2022-05-09：上午11點新聞

四大超商明開賣快篩每劑180元
這站仔國內疫情變到盡傷重，鄉親對快篩試劑个需求提高，為了加速分鄉親購得快篩試劑，目前除政府提供家用快篩實名制，除了各大賣場，經濟部已協調4大超商於今日開始開賣快篩試劑，採單劑裝、限買一支，價格毋會超過新台票180个銀。有意購買快篩試劑个鄉親，今晡日做得鎖定4大超商開賣資訊。

G7承諾逐步淘汰俄羅斯石油
七大工業國集團（G7）昨晡日承諾會漸漸仔減低對俄羅斯石油的依賴，G7包括法國、加拿大、德國、義大利、日本、英國、米國个聯合聲明無當清楚說明各國會做出哪兜承諾，來停用俄羅斯个能源。毋過，這係透過打擊俄羅斯經濟來向蒲亭施壓行動的重要進展，同時也展現出國際社會在對莫斯科行動上的團結一致。

天時資訊
中央氣象局表示，今晡日溫度摎昨晡日差毋多，暗晡到朝晨各地低溫大體在22到24度，北部摎東半部日時頭高溫25到28度，中南部28到32度，會試著較翕熱。空氣品質方面，竹苗、宜蘭、花東空品區係「良好」等級；北部、中部、雲嘉南、高屏係「普通」等級。

拜二、拜三台灣附近風場轉做偏南風，天氣回轉燒暖。各地水氣減少，單淨東半部部分所在會落兜仔水，其他所在係多雲个天時，但係過晝大台北摎其他山項所在局部短暫陣雨。拜四鋒面偎近，天時毋穩定，中部以北摎東北部會有落風時水還有落大水个機會，請鄉親出外活動个時節愛記得帶著遮仔摎水衣。