饒平腔｜魔法的秘密 (四)

O.S

因為想愛看馬戲團表演，強尼先生和佢盡愛个狗大戇，偷偷潛入馬戲團个後台，嗄分佢等發現想毋著个光景，裡肚關當多隻著傷个動物朋友，到底發生麼个事情呢？亻恩過繼續聽落去！

O.S

偷潛入馬戲團後台个強尼先生，看到關著鐵籠肚，準備上臺表演个動物，一屑乜無像印著宣傳單上背精神飽滿个樣相，空氣肚吹過來个毋知係鐵銠抑係血个味瑞。

強尼先生

唉，籠肚老虎个唩聲，還有該對膏頂目屎个目眶，分佢看起來斯像細貓共款恁委屈，𠊎當想放佢走啊。

大傻

主人，亻恩過不毋走斯走毋摯啦！

強尼先生

過在這等落去，𠊎乜無法度𢯭手麼个，大戆斯先來轉。

O.S

該暗晡，強尼先生在眠床頭頂揙來揙去，仰都睡毋落覺，較仰想都係一隻一隻關在籠肚个動物，今晡暗夜个月光忒光，刺等佢微微个目珠，和佢軟軟个心肝。

強尼先生

嗯，有了！大家！𠊎想到一个無得比使得搶救動物朋友个好計謀咧！

強尼先生

愛著𠊎奇術表演正式演出个燕尾表演服。

O.S

斯著強尼先生行到屋頂个鴿仔椆頭前，起先，月鴿群看到強尼先生行上樓，緊恅著今晡日愛進行奇術表演，佢兜儕儕風神个挺起胸脯，耐心等待強尼先生擇著自家呢！

強尼先生

細子群，今晡日亻恩無上台表演，毋過係少撇你等，共款乜無法度完成這擺个奇術表演哦，𠊎愛你等替𠊎送信，越緊越好，知無？

O.S

強尼先生在佢等个腳䌈好信條，巧神个月鴿群，儕儕準備好勢，大力撥翼胛，擔硬接落送信个任務。

強尼先生

祝福大家一路順風！若係信使得順利達到位，該斯當好，月鴿總下出發咧，續落該換𠊎出場咧！大戇亻恩行！

強尼先生

你好，請分𠊎替換老虎、大象和細熊上台演出吧！

O.S

等大戇回神過來，正發現佢等企在馬戲團个棚布外背，主人強尼先生挺等胸崁，詐意當擔硬个對馬戲團个頭家講話，大戇狗細義偎在佢略略會摯个腳脣，替親愛个主人加油作膽。

馬戲團長

哈哈哈哈，這正經係𠊎聽 過盡好笑个事啊 ！你等有聽到佢講个話無？唉唷，𠊎个目汁都會流出來咧，你斷真愛替動物上台表演？

O.S

聽著強尼先生个請求，嘎分馬戲團團員，儕儕揇等肚屎笑無停。

馬戲團長

禮拜日係馬戲團个重頭戲，𠊎等恁辛苦趕來這位，斯係為著這日个表演。過再講，𠊎等對世界各地千辛萬苦尋來个老虎、大象、棕熊這兜野生動物。

馬戲團長

還愛花當多時間和心神來訓練佢等學把戲，斯係為著錫觀眾買票看著歡歡喜喜。你該點啊無打眼个小奇術，愛仰脣滿足大家个胃口呢？

馬戲團長

你已經延纏三分十一秒 个時間，對𠊎等需要先排練个馬戲團來講，逐分逐秒都當寶貴，係知聽斯較緊走！

O.S

強尼先生會因為恁呢斯打 卵退無？強尼先生想愛替動物朋友上台表演个願望，到底會實現無？記得準時收聽，共不見證故事个奇蹟！