誤。

馬戲團長

你講个著，𠊎無昶多時間好傷心。

O.S

就恁樣，一群人轉到無觀眾、恬索索無元氣个馬戲團布篷。遠遠看啊過去个布篷，就像一隻氣漏淨淨个彩色大皮球，孤孤栖栖企在大草坪頂高。團長：強尼先生，承蒙你摎局長求情，分𠊎做得在你屋下暫戴一暗晡，以前𠊎對你个態度恁壞，你還願意恁樣做，正經非常承蒙哦！團長女兒：承蒙阿叔！

強尼先生

先莫講這咧，團長，𠊎一溜里來就試著當好奇，你識聽過，這隻世界上，有正實个魔法無？

馬戲團長

當然有聽過呀，𠊎婆摎𠊎講，就係愛有相信个人正看得著。毋過，這下就算有魔法，也無法度救小愛摎馬戲團个命運…。

強尼先生

無毋著！斯愛相信个人正看得著！

O.S

強尼先生歡喜靂天，這還係佢第一擺聽著有人相信魔法个存在，係講佢兩儕在細細个時節就熟識，相信佢兜定著做得做好朋友！通過這隻簡單个一問一答，強尼先生相信，自家做得打開心胸，幫助團長救佢个動物朋友脫離危險个環境。到底強尼先生愛仰般𢯭手跌落危機个馬戲團？小愛个命運又會仰般形呢？所有關心動物个大小朋友，俚繼續來準時收聽，為親愛个動物朋友祈禱！