大埔腔｜魔法的秘密 (十一)

O.S

強尼先生還細个時節屋家 畜過比賽月鴿，因致毋盼得辛苦比賽个月鴿在比賽著傷甚至死撇，大漢了後个佢，煞猛變做一個愛護動物个奇術師，同愛分享並傳落去分大家，續落來古會仰脣發展呢？分吾等續緊聽落去 ！

強尼爸爸

細強尼啊，𠊎真希望你使得同𠊎共樣，分恩等屋家肚个月鴿陣，繼續在賽鴿比賽肚打頭名。

小強尼

無愛（moiˊ），阿爸，𠊎沒想過傷害任何動物！下次擺𠊎愛變做一個奇術師，無任何動物，會因致吾奇術表演來著傷 。

強尼爸爸

哈哈哈，這毋係一件簡單 个事，阿爸當期待你會仰脣做哦 ！

O.S

大漢了後个強尼先生，總係細心細膩定期帶大家去醫院做健康檢查，下晝時頭，大自家會同佢共下在禾埕曬日頭花、做兜運動，分大家有充分个運動同滋養 。

團長女兒

阿叔，你在想麼个啊？表演恁精彩，你仰脣在發琢愕？

強尼先生

啊！𠊎仰會在這个時節，想到細漢之時个事呢？啊，𠊎知了，因致𠊎總係感覺到，若爸團長同𠊎有共樣个心，吾等總迷迷癡癡在觀眾个笑聲魔力，相信這世間項，存在想毋着个魔法，所以𠊎擇奇術，團長擇馬戲團，吾等兩個人，其實無忒大个爭差！

O.S

想通這點了後，強尼先生想，恁泥，團長到底係仰脣个一

個人呢？佢同自家盡無共樣又係麼个？

強尼先生

若爸無恁該，企在大家面前表演，毋係一件簡單个事，頭腦肚，長在有一萬隻蝶在飛，還愛輒輒為著票賣來毋好睡毋落覺，毋過啊，單淨吾等聽著大家个掌聲同笑聲，所有个辛苦都無算麼个。

團長女兒

阿叔，你同吾爸講个話共款共款耶！佢講準講表演已辛苦，毋過還係想企在舞臺項，享受這種甜蜜个幸福呢！

強尼先生

有影無?

O.S

馬戲團表演到一半，布篷肚，好恬恬傳來一陣老虎 在吼个聲

團長女兒

壞了！小愛發性咧 。

O.S

看着老虎小愛，一步步接近跌倒坐在地泥个團長，臺下个觀眾極極滾笑無停。

路人甲

哈哈哈，這敢係團長挑挑安排好个弄笑橋段哪？

路人乙

斯係啊！佢存心想看大家 著驚下呢，吾等正無恁好 騙！

團長女兒

正毋係！這毋係小愛平常時 个表現，𠊎愛遽遽擋佢正使得。

O.S

細阿妹想舂上臺安慰小愛，嗄分強尼先生一下斯攔落來，人類好恬恬停動，盡會嚇着動物，這个時節恬恬觀察正係盡好个辦法 。

馬戲團團長

小愛乖，𠊎係阿爸啊！你看較真兜，毋好譴，𠊎對你還係一隻細老虎，斯畜你畜到今啊！𠊎從來毋盼得用皮鞭拌你，乜毋識對你大細聲，你仰脣起恁大个性體呢？

馬戲團團長

啊，𠊎知了，你係毋係無想跳火圈？哎哦，毋過觀眾盡好看老虎跳火圈，這係為着餳大家來看表演个做法啊，你較乖兜，阿爸等下飼你食肉，好無？

路人甲

遽遽走！該隻老虎走落舞臺，愛咬人了 ！

路人乙

阿姆哀唷！

馬戲團團長

這下𠊎壞撇咧。(死皺蛤蟆皮咧) 單淨消息一傳出去，馬戲團个名聲斯會打落地，評價一瀉千里，乜無人會過來看表演了。

強尼先生

無相干，遽遽逐着來！事情 定著有辦法解決！

O.S

布篷肚个觀眾，因致老虎小愛逃走，嘰嘰嘎嘎个聲這片響該片起，對後臺傱上前个強尼先生，嗄對團長先生伸出友誼个手，握核厥該雙緊顫.顫無停、冷擠擠个手。

O.S

到底，強尼先生同團長，使得順利逐老虎小愛轉來無？小愛个運命又係仰脣呢？分恩等續緊準時收聽，共下關心老虎小愛个下落