饒平腔｜魔法的秘密 (六)

O.S

原來馬戲團團長做細子个時乜認為有法術个存在，做一個奇術師，強尼先生夏有一生人正使得施展一擺个神奇奇術，到底係麼个樣个神奇奇術呢？亻恩等過聽續落去。

O.S

斯阿呢，強尼先生今晡暗晡準備上台咧！

路人甲

咦？仰會係強尼先生？

路人乙

喂！𠊎等毋係買票來看你變奇術个呢！退票、退票！

小孩A

嘿！強尼先生，今晡日做麼个無帶兔比來，毋係輪著佢上台表演嘎？

小孩B

毋係啦，今晡輪著邦尼！

強尼先生

噓～～～～～～～～

O.S

為著愛分全場惦靜落來，強尼先生脫撇高帽，行禮再行禮，高高摯起一枝手指，跈等放在嘴唇，噓了一聲，在聚光燈个照光下，佢白色个手落看著當打眼。

強尼先生

今晡𠊎愛邀請大家和𠊎進行一場特別个奇術表演，無大家𢯭手，單淨𠊎一儕係無法度完成這項演出。

小朋友A

特別？𠊎愛份、𠊎愛份！

小朋友B

你無愛吵啦，大家都想看特別个奇蹟啊！

強尼先生

毋使著急、毋使著急，一儕一儕定定來，徵求幾个自願上台接受催眠个觀眾。

路人甲

路人乙

𠊎、𠊎、𠊎、選𠊎、選𠊎！

強尼先生

來、來，歡迎分𠊎點著个朋友上台躺落去，𠊎會用心施展一生人正使得用一擺个強力催眠術！

O.S

在強尼先生个強力催眠肚無論原在心肝肚當無膽驚个人，都使得面帶微笑，探頭自信个行上台，表演佢等這生人感覺盡風神的事，抑係講…佢等認為自家盡本等个事。

小朋友A

到底發生麼个事情呢？

小朋友B

你看！該毋係盡無音感个大箍叔咩？佢竟然在台頂唱歌呢

路人甲

哇，𠊎仰毋知，戴𠊎屋下隔壁个細阿倈恁會跳芭蕾舞！

路人乙

曾毋係？𠊎乜毋知講有歲數个老阿嬤，竟然膽恁在，在該騎單輪車。

O.S

愛催眠个人群，佢兜盡力去做又帶戆趖个樣相，弄著棚下所有人笑著橫東橫西，熱烈个拍手聲對開始斯無停過。

小朋友A

敢會…下二个斯係𠊎阿？

路人乙

到底下二个分強尼先生催眠个人會係麼儕呢？當想知喔！

強尼先生

相信大家都想知下二个上台表演个係麼人，公佈答案囉！

路人甲

阿姆喲！該兜毋係宣傳單上背个動物咩？佢等做麼總下睡撇咧？

強尼先生

咳、咳、大家莫緊張，籠肚个動物早斯催眠咧，沉睡在自家最甜美个夢鄉肚。

O.S

強尼先生溫柔摸過歸其著傷个動物群。

小朋友A

佢等還衰過哪…

小朋友B

係阿，歸身都著傷。

O.S

歸身著傷个動物群，干若係在舞台頂吸收大家个目光，一時，大家都毋記得自家係打票入場，等看精彩个馬戲表演。看到睡落覺个動物，做麼个大家會試著心情毋好？辟論係你還會想愛看馬戲團个動物表演麼？強尼先生个催眠奇術，到底有成功喊醒大家對動物个愛無，愛記得準時收聽，共下沉浸在故事裡肚。