詔安腔｜魔法的秘密 (十一)

O.S

前提概要：強尼先生細漢時屋下供過比賽个粉鳥，因為毋盼得辛苦比賽个鳥比賽時著傷甚至死去，大漢了後个佢，盡力做一個愛護動物个魔術師，拁愛分享嘛傳得大家，接落來故事會仰子發展咧？得人擱拁聽落去！

強尼爸爸

小強尼啊，𠊎幾希望你會用和𠊎共款，得人屋下个粉鳥，直直在比賽內提著頭等。

小強尼

毋，阿怙，𠊎嘛無討擱傷害麼个動物啊！後下𠊎討做一個魔術師，猶擱無哪個動物，會因為𠊎个魔術表演來著傷。

強尼爸爸

哈哈哈，這毋係一件輕可个事，你阿怙係真期待你會仰子做哦！

O.S

大漢了後个強尼先生，總係斟酌个定期渡大家去病院做健康檢查，下晝時務，大家會和佢作垺在坪炙炙日頭、做一下運動，得大家充分个運動和罅多个營養。

團長女兒

阿叔，你在想麼个啊？表演恁精彩，你仰子在起戇神？

強尼先生

啊！𠊎仰子會在這時務，想起細漢時个事咧？啊，𠊎知啊，因為𠊎總感覺，你阿怙團長和𠊎有共款个心，𠊎人攏在迷觀眾笑聲个魔力，相信這個世間，有無法度想像个魔法，因為恁佢擇魔術，團長擇馬戲團，𠊎人兩儕之間，其實並無真大个差別啊！

O.S

想通這點了後，得強尼先生不得不恁想，恁，團長鬥底係仰子个人咧？佢和自家頭大个無共又係麼个？

強尼先生

你阿怙真無簡單，企在大家頭前表演，遐毋係一件簡單个事，屎肚內，不時有一萬隻蝶仔在飛，猶恬愛為著票賣了䆀睡毋會去，毋過啊，若係𠊎人聽著大家个掌聲和笑聲，歸下个辛苦攏無算麼个啊啦。

團長女兒

阿叔，你和𠊎怙講个事共款共款呢！佢講準講表演真辛苦，毋過猶係想討企在舞臺崠，享受這種甜甜个福氣！

強尼先生

係哦？

O.S

馬戲團表演到一半，布篷內，好定泥傳來一臨老虎个喝咻聲。

團長女兒

壞啊！小愛起性地啊。

O.S

䀴著老虎小愛，一步步逼偎跌坐在泥下个團長，臺下个觀眾笑無歇睏。

路人甲

哈哈哈，這會毋會係團長挑持安排好个笑料啊？

路人乙

即係毋！佢存心討䀴大家驚著一下，𠊎人正無恁好惑！

團長女兒

正毋係！這毋係小愛普通時个表現，𠊎愛較緊拁擋正會用。

O.S

妹子想討傱起去臺崠安搭小愛，嗄得強尼先生擋蹛，人類好定泥个動作，恬恬會驚著動物，這個時務恬落來䀴正係頭好个做法。

馬戲團長

小愛乖，𠊎係阿怙啊！你擱䀴斟酌下，毋好受氣，𠊎對你猶係一隻細隻老虎，供你供到這滿啊！𠊎一溜毋盼得用皮鞭摔你，嘛無對你大細聲喝，你仰子起恁大个性地咧？

馬戲團長

啊，𠊎知啊，你係毋係無想討跳火圈？哎呀，毋過觀眾頭佮意䀴老虎跳火圈，這係為著餳大家來䀴表演啊，你乖，阿怙等下飼你食肉，好無？

路人甲

緊走！遐隻老虎走落舞台，討拁人咬啊！

路人乙

阿依哦！

馬戲團長

這下𠊎壞啊。若係消息傳出去，馬戲團个名聲即會敗去，評價全然䆀，嘛無人會擱來䀴表演啊。

強尼先生

毋使緊張，緊捎過去！事情定著有法度解決！

O.S

布篷內个觀眾，因為老虎小愛偷走去，歸場攏係吱吱咈个喊聲，對後臺傱向前个強尼先生，嗄對團長先生伸出友誼个手，拁佢遐雙嘟嘟顫、冰冰冷冷个手揢核。

O.S

鬥底，強尼先生和團長，敢會用順利拁老虎小愛捎倒轉？小愛个運命又會仰子咧？得人擱準時收聽，作垺關心老虎小愛落來會仰子！