2021-11-18：下午1點新聞

首先來關心金哺日開放注射兩種不共樣預防射意願登記个消息

中央流行疫情指揮中心表示，金哺日朝晨10點到下晝4點，開放注射兩種不共樣預防射个方案意願登記，指揮中心表示，這次開放注射兩種預防射个條件，

係第一支注射az預防射个鄉親，最快在11月底以前，做得開放第15期个鄉親，選默德拿還係bnt來注射第二支預防射。

指揮中心也提醒18歲以上、有注射過第一支預防射个鄉親，愛遽遽去注射第二支預防射，AZ注射超過8个禮拜、默德拿超過4个禮拜、BNT超過4个禮拜个鄉親，全部做得去注射第二支預防射。

接下來，指揮中心也公布，早先有注射一劑還係兩劑高端預防射个鄉親，假使愛出國，不過愛出過个國家，毋承認高端預防射，

鄉親做得拿注射高端个證明文件、飛行機个票，苟去注射AZ、默德拿、BNT預防射，毋過指揮中心建議，注射第三支預防射个時節，愛摎高端疫防射相隔28日以後。

另外，指揮中心也提醒，有注射過兩劑高端預防射、毋出國需求个鄉親，就不使苟注射第三支預防射。

接下來關心台灣疫情个消息

中央流行疫情指揮中心表示，昨哺日臺灣毋增加本土確診病例，毋過有增加5沙國外轉來个病例確診，這5沙國外轉來个病例係在入境檢驗發現確診，

另外，昨補日毋增加確診病例過身，目前臺灣做盡有1萬6千503沙確診，848沙過身，指揮中心表示，雖然目前臺灣疫情變穩定，毋過全國第二級警戒，還係愛從11月16延長到11月29，請大家愛做好防疫措施，戴好嘴暗兒。

另外，指揮中心也提醒，下著月12月14開始，從國外轉來个鄉親，做得開始選三種个21日隔離措施，有注射過2支預防射个鄉親，就做得選卡輕鬆省錢个方案，這著方案係7日自費防疫旅社、7日居家隔離、7日自主健康管理。

 

最尾來關心今哺日天時个消息

中央氣象局表示，因為東北季風變強，今哺日彰化以北還有東半部个宜蘭花蓮會落水，

另外，全台灣个溫度也會降5度上下，今哺日个高溫北部還有東部係22度到24度、中南部係25度到29度，

這個落水天時會持續到稍早，到了拜六，東北季風開始變弱，全台灣會轉成出日頭个好天時，鄉親做得把握拜六、拜日个好天時，出門寮。