四縣腔｜魔法的秘密 (十三)

O.S

前提概要：原來強尼先生 同馬戲團團長，兩儕人都係從細就相信魔法个存在，這點，分強尼先生下定決心，愛𢯭手這位新朋友，分厥動物伴仔做得得著好好个對待，毋過等到天光過後，團長就愛到警察局報到，這個暗晡，佢兩儕打嘴鼓到底都講了麼个呢？分兜繼續聽下去！

團長女兒

阿爸、阿叔暗安，阿叔今晡日你同𠊎兜𢯭手，恁仔細。

強尼先生

細阿妹仔暗安！

強尼先生

團長，𠊎想請問你，後台該又像獅仔、又像老虎个跳跳係仰般个情形？敢講你毋知走私野生動物係犯法喺？

馬戲團長

事情毋係你所想像个恁樣！該係𠊎後生時節，還吂做團長个事 …。

團長爸爸

嘿咻！倈仔正麻煩你摎這兜道具同𠊎先載到下一隻鎮上，阿爸等一下就跈過去。

馬戲團長

阿爸，無問題！

馬戲團長

咦？路項仰會有隻著傷个細鹿仔？

O.S

後生時節，團長單淨係單純个同阿爸所經營个馬戲團駛大貨車仔个後生人，毋過無論行到哪，沿途都會看著路項有動物著傷。

馬戲團長

唉，衰過个細鹿仔，愛畜大家並毋係一件盡困難个事，哪隻馬戲團毋係有一大群共伴仔呢？𠊎同你渡轉屋下畜啦！

O.S

就恁樣，團長一片緊拈、一片畜動物，同貨車仔準自家个屋下。團長這兜話，聽到強尼先生頭那當痛！

強尼先生

𠊎知了，其實你个本性毋會差，毋過，你淨曉得用 自家知得个方法去愛護動物，嗄毋知，愛有時乜會帶來傷害，你好心同著傷个動物拈轉來，嗄無時間看啊咧，分你救轉來个動物佢兜，到底過著麼个樣仔个生活！像你畜个貓頭鳥食忒大箍，結果嗄分佢雙腳斷忒飛毋起來，淨餵弓蕉个猴仔，歸身營養不良，這兜都係傷害啊！

馬戲團長

這…

強尼先生

該跳跳又係麼个情形呢？

馬戲團長

跳跳係𠊎接收某隻破產个馬戲團跈過來个動物，在上隻馬戲團，跳跳分人拿來做搖錢樹，逐暗晡，愛拖等痛个後腳登臺表演。為著佢个康健打算，𠊎無過再安排佢演出。毋過跳跳當特別个外表，長透會餳來觀眾偷偷仔進入後臺，對佢擲銀角仔講係愛許願，長久以來乜為馬戲團帶來一項收入 …。

O.S

團長緊講緊心虛，佢無感覺自家做毋著事情，毋過斡頭看啊咧，就像強尼先生講个共樣，佢下个每一隻決定，分逐隻動物圓身同心肝肚都有著傷。

強尼先生

單淨馬戲團老虎逃走既經 係全國个大新聞，係分人發現，團長恁多年來，畜恁多動物全無得著好个照顧，團肚還有一條獅虎，大家會仰仔想呢？

馬戲團長

𠊎、𠊎毋知自家仰會行到這一步，愐毋解單淨想愛分馬戲團順利經營下去，仰會堵著恁多難題。

強尼先生

唉，時間既經盡暗了，兜還係先歇睏，天光日正討論啦。

O.S

天一光，團長就愛到警察局報到，為佢所做个一切事情負責任，毋過，敢有較好个方法抑係人，做得 同團長𢯭手安置該兜無辜个動物伴仔無？想知得該兜動物朋友何去何從，定著愛繼續準時收聽哦！兜下二擺空中再見！