2021-11-26：下午3點新聞

首先渡大家來關心國道1號高架專用个第一座楊梅休息站在年底啟用个相關消息

交通部高速公路局表示，國道1號楊梅休息站係國道1號高架專用个第一座休息站，會在年底來啟用，也係用頭擺舊个收費站辦公廳舍空間、重新起過个休息站。

楊梅休息站係3層樓个建築，造型設計按照「天圓地方」个概念，3棟便所个外型，係模仿客家圓樓个意象，屋頂圓形个天窗係用最自然个方式來採光摎通風，

達到儉能減碳；在天井个位所、種植物來綠化，分鄉親感受自然摎安寧。

 

續下來關心桃園市新地標 乙未保台紀念公園在今晡日啟用个相關消息

桃園市平鎮區「一八九五乙未保台紀念公園」，經過兩年零个工期，在今晡日啟用，開園活動摎平鎮褒忠祠二百三十周年慶典、乙未客家戰役文化季、平鎮藝術節，對今晡日起勢到11月28共下來舉辦，傳承客家義民精神。

桃園市客家事務局局長黃傅淑香表示，今晡日下晝兩點，在平鎮褒忠祠，會為來自全國各地三十零間个義民廟敬奉个義民爺來安座慶祝，像有新竹縣新埔褒忠亭義民廟、雲林縣北港義民廟；

韶早下晝个重頭戲「㧡擔奉飯遶街遊行」，隊伍當派頭个經過復旦路二段到環南路，重現義民保鄉衛土个犧牲摎奉獻，到時公園附近个道路，會有交通管制，請鄉親多加配合警察疏導通行。

 

最尾來關心台北101雙跨年系列活動登場个相關消息

台北101今晡日表示，今年台灣經濟表現打眼，盡多企業表明態度、願意贊助+施放跨年天花炮，不單淨時間有機會超出3百秒，雙跨年季活動從11月25到明年2月22，

橫跨耶誕節、跨年、舊曆過年還過正月半，一共有30隻花燈造景摎耶誕打卡个位所，另外，台北101還邀請雕塑大師楊英風、楊奉琛兩姊爺，用「希望」為主題，摎台北101打造變成公共藝術地標。