2022-01-28：下午13點新聞

鄉親大自家好 歡迎收聽今哺日三分鐘新聞 厓係西湖个蘇佑昇

首先來關心民間企業捐贈BNT預防射全部到臺灣个消息

中央流行疫情指揮中心表示，台積電、鴻海還有慈濟，三間企業捐贈分臺灣个BNT預防射，全部到台灣了，昨補日朝晨到台灣个BNT係捐贈个最尾第十七批BNT預防射91萬8千4百劑，指揮中心表示，台積電、鴻海還有慈濟捐贈分臺灣个預防射做盡有1千5百萬支，感謝台積電、鴻海還有慈濟个藤手，政府也會加速分全台灣个鄉親做得注射到預防射，得到完整个保護力。

另外，指揮中心也提醒大家，從1月25到2月初7，全國維持第二級警戒，請大家還係愛做好防疫措施，戴好嘴暗兒，鄉親出外坐車，像係高鐵、台鐵火車全部做不得食東西，另外，結婚請人客做不得敬酒。

指揮中心也宣布，昨補日無確診病例過身，無過昨哺日新增64例確診，其中有21沙係本土病例，43沙係從國外轉來个病例，這43沙分別有15沙係坐飛行機進境台灣檢查出來、28沙係防疫旅社隔離期間檢驗出來，目前臺灣確診人數做盡來到1萬八千5百66沙，過身个人數也來到851沙。

指揮中心指揮官陳時中表示，目前本土疫情變嚴重，請鄉親盡量不好去人多个所在，出外也一定愛戴好嘴暗兒。

另外，因為全世界Omicron个疫情變動嚴重，美國只一日就增加超過1百萬沙个確診病例，日本一日也增加超過6萬沙个病例，所以指揮中心拜託大家愛遽遽去注射第三支預防射，增加自家个身體保護力。

最尾來關心過年天時个消息
中央氣象局表示，過年期間全臺灣个天時，從1月29到2月初4，會先冷才轉燒暖，北部、東半部這幾日全部會落水，中南部个天時前幾日會略略兒落水到尾係好天時；年29、初一、初二3千公尺以上个高山有機會落雪。

提醒鄉親，過年期間，全台灣个溫度最冷會到12度，請鄉親過年期間愛著卡燒暖，出外也愛記得著水衣還有帶傘兒。