詔安腔｜魔法的秘密 (十二)

O.S

前提概要：馬戲團个老虎小愛嗄對舞臺崠走去啊！鎮上个人大家心攏無安定，馬戲團團長擱較係心頭著急，在這個時務，強尼先生對團長伸出友善个雙手，希望會用拁佢鬥相共順利尋轉小愛，佢人敢有法度咧？得人得人擱聽落去！

警察

（大聲公）各位鎮民請注意、各位鎮民請注意，馬戲團个老虎走去啊，請大家在屋下毋使驚、愛記得拁門窗關好勢。

小朋友A

啊！老虎即在遐！

O.S

無一下子，幾下臺巡查車歇在中央車路个十字路口脣，拁老虎小愛圍圍蹛。䀴著歸陣歹意个人類，打著驚个小愛膴身俯落、低聲對歸大陣人喝。

警察

大家毋好驚！𠊎人會較緊拁老虎麻醉。

強尼先生

巡查先生請等一下！

O.S

講時慢，遐時緊，強尼先生拁巡查手頭个麻醉手銃，用魔術，變做靚靚个紙花在空中飛。

小朋友A

強尼先生你敢係在起𤞚？

小朋友B

哇！強尼先生正額係人鎮上頭慶个魔術師！嗄會用變出恁精采个魔術！

O.S

係正有強尼先生打拚得老虎小愛脫離困境，團長阿女，手頭提小愛普通時頭佮意食个食物，嘴底輕輕哼佢自細頭愛聽个搖籃歌，想討寬寬行偎佢。

團長女兒

小愛，𠊎知你頭乖啊，人轉屋下好無？

路人甲

哇！你人䀴有老虎呢！足厲害个！𠊎討翕相傳去網路定著會真多人愛䀴！

O.S

大家手頭个翕相機發出真強个白光，驚到小愛傱出巡查車和歸陣人个包圍，像風共款在街路頭拚命傱。小愛走啊走走入火車頭，甚至順樓梯走入月臺鐵枝路，第一擺䀴著老虎个大家和賣票人員驚到嗶嗶掣。

路人乙

救命啊！鐵枝路有老虎！

馬戲團長

小愛乖，𠊎知你頭聽事啊，人乖乖轉屋下好無？

團長女兒

強尼先生，你䀴！𠊎怙行在鐵枝路面上个形，足像空中飛人！

強尼先生

這下壞啊，驚講小愛對這滿起，嘛毋會擱相信人類啊。

馬戲團長

佢無傷害人！嘛無得麼个人著傷！

O.S

因為麻醉藥嗄來睡到落眠个小愛，得人車起去卡車載對動物保育中心去，團長𢳪開尖核核个人，跈在後背，急討為小愛講情。

警察

團長先生，假使這隻老虎傷著人遐哪會直，𠊎人猶愛問清楚，你這兜野生動物鬥底對哪位來个？

強尼先生

巡查先生，這滿嘛真暗啊敢會用先得馬戲團个團長和團員，先在𠊎屋下隔一夜，等天光，你正擱拁佢人查問咧？

警察

恁…好啦，𠊎䀴佢个阿女嘛掣一大下，大家即先歇睏一夜啦。

強尼先生

足好个！勞力你！團長你先莫唩，人愛攔緊振作起來，作垺了解問題，想䀴望敢有法度修補這個毋著。

馬戲團長

你講个著啦，𠊎無幾多時間在艱難。

O.S

即恁，大家一陣人，轉到失去觀眾、無活力个馬戲團布篷，布篷遠遠䀴過去，即像一粒消風个彩色大皮球，孤孤單單企在大草坪。

強尼先生

先莫講這個團長，𠊎一直真想討知，你敢識聽講過，這個世間，有正經个魔法無？

馬戲團長

當然聽過啊，𠊎媽拁𠊎講，相信个人正䀴會著。毋過，這滿準講有魔法，嘛無法度救小愛和馬戲團个未來…。

強尼先生

無毋著！相信个人正䀴會著！

O.S

強尼先生全然歡喜，這猶係佢第一擺聽著有人相信魔法，若係佢兩儕在細子時即相堵著，相信佢人一定會用變做好朋友！透過這個簡單个問答，得強尼先生相信，自家會用打開心門，鬥相共團長救佢个動物脫離險境。鬥底強尼先生愛仰子鬥相共陷入危機个馬戲團咧？小愛个運命又會係仰子咧？逐個關心動物个大細朋友，得人擱準時收聽，拁親愛个動物朋友祈禱！