2022-08-19：下午13點新聞

原客青少年3對3籃球比賽恢復報名个消息
客家委員會摎全台灣８著縣市合作，推出促進族群和諧个「原客青少年3對3籃球賽」，其中臺南場會先在10月15（拜六）這日在臺南市新營區風雨籃球場，鬧熱開打！不過，臺南市政府客家事務委員會提醒，台南場个比賽，報名期限只到9月19為止，請大家愛遽遽來報名，也歡迎國中國小个學生以做得用學校為單位，組隊來參加。客家委員會表示，這次个「原客青少年3對3籃球賽」，規則做得「開放跨學校還有跨縣市報名」，打間學校男女組作得分別報三隊，每沙請做得報名一隊，每隊上限人數係5沙，其中愛有2沙係原住民(平埔)籍還有1沙係客家籍个選手，另外打隊愛組成5沙到10沙个啦啦隊，鼓勵參賽選手家人、親戚、朋友共下組成啦啦隊，摎選手加油。假使有報名成功，參賽个隊伍就做得拿到紀念籃球兩粒、參賽个球員每沙也做得領到一輛籃球衫、啦啦隊員也做得領到一輛加油个衫。另外，成績前4名个隊伍，也會領到參賽獎金，啦啦隊伍也會有最佳創意、最佳人氣還有團隊精神這斗獎項。這次籃球賽个總獎金有7萬2千塊，其中國小組个冠軍獎金有5,000塊，國中組个冠軍獎金有7,000塊，歡迎全台灣國中、國小个學生，遽遽來報名原客青少年3對3籃球比賽。
接下來關心110年國人平均壽命80.86歲个消息

內政部公布110年簡易生命表，國人平均壽命係80.86歲，其中男性係77.67歲、細妹係84.25歲，男、女性平均壽命係歷年第二高个水準，假使用直轄hod-市分布，台北市84.17歲係最長壽，內政部表示，長期觀察，國人平均壽命係呈現拔高个情況。
內政部表示，世界各國全部凍重視生命表个編算，因為國民平均壽命係衡量國家基本健康評估、整體社會經濟福祉還有國家競爭力評比个重要統計指標，所以內政部打年會有編算生命表，提供政府有關人口政策、人力規劃、衛生保健這斗參考還有學術研究用途，鄉親也做得拿來參考。
天時消息
中央氣象局表示，今補日還有稍早係出日頭个熱天，東部高溫會到38度，山上還有部分平地當晝過後會落風時水，到下禮拜三以前，全台灣全部係熱天高溫个情形，提醒鄉親出外愛喝家斗水無好歙到。