大埔腔｜魔法的秘密 (十三)

O.S

原來強尼先生同馬戲團團長，兩個人總下從細斯相信魔法个存在，這點，分強尼先生煞煞決定，愛𢯭這個新朋友，分厥動物伴使得分人好好對待，毋過等天光了後，團長斯愛去派出所報到，這暗晡，厥兩儕到底在講兜麼个呢？分恩等續緊聽落去！

團長女兒

阿爸、阿叔暗安，阿叔今晡日真勞瀝，感謝你同吾等𢯭手。

強尼先生

細阿妹暗安

強尼先生

團長，𠊎想請問你後臺，又像獅、又像老虎个跳跳係仰脣來个？你敢毋知走私野生動物係犯法个？

馬戲團團長

事情毋係像你想个恁泥！該係𠊎後生時，還吂做團長个事…。

團長爸爸

嘿咻！倈過麻煩你同這兜道具同𠊎載去下一個鄉鎮，阿爸等下斯跈去。

馬戲團團長

阿爸無問題！

馬戲團團長

咦？路項仰脣有一隻著傷个細鹿？

O.S

後生个時，團長單淨係單純同阿爸經營个馬戲團駛大貨車个後生人，毋過無論行到哪，過路時都會看着路項有動物著傷。

馬戲團團長

唉，衰過个細鹿，畜大家毋係一件忒困難个事，哪個馬戲團毋係有一大陣伴呢？𠊎同你帶轉屋家畜哪？

O.S

斯恁泥，團長一片拈、一片畜動物，同貨車準做雙方个屋家。團長這話，分強尼先生聽去頭那當疾！

強尼先生

𠊎知咧，其實你本性無歪，毋過，你單淨曉得用自家知个方法去愛動物，嗄毋知，下把乜會帶來傷害，你好心同著傷个動物拈轉來，嗄無時間看，分你救轉來个動物，到底過麼个樣个生活！像你畜个貓頭鳥食忒大箍，變做雙腳斷骨飛毋停動，單淨飼猴弓蕉，歸身營養毋罅，這兜總下係傷害啊！

馬戲團團長

這…

強尼先生

該跳跳又係仰脣來个呢？

馬戲團團長

跳跳係𠊎接收一個橫撇个馬戲團過來个動物，在上個馬戲團，跳跳分人拿來做搖錢樹，逐暗晡，都拖緊疾个後腳上臺表演。為着厥个康健，𠊎正無安排佢表演。毋過跳跳特別个外表，輒輒會惹觀眾偷瀉入後臺，同用銀角擲佢講係愛許願，越來越久乜同馬戲團帶來一細筆收入…。

O.S

團長緊講緊心虛，佢沒感覺著自家做毋著，毋過斡過頭看，斯像強尼先生講个，厥个每一個決定，分逐隻動物身體同心肝肚都帶緊傷。

強尼先生

單淨馬戲團老虎偷走撇既經係全國个大新聞，係分人發現，團長恁多年來，畜恁多動物全無受著好个照顧，團肚還有一隻獅老虎，大家會仰脣想呢？

馬戲團團長

𠊎、𠊎毋知自家仰會行到這步，無了解做麼个單淨想分馬戲團順利經營落去，仰會堵着恁多難題。

強尼先生

唉，時間已暗，恩等還係先歇困，天光日正討論

O.S

天一光，團長愛去派出所報到，同佢做个事情負所有个責任，毋過，敢有較好个方法或者麼人，使得𢯭團長安排該兜無辜个動物伴呢？想知該兜動物朋友到底愛去哪，定著愛續緊準時收聽哦！恩等下次擺空中見！