饒平腔｜魔法的秘密 (七)

O.S

分強尼先生做過催眠術个該兜人，隨個進入夢鄉還在台頂表演精彩个才能，精彩个表演惹得大家哈哈大笑，毋過這央時台頂嗄出現睡著當沉又歸身著傷个動物朋友，大家仰會來看這齣表演呢？亻恩來繼續聽落去！

強尼先生

斯像大家看著，人講十全十美个表演係無存在个。這兜動物使得在台頂表演，係經過一擺又一擺失敗个練習，正會歸身著傷。

路人甲

係阿，這恁簡單个道理，亻恩等仰會無想著呢？

路人乙

天下哪會可能有毋會疾个練習，亻恩仰會打票入場，看恁淒殘个表演呢？

馬戲團長

你到底在該做麼？你和𠊎落去！

O.S

原本泡浸在大家个拍手聲肚个團長，看著情形越來越毋係勢，歸身蹦跳撞上舞台，強強和強尼先生拖下台，表演將恁呢頓惦，沉浸在催眠中个人醒咧，動物也慢慢對睡夢中清醒。

胖大叔

小男孩

老奶奶

咦？頭下到底發生麼个事，亻恩兜仰會在舞台項？

O.S

對催眠中醒起來个人，一屑仔都毋記得頭下發生麼个事。

小男孩

毋過大家都和亻恩拍手耶！

老奶奶

雖然不知發生麼个事，還係勞力大家、勞力、勞力。

O.S

下後，佢三儕共下在台頂手牽手，彎腰向大家深深鞠躬行禮，嗄傳來台下還較熱烈个拍手聲。

馬戲團長

你險險蔑壞𠊎等暗夜个表演！馬戲團係愛帶來歡樂个，盡驚有人流目汁，使得笑、哪使得惹大家唩呢？你係過亂插手，𠊎斯無細義囉！

表演還愛續落去，金晡𠊎先放你過，你還毋較緊閃開，莫在𠊎面頭前，走越遠越好！

O.S

斯算闊著會死，團長還係轉身照鏡，敬業个快速整理打扮，下二場表演黏時斯愛開始，佢愛上台表演，無恁多時間好消磨。

強尼先生

失禮，都係𠊎毋錯，續落去𠊎毋會過上台咧，你較緊倒轉舞台頂吧！

馬戲團長

嘖嘖！𠊎真經毋知愛講麼个正好！唉！！！

O.S

強尼一個人在後台無人插佢當衰過，佢毋驚園長會仰責罰自家，驚个係大家毋停毋動，較仰講，佢賭撇自家一生所學个能力，無胚想，還係無法度打醒大家對動物个同情，這下，還有麼个使得改變動物个情形呢？

強尼先生

唉，𠊎愛仰脣正使得分大家關心這个問題呢？

強尼先生

大戆，莫舐了，𠊎知你係想安慰𠊎…咦？大戆，無跈𠊎來阿？該係麼人在舐𠊎呢？

O.S

強尼先生一探頭，著驚一下，眼前个毋係大戆，係分人關著籠肚一隻毋像獅乜毋像老虎，唩个聲又像貓共款喵喵喵。

強尼先生

較仰想乜想毋著，天底下仰會有恁奇怪過特別个動物？這又毋係在該變法術？

O.S

強尼先生聽到自家講个話，較緊和嘴掩起來，麼人都使得疑狐法術个存在，斯干若做奇術師个佢使毋得，想愛知強尼先生堵到个，到底係麼个動物麼？記得準時收聽！亻恩共下來打開其中神秘所在！