饒平腔｜魔法的秘密 (九)

O.S

當時強尼先生堵到馬戲團團長个妹子，兩儕人煞開始拗嘴，做麼有時快樂會係一項毋錯个事情？到底馬戲團團長係堵著麼个樣个事情，正分佢變做這種樣像呢？亻恩過來聽落去。

O.S

馬戲團團長享受著像海浪樣个熱烈拍手聲。

馬戲團長

看哪！𠊎訓練个動物表演受到大家恁熱烈个歡迎，斯干若𠊎仰斯想毋到，做麼大家對奇術師个催眠恁著迷呢？敢講佢等無認為該係一齣失敗个表演嗎？唩，毋係一項當悲傷个事咩？做麼个大家夏流等目汁又笑笑拍手？哎呀！毋當插佢咧！暗夜觀眾个笑聲分𠊎威風神又梟掰！斯干若戴等紅鼻落，過大个問題乜無問題，顛倒係心色个遊戲！

O.S

這央時个團長，目珠肚和心肝度斯干若一个目標，該斯係渡大家行入一个完全無共款个世界，享受著馬戲團蓬肚正會發生个奇妙時刻。

團長女兒

阿叔你看！續落來𠊎爸愛表演空中行鋼索哦！

小朋友A

還得人驚！佢仰敢在鋼索頂偏來偏去緊行。

小朋友B

𠊎毋敢看咧！佢若係種往下愛仰結煞？

強尼先生

哇，若爸仰會想著愛戴紅鼻落鋼索呢？還心色！

團長女兒

吾爸講，這个想法，係佢細子時个回憶。該時，逐擺係有表演个票無賣撇，阿公斯當無歡喜。

團長父親

唉，𠊎愛仰做正好呢？票都賣毋出，毋賣票斯無飯好食啊。

團長父親

好得，佢還有一个神奇个寶物，戴等佢，𠊎个心情斯當好。

小團長

哇！逐擺捱吾爸係心情毋好，戴等紅鼻落，黏時斯做另外一個人个樣，腳步輕鬆面項還帶等笑容。該隻紅鼻落一定有法術！

O.S

細團長囥在門背角，對門縫看到阿爸个心情對歪變好，斯像變法術共款。

小團長

𠊎乜愛來戴紅鼻落看哪！咦？仰麼个事情都無發生，法術做麼無效咧，係因為無罅乘嗎？抑係無罅巧神？阿嬤、阿嬤，這世界上正經有法術嗎？

阿婆

戆細子，這个世上當然有法術阿!毋過斯干若目珠肚有光个人正知法術个秘密。

O.S

阿嬤打開雙臂，溫柔个揇等細團長。

小團長

光？𠊎又毋識看過，愛去哪位尋目珠肚个光？

阿婆

你詳細想看啊，你正經毋識看過咩？

小團長

唔…

O.S

細團長盡力去面計，腦肚煞影著阿爸个目珠確實有他無个光亮。

馬戲團長

恁呢講來，該个奇術師乜係一個目珠會發光个人，唉，等到表演結束，再來和佢回失禮。勞力大家！勞力你等合意暗夜个表演，恩等下二擺再會！

O.S

這暗晡，毋單淨團長想著細子時个自家，強尼先生乜想著有一个細妹子問佢…

小女孩

強尼先生，快樂做麼會係毋著个事情？

O.S

聽著這个問題強尼先生夏呆撇，共款想起細子時个事情，該係一段和月鴿有關个往事。

小強尼

呵呵呵，你兜摝死棍，等一下出去訓練个時愛細義，毋好尋毋到轉屋家个路唷！

O.S

逐個人都經過細子時節，到底強尼先生細漢个時，發生過麼个樣个故事，造成這滿个佢？盡力做一个愛動物个奇術師？記得準時收聽，亻恩來和強尼先生共下成長。