2022-12-19 : 上午11點新聞

阿根廷PK大戰粉碎法國衛冕夢　拿着世界盃第3隻冠軍

阿根廷摎法國今晡日在卡達世界盃腳球賽、冠軍戰延長賽結束以3比3戰成打平過，阿根廷在PK大戰以4比2得勝，係在1978年、1986年過後，經過36年恁久个時間，阿根廷拿着隊伍歷史上世界盃腳球賽第3隻冠軍，阿根廷个全國民眾都暢到奈毋得，其中守球門个門將馬蒂內茲攔下關鍵个1球，分法國衛冕个夢想粉碎。

這也係35歲个阿根廷球星梅西（Lionel Messi）第5度叩關世界盃，在卡達世界盃腳球賽最尾一場比賽。佢成功帶領「藍白軍團」打贏法國，為自家最尾一場世界盃腳球賽个旅程拿着最好个成果。

天時資訊

中央氣象局表示，今晡日日時頭起勢寒流漸漸仔減弱，氣溫慢慢仔回升，推算北部摎東北部个高溫大概15度到18度，其他地區19度到23度，各地日夜氣溫還係偏低。

落水方面，因為大氣環境較燥，單淨基隆北海岸摎東北部地區有局部短暫雨，大台北、東部摎東南部地區有零星短暫雨，其他地區係好天到多雲。

根據環保署空氣品質預報資訊指出，今晡日寒流漸漸仔減弱，環境風場係東北東風，竹苗以北位在迎風面，擴散條件當好；中部以南位在下風處，污染物較容易累積。

竹苗、宜蘭、花東空品區摎馬祖、金門、澎湖係「良好」等級；北部、中部、雲嘉南、高屏空品區係「普通」等級。