海陸腔｜魔法的秘密 (十一)

O.S

強尼先生細時節，屋下畜過比賽个月鴿仔，因為毋盼得辛苦个月鴿仔在比賽當中著傷甚至死忒，佢大了後，煞猛做一個愛護動物个奇術師，摎愛傳出去並分享分大家，續下來故事會仰般發展呢？亻恩俚繼續來聽下去！

強尼爸爸

細強尼啊，𠊎仰般希望你做得摎𠊎共樣，分亻恩俚屋下个月鴿仔，繼續在比賽當中打頭名。

小強尼

無愛，阿爸，𠊎毋想再過傷害任何个動物！下二擺𠊎愛做一個奇術師，還過無哪隻動物，會因為𠊎个奇術表演著傷。

強尼爸爸

哈哈哈，這斯毋係一件簡單个事，阿爸斯當期待看你會仰般做哦！

O.S

強尼先生大了後，總係細心細義定期渡大家去醫院做健康檢查，下晝个時間，大家會摎佢共下在庭院曬一下日頭、做一下運動，分大家有充足个運動，也有飽足个營養。

團長女兒

阿叔，你在該想麼个啊？表演恁精彩，你仰在該發啄呆？

強尼先生

啊！𠊎仰會在這時節，想起細細該下个事呢？啊，𠊎知咧，因為𠊎總係試著若團長阿爸摎𠊎有共樣个心情，𠊎兜全係分觀眾笑聲个魔力迷著，相信這世界上，有分人想毋解个魔法，所以選擇奇術，團長選擇馬戲團，𠊎兩儕之間，其實無麼个昶大个差別啊！

O.S

想通這點以後，強尼先生忍毋核个想，恁樣，團長到底係仰般形个人呢？佢摎自家最大个差別又係麼个？

強尼先生

若爸當無簡單，企在大家面前表演，該斯毋係一件簡單个事，頭腦裡背，時常有一萬隻蝶仔在該飛，還愛長透為著票賣著毋好嗄睡毋落覺，毋過啊，只愛𠊎兜聽著大家个掌聲摎笑聲，所有个辛苦都毋算麼个。

團長女兒

阿叔，你摎𠊎爸講个話共樣共樣耶！佢講就算表演當辛苦，還係想企在舞臺頂，享受這種甜滋滋个幸福呢！

強尼先生

係無？

O.S

馬戲團表演到一半，布篷肚，忽然間傳來一陣老虎个嘶胲聲。

團長女兒

壞忒咧！小愛發性咧。

O.S

看等老虎小愛，一步一步逼兼坐在地泥个團長，臺下个觀眾緊哈哈滾笑無停。

路人甲

哈哈哈，這應當毋係團長挑挑安排好个一齣笑科啊？

路人乙

斯係啊！佢挑挑想愛看大家著驚啦，亻恩俚正無恁好騙！

團長女兒

正毋係呢！這毋係小愛平常个表現，𠊎愛遽遽阻擋佢正做得。

O.S

細妹仔想跋上臺頂安慰小愛，嗄分強尼先生攔等，人類突然間个動作，最容易嚇著動物，這時節愛恬恬觀察正係最好个做法。

馬戲團長

小愛乖乖，𠊎係阿爸啊！你再過詳細看加下，毋好發閼，對你還係一條細老虎个時節，𠊎就畜你畜到這下啊！𠊎從來毋盼得用皮鞭仔打你，也毋識對你大聲喊，你仰會發恁大个脾氣呢？

馬戲團長

啊，𠊎知咧，你毋想跳火圈係無？哎唷，毋過觀眾最好看老虎跳火圈，這係為著餳大家來看表演个演出啊，你乖乖，阿爸等一下飼你食肉，好無？

路人甲

遽遽走喔！該條老虎跳下去舞台，愛咬人咧！

路人乙

阿姆哀喔！

馬戲團長

這下𠊎慘咧。係講消息傳啊出去，馬戲團个名聲就會受著打擊，名聲係一落千丈，斯無人會再過來看表演咧。

強尼先生

毋好緊張，遽遽追過去！事情定著有辦法解決！

O.S

布篷裡背个觀眾，因為老虎小愛偷走，滿哪仔都係嘶胲另命个聲，對後臺拚上頭前个強尼先生，嗄對團長先生伸出友情个手，握等佢該雙顫毋停、冰冰冷冷个手。

O.S

到底，強尼先生摎團長，做得順利追轉老虎小愛無呢？小愛个命運又會變仰般呢？亻恩俚來繼續準時收聽，共下關心老虎小愛走到哪位去！