饒平腔｜魔法的秘密 (五)

O.S

強尼先生為著搶救動物朋友，竟然想愛想講通馬戲團團長，希望自家使得上台替老虎、大象和細熊表演，佢有麼个好本等？亻恩來探到底！

強尼先生

無講你毋知，每個奇術師斯有一生人干若使得施展一擺个神奇奇術，斯像法術共款，相信這毋會分觀眾失望，無定著還會變做馬戲團代表性个表演呢。

馬戲團長

喔？險勢這個奇術師正經有麼个本等乜無一定。毋過𠊎有一个條件！斯係台下係有一个觀眾毋滿意今晡日个表演，發出不滿个噓聲。

馬戲團長

你斯愛賠𠊎你一生人賺个所有財產，賠𠊎兜馬戲團當大損失，包含你个鴿仔椆、兔籠還有狗仔屋，項項都走毋去 。

強尼先生

無問題！毋過做麼个團長會應𠊎無理个要求呢？

馬戲團長

無講你毋信，𠊎做細子个時，乜識係一个相信法術个細倈子，𠊎比所有人還較相信魔法个存在，所以𠊎大漢後，正會買歸座个馬戲團，帶分大家想毋著个表演，希望使得變做世界上，最接近法術个訓練師！𠊎來和你講一隻故事 …。

O.S

該係團長吂係團長个時，該時个佢還細，細團長个目珠肚總有星在該𥍉，相信這個世界正經有法術。

老奶奶

𠊎个細倈子，𠊎相信你，大膽个編織一个法術夢想，你愛知，斯愛有一個人願意相信自家，該斯使得在心肝肚存有當大个勇氣。

O.S

因為阿嬤恁樣相信自家，逐擺細團長心肝肚對自家和世界產生疑狐个時，斯會打開手臂揇等自家，嘴項緊念。

小團長

「毋使驚、毋使驚，𠊎相信這个世間个某個所在，一定有法術」。

O.S

毋過大漢了後个團長，已經當久、當久無恁呢做咧。這係因為心會跈等長大，變砸磳斯毋會驚咧係無？其實毋係，係團長毋記得，面對吂知得个世界，使得大般承認自家會驚。

馬戲團長

所以𠊎當想愛知，到底麼个係一生人正使得用一擺个奇術？做麼个你堅持用一生人个心力換一擺上臺表演？𠊎仰想斯想毋來，所以決定放手分你試看啊，較仰講，假使大家無滿意暗晡夜个表演，都還會係馬戲團，獨今無二个回憶。

強尼先生

勞力你！𠊎毋會分你失望！

O.S

麼个？強尼先生愛在馬戲團个蓬肚上台表演？庄肚个村民敢會接受庄肚个奇術佑毋分動物表演係咩？係毋係有人要求退票，無愛表演呢？想愛知續落該精采故事，愛記得準時收聽，替強尼先生加油、鼓勵哦！