四縣腔｜魔法的秘密 (十二)

O.S

前提概要：馬戲團肚个老虎小愛竟然對舞台上走忒了！小鎮上个逐儕人都驚到面瀝青，膽都嚇爛忒，馬戲團團長還較係急死了，在這個時節，強尼先生 向團長伸出了友誼个雙手，希望做得𢯭手佢順利尋轉小愛，佢兜敢做得到？分兜繼續聽下去！

警察

(大聲公 )各位鎮民請注意、各位鎮民請注意，馬戲團个老虎逃走，請大家在 屋下毋好慌張、愛記得同窗門關好。

小朋友A

啊！老虎就在該片！

O.S

就一下仔个時間，幾下臺警察車仔停在大路中央个十字路口脣，將老虎小愛包圍起來。看著一群惡豺豺仔个人類，著驚个小愛放低身體、低聲向人群噦嘶。

警察

大家莫驚！𠊎兜會趕早同這條老虎麻痺。

強尼先生

警察先生做得等一下仔無！

O.S

話還吂講忒，強尼先生既經同警察手項發出个麻醉銃搶下來，用奇術，同銃子變到燦爛个紙片花散落在天頂。

小朋友A

強尼先生你發癲了係無？

小朋友B

哇！強尼先生果然係俚鎮項最傑出个魔術師！竟然做得變出恁精彩个奇術！

O.S

毋單淨強尼先生煞猛分老虎小愛脫離困境，還有團長个妹仔，手項拿等平常時小愛最好食个食物，嘴肚輕輕仔啦歌哩曲佢從細 最好聽个搖籃曲，打算愛慢慢仔行兼佢。

團長女兒

小愛，𠊎知你盡乖了，兜轉屋下好無？

路人甲

哇！你兜看有老虎欸！盡威風哦！𠊎愛翕相上傳到 網路定著會有當多人看个！

O.S

大家手項翕相機緊𥍉个刺目白色光，嚇到小愛衝出 警車仔同人群个包圍，像風共樣个在街路項緊飆。小愛飆啊飆飆入火車頭，甚至順等梯排走入了月臺軌道，頭一擺看著老虎个旅客佢兜同售票員嚇到歸身緊顫。

路人乙

救命啊！軌道項有老虎！

馬戲團長

小愛乖，𠊎知你最聽話了，兜乖乖轉屋下好無？

團長女兒

強尼先生，你看！阿爸行在軌道項个樣仔，親像空中飛人！

強尼先生

這下壞蹄了，驚怕小愛對這過後，再也毋會相信任何人類了。

馬戲團長

佢無傷害人！無分任何人著傷！

O.S

因爭麻痺藥仔个關係睡到當入覺个小愛，分人放上拖拉庫愛載去動物保育中心，團長掊開極極个人群，跈在後背，急等打算愛為小愛來辯護。

警察

團長先生，係講這條老虎 有傷到人該還會得直，𠊎兜還係愛問清楚，你這兜野生動物到底係哪位來个

強尼先生

警察先生，這下天色既經 當暗了，做得先分馬戲團 團長同團員佢兜，先轉吾屋下歇一暗晡，等天光了，你正來對佢兜進行偵訊好無？

警察

這…好啦，𠊎看厥妹仔乜 有著驚著，大家就先歇一夜啦。

強尼先生

忒好了！感謝你！團長你 先莫噭了，兜愛趕緊打起精神來，共下想清楚問題，愐看啊有法度彌補這隻錯誤無。

馬戲團長

你講个著，𠊎無忒多時間 好傷心。

O.S

就恁樣，大自家一群人，轉到了失去觀眾、無活力个馬戲團，帳篷遠遠看過去，就像一粒漏風个彩色 大皮球仔，孤栖个企在大草坪項。

強尼先生

先莫講這個了，團長，𠊎一直試著當好奇，你識聽過，這個世界項，存在吔正經个魔法無？

馬戲團長

當然聽過啊，吾婆同𠊎講，淨有相信个人正做得看著。毋過，這下就算有魔法，乜無法度救小愛同馬戲團个命運 …。

強尼先生

無毋著！淨愛相信个人正看得著！

O.S

強尼先生歡喜靂天，這還係佢頭一擺聽著有人相信 魔法个存在，若係佢兩儕 在做細人仔該下就堵著對方，相信佢兜定著會變成對方个好朋友！透過這個簡單个問答，分強尼先生相信，自家做得打開心胸，𢯭手團長救厥動物朋友脫離險境。到底強尼先生愛仰仔𢯭手陷入危機个馬戲團？小愛个命運又會係仰仔呢？所有關心動物个大人細子朋友，分兜繼續準時收聽，為親愛个動物朋友佢兜祈求！