饒平腔｜魔法的秘密 (三)

O.S

毋好咧！毋好咧！馬戲團个表演斯愛來到庄肚，恁呢會搶強尼先生奇術表演个光采無？做麼个大家都想愛看馬戲團表演？亻恩來繼續聽落去！

O.S

自從強尼先生從細子該知得馬戲團斯會來庄肚表演个消息，行在路項聽到个都係滿呢人在該討論。

路人甲

欸，你兜有聽著人講無？聽講馬戲團該頂大棚布裏肚，有比強尼先生變奇術還較想毋到个把戲，斯像真經个法術共款。

O.S

這央時，突然間吹來一陣怪風，滾起地泥項个傳單和落葉，大戇面項該張粉紅色个傳單又躐又吠。

強尼先生

大戇！停落來！停落來！該斯係一張傳單定定。

路人乙

看來強尼先生个狗乜等毋掣想去看馬戲團个表演咧呢！

小朋友A

強尼先生，你做麼个敨大氣呢？

強尼先生

唉，干若看一下斯好！𠊎乜當想看下大家講个「像法術共款个把戲」到底係生到仰脣呢啊，較仰講𠊎當煞猛打拼，想愛變做世間項盡接近法術个奇術師，有呢種使得接近法術个機會，𠊎就毋願放撇。

小朋友B

咦？這敢有恁難？只愛打單，毋斯係大家斯使得入場咧咩？

強尼先生

吾頭家毋會隨便分𠊎請假。

小朋友A

強尼先生，你毋使愁！該日無人會來看奇術表演啦！

O.S

等了又等，強尼先生等毋得到馬戲團表演个日子來到，斯像細子講个共款，該暗晡，庄肚無半個人來看奇術表演，因為大家做下走去看馬戲團啦！

大傻

主人恁奇怪喔！愛上台表演个日子，仰會渡𠊎出來散步，還係來到恁奇怪个布蓬前呢？

強尼先生

噓！大戆較細聲兜，毋堵好分人看到𠊎放撇奇術表演走來看馬戲團，該𠊎斯當見笑咧！

O.S

原來強尼先生驚佢分人認出，佢將就走入後台，想愛偷偷欣賞演出，無想到強尼先生嘎看到佢想毋到个景象，著驚著嘴摯恁大，毋敢相信眼前个場景係真个。

強尼先生

阿姆唷…有一隻老虎跛腳了跳毋高、走毋遠，有一隻大象目汁流毋停，因為佢个腳膝頭撸溜皮、緊流血，還有一隻細棕熊蹬腳尾，因為佢个腳底分火熝著起水漂，害佢無法度像人類共樣企起來行路。

強尼先生

𠊎个姆阿…世間仰會有恁淒殘个所在呢。

大傻

主人亻恩較緊走！係無斯會分人發現咧喔！

強尼先生

壞咧！有人來咧！

O.S

較仰想愛和著傷个動物𢯭手，強尼先生一時乜毋知愛仰做正好，到底強尼先生會仰脣解救著傷个動物朋友呢？想愛知強尼先生个妙計，愛記得準時收聽，共下聽故事，用愛來救動物朋友！